“Qarabağ”la “Bakı” sensasiyaya imkan verməməlidir

Bu gün Avropa Liqasının ikinci təsnifat mərhələsinin cavab oyunlarına start veriləcək. Qol.Az-ın məlumatına görə, artıq qitə miqyaslı yarışlarda çıxışını dayandıran “Xəzər Lənkəran”la “İnter”in Avropa səyahəti uğursuz alındığından, indi bütün ümidlərimizi “Qarabağ”la “Bakı”ya bağlamışıq. Hansı ki, elə ötən il də məhz bu iki klub bizə daha çox qələbə sevinci və həyəcan yaşa bilmişdi.
Avropa Liqasının təsnifat mərhələsi çərçivəsindəki ilk cəhdində Makedoniya “Metallurq”unu iki oyunun nəticəsinə görə üstələyib (4:1, 1:1) ikinci mərhələyə yüksələn Ağdam klubu bu dəfə eyni aqibəti Şimali İrlandiya təmsilçisi “Portadaun”a yaşatmalıdır. Yarışa ikinci təsnifat mərhələsindən qoşulan “Bakı” da Çernoqoriya “Buduçnost”u ilə dueldə eyni uğuru təkrarlamağa borcludur. Hər iki təmsilçimizin oyunu eyni gündə olsa da, matçların başlama saatında müəyyən fərq var. Məsələ burasındadır ki, “Qarabağ”ın Tofiq Bəhramov adına Respublika stadionunda baş tutacaq oyunu Bakı vaxtıyla saat 21:00-da start götürəcəksə, “Bakı”nın “Buduçnost”la mücadiləsi gecə saat 00:00-da başlayacaq.
Şimali İrlandiyada keçirilən ilk oyunda meydan sahiblərini məğlub etməklə böyük üstünlük əldə edən “Qarabağ” bu gün keçiriləcək cavab qarşılaşmasında da eyni uğuru təkrarlamaqla, cari mövsümdə 3-cü qələbəsini rəsmiləşdirə bilər. Hansı ki, bu, reytinq baxımından da çox vacibdir. Baxmayaraq ki, ötən ilki uğuru təkrarlamaq üçün şimali irlandiyalılarla oyunda istənilən hesablı heç-heçə və minimal hesablı məğlubiyyət də yetərli olacaq. Ancaq fürsət var ikən niyə reytinqimizi artırmayaq? Əksəriyyət mərhələni iki qələbə sayəsində adlamağı düşünsə də, Qurban Qurbanovun Polşa “Visla”sı ilə nəvbəti mərhələ oyunu üçün bəzi oyunçulara istirahət verməsinin vacibliyini irəli sürənlər də var. Bu oyun ərəfəsində “Metallurq”la Bakıdakı matçda zədələnən Ansi Aqolli ilə qırmızı vərəqə alaaraq iki oyunu buraxan Admir Telinin sıraya dönüşü komandamızın düşərgəsindəki əhval-ruhiyyəni bir qədər də yaxşılaşdırıb. Yeganə itki yüngül zədəsi olduğu üçün fərdi məşqlərlə kifayətlənən Ayxan Abbasovdur. “Portadaun” isə ilk oyunda komandamızın qapısına qol vuran Riçard Leskinin, həmçinin daha bir neçə oyunçusunun xidmətindən məhrumdur və bu “Qarabağ”ın lehinə işləyə bilər.
“Bakı” isə Vinfrid Şefer kimi mütəxəssisin rəhbərliyi altında, bir neçə yeni transferlərinin sərgilədiyi oyunla hətta Avroliqanın qrup mərhələsində də çıxış etmək potensialına malik olduğunu isbatladı. Lakin onların bu potensialdan nə dərəcədə faydalana biləcəyi sual altındadır. Hansı ki, ötən il də ilk oyunlarda rüzgar kimi əsən “zolaqlılar” sonradan tam fərqli oyun göstərməyə başladılar. Ancaq bu il həmin səhvlər təkrarlanmamalıdır. Bu yolda ilk növbədə “Buduçnost”u mübarizədən kənarlaşdırmağa borclu olan bakılıların rəsmiləri böyük hesablı qələbədən dəm vururlar. Lakin hər halda minimal hesablı qələbə də bizim üçün yetərlidir və komandamızın gücünü qoruması da vacib şərtlərdəndir. Heyətində ciddi itki olmayan “Bakı”nı hətta heç-heçə də qane edəcək.