Əmrah Çəlikəl: «Biz bütün azarkeşləri bu gün «Qarabağ»ın yanında olmağa çağırırıq»

«Qarabağ»ın direktoru Əmrah Çəlikəl bu gün Şimali İrlaniyanın «Portadaun» klubu ilə keçirəcəkləri matç ərəfəsində Qol.Az-ın suallarını cavablandırıb

-  Bu gün axşam baş tutacaq oyunla bağlı nə deyə bilərsiniz?
- “Qarabağ” meydana hər zaman qələbə qazanmaq üçün çıxır. İnanıram ki, axşamki oyunda da qalib gəlməklə bunu bir daha sübut edəcəyik. Təbii ki, azarkeş dəstəyinin olması da bizim üçün çox vacibdir. Biz bütün azarkeşləri bu gün «Qarabağ»ın yanında olmağa çağırırıq. Qalib gələcəyimizə tamamilə  inanırıq. Necə deyərlər, inanmaq bacarmağın yarısıdır.
- Çox güman ki, növbəti mərhələdə “Qarabağ”ın rəqibi Polşanın “Visla” klubu olacaq. Bu oyun haqqında fikrinizi öyrənmək istərdik.
- İndidən bu barədə fikirləşmək düzgün olmazdı. Biz hələ ki, “Portadaun”la oyunu düşünürük. İnşallah, bu mərhələni də uğurla keçəndən sonra “Visla” haqda nəsə deyə bilərik. Bununla belə,  “Qarabağ” Avroliqada istənilən rəqibə qarşı layiqli müqavimət göstərəcək.
- Ötən mövsüm “Qarabağ”ın avrokuboklardakı oyunlarına daha çox azarkeşin gəldiyini müşahidə edirdik. Bu mövsüm isə azarkeşlərin sayının bir qədər azaldığını görürük. Sizcə, bu nə ilə əlaqədardır?
- Görünür, Bakıda havaların çox isti keçməsi azarkeşlərin sayına da təsir edib. Bir çox insanın  istirahətə yollanması azarkeşlərin sayına təsir etməyə bilməz. Lakin bununla belə, “Qarabağ”ın oyunlarına maraq olduqca böyükdür. İstəyirəm ki, axşamki oyunda da stadion tam dolu olsun. Çünki azarkeş sayının çox olması futbolçulara da ruh yüksəkliyi verir.
- Bildiyimiz kimi, avqustun 7-də ölkə çempionatı start götürəcək. Hər iki cəbhədə mübarizə aparmaq “Qarabağ” üçün çətin olmayacaq?
- Bu, nə qədər çətin olsa belə, komandanın bu çətinliyin öhdəsindən gələcəyinə inanıram. Çünki Qarabağ” klubunda birlik və bərabərliyin olması onun oyunlarına da müsbət təsir göstərir. Komandamız yüksək əhval-ruhiyyə və əzmkarlıq hesabına daha da irəli getmək iqtidarındadır.  Necə ki, biz səfərdə “Portadaun”la keçirdiyimiz oyunda bunun bir daha şahidi olduq. Belə gözəl kollektivə malik olan klubun istənilən çətinliyin öhdəsindən gələ biləcəyinə şübhə etmirəm.
- Bu mövsüm komandanın əsas hədəfi nədir?
- Premyer Liqanın qalibi olmaq komandanın çoxdankı arzusudur. Lakin milli komanda səviyyəsində yerli futbolçular yetişdirmək bizə çempionluğdan daha vacibdir. Bununla belə, bu mövsüm ölkə çempionluğuna yiyələnməklə bərabər avrokubokbuklarda da irəliləmək fikrindəyik. Ən azı ötən ilki uğuru təkrarlamalıyıq. Mümkün olduğu qədər irəli gedərək Avro Liqanısın qrup mərhələsinə düşə bilsək, daha yaxşı olardı.
- Komandanızda yeni transferlər gözlənilirmi?
- Bildiyiniz kimi, Andres Rubinslə yeni müqavilə imzalamışıq. Artıq növbəti oyunlarda onu da meydanda görmək olacaq. Gələcəkdə baş məşqçimiz Qurban Qurbanov lazım bilərsə, daha bir neçə futbolçunu transfer edə bilərik. Hələlik isə bu haqda düşünmürük.