“Qarabağ” tarix yazmaq şansını qaçırmamalıdır

Bu gün Avropa Liqasının üçüncü təsnifat mərhələsinə yekun vurulacaq. Qol.Az-ın məlumatına görə, sözügedən turnirdə yeganə təmsilçimiz olan “Qarabağ”ın taleyinə də məhz bu gün aydınlıq gələcək. Ağdam klubu Polşa “Visla”sı ilə “ölüm-qalım” savaşına çıxacaq.
Ötən il olduğu kimi, bu il də azarkeşlərimizə daha çox sevinc yaşatmağı bacaran Qurban Qurbanovun komandası səfərdə qələbə qazandığından, mərhələ keçəcəyinə şübhə edən yoxdur. Çünki təmsilçimizin qələbəsini şərtləndirən xeyli amillər var. Ən azı ona görə ki, cavab oyununda istənilən heç-heçə də bizi qane edir. Oyun doğma meydanda, azarkeşlərimizin güclü dəstəyi altında oynanılacaq ki, bu da böyük üstünlükdür. Üstəlik qarşılaşmanı qardaş Türkiyədən olan hakimlər briqadası idarə edəcək ki, onların digər avropalı referilərdən fərqli bizə qarşı qərəzli münasibət göstərməsi inandırıcı görünmür. Həmçinin ilk oyundan fərqli bu dəfə meydan Polşadakı kimi sulu, hava sərin olmayacaq. Bu isə rəqib komandanın əleyhinə işləyən amillərdəndir. Yeganə maneə vardırsa, o da psixoloji səddir. Lakin inanırıq ki, yetirmələrini psixoloji cəhətdən gözəl hazırlamağı bacaran Qurbanov bu dəfə də onların arxayınlaşmasına imkan verməyib, onların tarixi uğura imza atmasına nail ola biləcək. Axı Ağdam klubu üçün gözəl fürsət ələ düşüb və komanda üçüncü mərhələni də keçməklə tarix yazıb, ikinci dəfə pley-offa düşə bilər. Həmin mərhələdə isə bizi “Yuventus”, “Liverpul”, “Beşiktaş” kimi adlı-sanlı, güclü rəqiblərdən biri gözləyəcək. Qitə miqyaslı turnirdə səfərdə ilk xal, qələbə qazanan, ilk mərhələ adlayan və UEFA kubokunun xələfi olan Avroliqada birinci olaraq iki mərhələ keçən “Qarabağ”ın bu tarixi zəfəri də yazacağına inanırıq.
“Qarabağ”ın “Visla” səddini keçəcəyinə inamımızı artıran daha bir amil var ki, bu da statistik göstəricilərlə bağlıdır. Məsələ burasındadır ki, komandamız cari mövsümdə avrokuboklarda məğlubiyyətin nə olduğunu bilmir. Ötən mövsüm Hollandiya “Tvente”si ilə Bakıdakı qolsuz bərabərliyi də nəzərə alsaq, bu seriya artıq 6 oyundur davam edir.
Çətin oyun ərəfəsində komandamızın düşərgəsində heç bir ciddi itkinin olmaması hamımızı sevindirməyə bilməz. Lakin “Qarabağ”dan fərqli “Visla”nın düşərgəsində itkilər var ki, bu da işimizə yaraya bilər. Polşalılar bu günkü oyun ərəfəsində daha bir itkiylə üzləşib. Braziliyalı müdafiəçi Kleberin ardınca yarımmüdafiəçi Lukaş Qarqula da sıradan çıxıb və Bakıda meydana çıxa bilməyəcək. Məşqdə ombasından zədə alan futbolçu müayinədən keçəndən sonra ölkəmizə gətirilməsinə də ehtiyac duyulmayıb. Bundan əlavə, polşalıların daha bir müdafiəçisi Petr Sinqlar da zədədən əziyyət çəkir. Dünən Bakıda məşqə çıxan Petr sona qədər çalışa bilməyib və meydanı axsaya-axsaya tərk edib. Daha bir mərkəz müdafiəçisi Qordon Bunoza isə ilk matçda qırmızı vərəqə aldığından cəzalıdır. Göründüyü kimi, rəqib komandanın heyətində itkilər heç də az deyil. Amma geniş heyətə malik “Visla”nın geniş ehtiyat oyunçular skamyası var və buna görə arxayınlaşmağımız yolverilməzdir. İstənilən halda “Visla”ya bu günkü oyunda qələbə lazım olduğundan, ilk dəqiqələrdən böyük qüvvə ilə hücuma atılacaq. Bu isə müdafiədə problemləri olan rəqibin arxa xəttində boşluqlar yarada bilər ki, əks-hücumda yaxşı oynayan “Qarabağ” bundan maksimum istifadə etməlidir.
Qeyd edək ki, saat 21:00-da Tofiq Bəhramov adına Respublika stadionunda başlayacaq “Qarabağ” – “Visla” oyununu türkiyəli Bülənt Yıldırımın başçılıq etdiyi türkiyəli hakimlər briqadası idarə edəcək.