Əsas ümidlərimiz yenə “Qarabağ”la “Bakı”yadır

Bu gün Avropa Liqasının ikinci təsnifat mərhələsinin oyunlarına start veriləcək. Qol.Az-ın məlumatına görə, qitə miqyaslı yarışlarda çıxışını dayandıran “Xəzər Lənkəran”ın, srağagün Çempionlar Liqası çərçivəsindəki ilk oyununda minimal hesablı məğlubiyyətlə üzləşən “İnter”in və nəhayət, ilk mərhələni uğurla adlayan və bu gün ikinci cəhdinə çıxacaq “Qarabağ”la yanaşı sonuncu təmsilçimiz - “Bakı”nın da avrokuboklarda nəyə qadir olmasının şahidi olacağıq.
İlk cəhdində Makedoniya “Metallurq”unu iki oyunun nəticəsinə görə üstələyib (4:1, 1:1) ikinci mərhələyə yüksələn Ağdam klubunu bu dəfə səfərdə Şimali İrlandiya təmsilçisi “Portadaun”la sınaq gözləyir. Yarışlara bu gündən qoşulacaq son ölkə kubokunun sahibi “Bakı” isə ilk oyununu doğma divarlar arasında Çernoqoriya təmsilçisi “Buduçnost”a qarşı keçirəcək. Avropa Liqasının birinci təsnifat mərhələsi çərçivəsində də iki təmsilçimizin (“Qarabağ”la “Xəzər Lənkəran”ın) oyunu eyni gündə, hətta eyni saatda start götürmüşdü. Lakin onda da təmsilçilərimizdən biri səfərdə, biri evdə çıxış edirdi. Bu dəfə də eyni proses təkrarlansa da, oyunların başlama saatında müəyyən fərq var. Məsələ burasındadır ki, “Bakı”nın Tofiq Bəhramov adına Respublika stadionunda baş tutacaq oyunu Bakı vaxtıyla saat 21:00-da start götürəcəksə, “Qarabağ”ın “Portadaun”la mücadiləsi gecə saat 23:45-də başlayacaq.
“Xəzər Lənkəran” Avropa səyahətini erkən yekunlaşdırdıqdan, Çempionlar Liqasındakı təmsilçimiz “İnter” isə evdə Polşa “Lex”inə uduzub, demək olar ki, növbəti mərhələ şanslarını heçə endirdiyindən, azarkeşlərimiz bütün ümidini “Qarabağ”la “Bakı”ya bağlayıb. Hansı ki, bu iki klub elə avrokuboklar mövsümündə də bizə daha çox həyəcan və sevinc anları yaşatmağı bacarmışdılar. ÇL-də bir mərhələ keçib, ardından “Qarabağ”la yanaşı çıxışını Avropa Liqasının son təsnifat mərhələsinə kimi davam etdirən “Bakı”nın yenə eyni uğuru təkrarlamaq şansı elə də az deyil. Çünki kubokun qalibi bu ilki avrokuboklar ərəfəsində də almaniyalı Vinfred Şefer kimi mütəxəssisi sükanı arxasına gətirməklə yanaşı, həm də heyətinə bir neçə səviyyəli transfer cəlb edib. Bundan əlavə Almaniyada yaxşı hazırlıq keçmək imkanı olan “zolaqlılar”ın heyətdəki müəyyən dəyişikliklərə görə, uyğunlaşma cəhətdən problemləri olsa da, hər halda bu, “Buduçnost”la oyuna ciddi təsirini göstərməməlidir. Paytaxt təmsilçisi elə də yaxşı tanımadığımız Çernoqoriya təmsilçisinə doğma meydanda qol buraxmadan qalib gələ bilsə, güman ki, səfərə matçında işi daha asan olacaq. Hər halda bu baxımdan ilk oyunun ən azı qolsuz heç-heçə ilə başa çatması da təmsilçimizin xeyrinə sayılan amillərdəndir.
Qitə miqyaslı yarışlardakı ən böyük sevinc mənbəyimiz olan “Qarabağ”ın da “Portadaun” səddini keçəcəyinə böyük inam var. Hansı ki, hətta bukmeker kontorları da ilk oyununu evdə keçirən “Bakı” kimi, səfərdə meydana çıxacaq “Qarabağ”ın Şimali İrlandiyadan qələbə ilə dönəcəyinə şübhə etmir. Lakin çox təəssüf ki, Ağdam təmsilçisinin Britaniyaya səfəri bir sıra problemlərlə müşaiyət olundu. Öncə viza, ardından nəqliyyat problemi ilə üzləşən ağdamlılar yalnız bu gün səhər saatlarında mənzil başına çata biliblər. Bu isə psixoloji gərginliklə yanaşı, yol yorğunluğunun da əleyhimizə işləməsi deməkdir.
Bundan əlavə komandamızın düşərgəsində bəzi ciddi itkilər də var ki, bu da müəyyən narahatlıq doğurmaya bilməz. “Metallurq”la ilk oyunda qırmızı vərəqə alaraq cəzalı duruma düşən albaniyalı müdafiəçi Admir Telinin ardınca, onun həmyerlisi Ansi Aqolli də zədələnərək sıradan çıxdı və bu dəfə də səfərə aparılmadı. Onlarla yanaşı Rəşad Kərimov da Britaniyaya getməyəcək. Əvəzində Ayxan Abbasov zədə problemini arxada qoyaraq, kollektivə qoşulub. Həmçinin Maksim Medvedyevlə Samir Abasovun da tam güclə komandayla məşqlərə başlaması sevindirməyə bilməz. Gənc Qara Qarayevin “Metallurq”la cavab oyununda Aqollinin yoxluğunu hiss etdirməməsi, bu dəfə də onun start heyətində meydana çıxmasına şərait yarada bilər.
Lakin bütün bu çətinliklərə baxmayaraq, təmsilçimizin səfərdən sərfəli nəticə ilə qayıdacağına ümidimiz böyükdür. Hər halda Qurban Qurbanovun komandası ən azı qollu heç-heçə ilə qayıtmağı bacarsa, evdə irlandiyalıların işini bitirmək vəzifəsinin öhdəsindən gəlmək çətin olmayacaq.