“Bakı” hər iki oyunda qələbə qazanıb, avrokuboklarla vidalaşdı

Bu gün UEFA Avropa Liqasının ikinci təsnifat mərhələsinin cavab oyunları çərçivəsində daha bir təmsilçimiz – “Bakı” da növbəti oyununa çıxıb. Qol.Az-ın məlumatına görə, Vinfrid Şeferin çalışdırdığı paytaxt klubu “Qarabağ”dan fərqli səfərdə çıxış edirdi. Bakıdakı ilk oyunda əzmkar qələbə qazanan təmsilçimiz cavab oyunu ərəfəsində çox pis duruma düşmüşdü. Məsələ buasındadır ki, cavab oyunundan bir neçə saat öncə məlum səbəblərdən UEFA Bakıdakı oyunun nəticəsini ləğv edərək, “zolaqlılar”ı 0:3 hesablı texniki məğlubiyyətlə cəzalandırmışdı. Belədə komandamız "Buduçnost"u 3 top fərqi ilə yenmək məcburiyyətində qalmışdı. Çernoqoriyanın Podqoritsa şəhərindəki «Pod Qoritsom» stadionunda keçirilən oyuna daha fəal başlayan təmsilçimiz ilk yarıda iki qol vurmaqla, azalan ümidləri xeyli artırsa da, bundan artığına gücü çatmadı. İkinci hissədə də üstün oyun sərgiləyən bakılılar yalnız Brnoviçin gözlənilməz qolundan sonra ruhdan düşdülər. Halbuki, istənilən halda daha iki qol vurmağa borclu olan futbolçularımız bunu həyata keçirməyə borclu idilər. Gəl ki, müdafiədə səhvsiz oynayan meydan sahibləri komandamızın növbəti mərhələyə yüksəlməsinə imkan vermədilər.

22 iyul
Avropa Liqası (ikinci təsnifat mərhələsi, cavab oyunu)

Saat 00:00. “Buduçnost” (Çernoqoriya) – “Bakı” (Azərbaycan) - 1:2

QOL: Aleksandar Şoliç, 28 (0:1). Jaba, 42 (0:2). Nenad Brnoviç, 64 (1:2)
Hakimlər: DİMİTRİOS KALOPOULOS, Dimitrios Saraidaris, Grigorios Panou, Anastasios Sidiropoulos (hamısı Yunanıstan).
Hakim-inspektor: Milovan Nikoliç (Sloveniya).
UEFA nümayəndəsi: Jan-Fransua Kruk (Belçika).
İlk oyun – 3:0 .

"BUDUÇNOST": 1. Miloş Draqoyeviç, 2. Gorce Dikanoviç, 6. Drajen Aykoviç, 8. Ardian Dyokaj, 14. Petar Vukçeviç, 17. Slobodan Maziç, 22. Yovan Nikoliç, 23. Abraham Kudemor, 24. İvan Vukoviç (k), 25. Fatoş Beçiray, 31. Qoran adamoviç

"BAKI": 23. Xalidu Sissoko, 2. Saşa Kaykut, 4. Vadim Borets, 6. Dare Nibombe, 8. Ernad Skuliç, 15. Cəmşid Məhərrəmov (k), 20. Fabio Luis Ramim, 30. İbrahim Karqbo, 32. Aleksey Savinov, 77. Aleksandar Şoliç, 85. Jaba

Oyun başladı

Komandamız 4 qol vurmalı olduğu oyunda hesabı hələ aça bilməyib

12. Kudemor oyunda sarı vərəqə alan ilk futbolçu olur

28. QOOOOOL. Soliç komandamızın ilk qoluna imza ataraq, möcüzə yolunda ilk addımı atdı - 1:0.

31. Corce Dikanoviç də sarı vərəqə ilə cəzalandırılır

Gözlənildiyi kimi, "Bakı" daha çox hücum təşkil edir və səfərdə çıxış etməsinə baxmayaraq, komandamız rəqibdən üstün oyun nümayiş etdirir

36. Ramim yaxın məsafədən inanılmaz qol şansını əldən verdi

39. Rəqib komandanın cərimə zərbəsindən fərqlənmək cəhdinin qarşısını Sissoko alır

41. Ramim daha bir qol şansını qaçırır

42. QOOOOOOOOOOOOOOOOOOOOOOLL. Jaba müdafiəçinin səhvindən istifadə edərək hesabı 2:0-a çatdırdı

45. Soliçin zərbəsini qapıçı tutur

İlk yarının əsas vaxtına 1 dəqiqə əlavə olunur

Birinci hissə başa çatır

İkinci hissə başladı

Meydan sahibləri ikinci hissəyə əvəzetməylə başlayır. Yovan Nikoliçin əvəzində meydana Nenad Brnoviç çıxır

51. Jaba yenə qapıçıyla üz-üzə qalsa da, zərbəsini son anda müdafiəçi kornerə çıxardı

52. Künc zərbəsindən sonra daha bir qol vurmaq imkanı olsa da, "Bakı"nın 3 oyunçusu bu fürsətdən yararlana bilmir

52. Kaykutun zərbəsini qapıçı gözəl seyvlə kornerə çıxarır

"Bakı" kəskin hücumlarını aramsız olaraq davam etdirir. Bu gedişlə tezliklə komandamız ümumi hesabda tarazlıq yarada bilər

61. Bakıdakı oyunda komandamızı cəzalandıran Beçiray bu dəfə də fəaldı. Onun uzaqdan zərbəsi qapıdan azca yan keçir

62. Komandamızın heyətində ilk əvəzləmə. Ramimin əvəzində meydana Mahmud Qurbanov daxil olur

64. Qol. İkinci hissədə meydana daxil olan Brnoviç uzaqdan zərbəylə vurduğu qolla hesab arasındakı fərqi azaldır - 1:2

Komandamızın vəziyyəti bir qədər də pisləşir. İndi təmsilçimiz növbəti mərhələyə çıxmaq üçün qalan 25 dəqiqə ərzində 2 qol vurmalıdır. Hər halda 4:1 hesablı qələbə qazansa, bu, komandamızın növbəti mərhələyə çıxması üçün yetərli olacaq. Ümumi hesab bərabər olsa da, səfər qollarının sayının çoxluğu təmsilçimizi növbəti mərhələyə çıxarmalıdır

70. Borets sarı vərəqə ilə cəzalanır

Qol buraxdıqdan sonra komandamızın oyununda müəyyən durğunluq diqqət çəkir. Hər halda "Bakı" əvvəlki kimi ardıcıl və sürətli hücumlar təşkil edə bilmir

74. Brnoviç sarı vərəqə alır

75. Skuliçi Vyaçeslav Sofroni əvəz edir

77. Mahmudun uzaqdan zərbəsi zəif alınır və qapıçı topu tutur

Oyunun sonu yaxınlaşır və komandamızın da növbəti mərhələyə çıxmaq şansları azalır

80. Vukoviçin təhlükəli zərbəsi qapının üstündən keçir

84. Boretsi Cefferson əvəzləyir

85. Vukoviçi Draqan Boşkoviç əvəz edir

86. Kaykutun zərbəsində azca dəqiqlik çatışmır. Halbuki o, fərqi artırmağa yaxın idi

Oyunun əsas vaxtına 3 dəqiqə əlavə olunur

90+1. Aykoviç sarı vərəqə alır

Oyun başa çatdı. Təəssüf ki, "Xəzər Lənkəran"la "İnter"in ardınca "Bakı" da avrokuboklarla erkən vidalaşdı