Əfran İsmayılov: «Dünənə qədər Fərhada «əjdaha» deyirdilər, onun xidmətləri nə tez unuduldu?!»

Əfran İsmayılov: «Dünənə qədər Fərhada «əjdaha» deyirdilər, onun xidmətləri nə tez unuduldu?!»
ÖLKƏ FUTBOLU 20 Avqust 2010 / 17:11 3200
-  A +

Zədəsi səbəbindən «Qarabağ»ın dünən Avroliqanın pley-off mərhələsində Dortmund «Borussiya»sı ilə oyununu buraxan Əfran İsmayılov komandasının məğlubiyyəti haqda fikirlərini bölüşüb. Qol.Az-ın müxbiri ilə söhbətində Ə.İsmayılov deyib ki, «Qarabağ» dünən öz oyununu sərgiləyə bilməyib: «Həm də birinci qoldan sonra komanda ruhdan düşdü. Amma Allahın köməkliyi ilə çox istərdim ki, Bakıdakı oyunu azarkeşlərimizin alqışları altında bitəcək».
Əfran İsmayılov özünün yoxluğunun komandasının oyununa nə dərəcə təsir göstərməsilə bağlı danışarkən bunları söyləyib: «Kim bilir, bəlkə də mən meydanda olsaydım, dörd yox, altı qol buraxacaqdıq. Bir daha deyirəm, dünən «Qarabağ»ın oyunu alınmadı».
«Çoxları məğlubiyyətin əsas səbəbkarı kimi qapıçı Fərhad Vəliyevi görür. Bu haqda sən nə fikirdəsən» sualına Ə.İsmayılovun cavabı belə olub: «Xeyr, mən bu fikirlə qətiyyən razılaşmıram. Düzdür, Fərhad səhvlər etdi. Amma bu, komanda oyunudu və uduzan da məhz bütün komanda oldu. Birdə ki, dünənə qədər hamı Fərhada «əjdaha» deyirdi. İndi nə oldu? Onun xidmətləri nə tez unuduldu?! Uğursuzluğa görə təkcə Fərhad yox, hamı məsuliyyət daşıyır».
Ə.İsmayılov «Borussiya»nın güclü azarkeş dəstəyinin «Qarabağ»ın məğlubiyyətinə nə dərəcədə təsir etməsi haqda sualı da cavablandırıb: «Məncə, bunun elə də təsiri olmadı. Çünki «Visla» ilə Polşadakı oyunda azarkeşlər düz bizim yanımızda qışqırırdılar, amma biz onları səfərdə məğlub edə bildik. Bu dəfə azarkeş amili haradasa 30 faiz rol oynadı. Amma ən əsası, komandamız öz oyununu göstərə bilmədi».
«Qarabağ»ın növbəti mərhələyə çıxmaq şansının az olduğunu vurğulayan Əfran «Mən istəyirəm ki, «Qarabağ» təkrar matçda elə oynasın ki, ötən il «Tvente» ilə oyunda olduğu kimi, hamı futbolçuları ayaqüstə alqışlasın» - deyib.
Sonda hazırda yeriməkdə çətinlik çəkdiyini deyən Ə.İsmayılov buna baxmayaraq, təkrar qarşılaşmanı mütləq stadionda izləyəcəyini bildirib.

Daha çox


Son xəbərlər
28.03.24  10:55

Qrizmann qayıtdı

27.03.24  21:58

Keyn sağaldı