“Borussiya”nın rəsmi saytı “Qarabağ”dan yazdı

ÖLKƏ FUTBOLU 18 Avqust 2010 / 13:21 3537

- A +

Avropa Liqasındakı yeganə təmsilçimiz “Qarabağ”ın rəqibi olan Almaniya “Borussiya”sı klubun rəsmi saytında komandamız haqda yazı hazırlayıb. Qol.Az-ın məlumatına görə, Dortmund klubunun rəsmi saytı Ağdam təmsilçisinin son illərdəki uğurlarından bəhs edib: “Avrokuboklarda uzun illər uğursuz çıxış edən “Qarabağ”da vəziyyət yalnız ötən ildən bu yana bir qədər dəyişib. Azərbaycan təmsilçisi beynəlxalq yarışlarda ilk sensasiyasına ötən ilin yayında imza atdı. Baxmayaraq ki, onlar qrup mərhələsinə vəsiqə uğrunda Hollandiyanın "Tvente" klubuna yenildilər (1:3, 0:0). Amma hər şeydən əvvəl Çempionlar Liqasının qrup mərhələsində oynamış "Rusenborq"u mübarizədən kənarlaşdırdılar. Norveçdə bu komanda ilə heç-heçə oynayan (0:0) "Qarabağ" Tofiq Bəhramov respublika stadionunda sensasiyaya imza ataraq, 1:0 hesabı ilə qələbə qazandı. Azərbaycanlılar həmçinin Finlandiya "Honka"sını da mübarizədən kənarlaşdırdı. Bu il isə "Qarabağ" Makedoniyanın "Metallurq", Şimali İrlandiyanın "Portadaun" və Polşanın "Visla" klubları üzərində qələbə qazanıb, "Borussiya"ya rəqib oldu".
Almanlar "Qarabağ"ın uğurlarının əsas memarı kimi məhz Qurban Qurbanovu göstərib: "Qarabağ"ın yenidən özünə gəlməsi və beynəlxalq arenada uğurlu çıxış etməsinin memarı Azərbaycan yığmasının sabiq hücumçusu Qurban Qurbanovdur. 38 yaşlı mütəxəssis bu komandada fəaliyyətə 2008-ci ildə başlayıb. Qurbanov qələbə taktikasını azərbaycanlı futbolçuların üzərində qurub. Onun komandası müdafiədə yaxşı oynayır və əks-hücumlara bel bağlayır. Komandanın güclü hücumçu problemi olsa da, onlar sürətli başlanğıcla gözlənilmədən qol vura bilirlər. 2001-ci ildən 2010-a qədər komandanın əsas silahı 21 yaşlı Vaqif Cavadov idi. O, ötən il "Tvente" ilə Avropa Liqası oyunlarından sonra bu komandaya transfer olundu".
Cavadovdan tutmuş, indiki heyətin dayağı olan Rəşad Sadıqov və Fərhad Vəliyevə qədər bir sıra oyunçulardan bəhs edən “Borussiya”nın saytının əməkdaşlarının Elvin Məmmədovla bağlı fikirləri daha maraqlıdır: "Qurban Qurbanovun uğur resepti azərbaycanlı futbolçularla bağlıdır. O, digər Premyer Liqa təmsilçilərindən - legionerlərə, üçüncü dərəcəli braziliyalılara üstünlük verən "Bakı", "İnter", "Neftçi" və "Xəzər Lənkəran"dan fərqli olaraq, yerli oyunçulara güvənir. İndi Azərbaycan yığmasının çox sayda oyunçusu "Qarabağ"ın formasını geyinir. "Qarabağ" gənc oyunçulara da şans verir. Məsələn, 21 yaşlı Maksim Medvedev qısa bir zamanda milli komandada özünə yer edə bilib. Həmçinin millinin baş məşqçisi Berti Foqts "Qarabağ"dan Rəşad Sadıqov, Fərhad Vəliyev və başqa futbolçulara da güvənir. İndi "Qarabağ"ın heyətində ən təhlükəli futbolçu 22 yaşlı Elvin Məmmədovdur. Hücumçuların arxasında mövqe tutan futbolçu Vaqif Cavadovdan sonra xarici çempionatlarda oynamağa ən real namizəddir".

Daha çox