Vinfred Şefer: “Qol buraxmadan böyükhesablı qələbə qazanmaq istəyirik”

“Öncədən onu deyim ki, “Bakı”da olduğum üçün özümü çox xöşbəxt hiss edirəm. Təxminən 4 həftədir təlim-məşq toplanışına başlamışıq. Yəni müəyyən mənada daha yaxşı hazırlıq üçün vaxtımız bir qədər az oldu. Çünki sabah artıq sabah ilk oyunumuza çıxırıq”. Qol.Az-ın məlumatına görə, bu sözləri “Bakı”nın almaniyalı baş məşqçisi Vinfred Şefer deyib.
Sabah Avropa Liqasının ikinci təsnifat mərhələsi çərçivəsində Çernoqoriya “Buduçnost”u ilə Bakıda ilk oyununa çıxacaq “zolaqlılar”ın yeni çalışdırıcısı Almaniyadakı hazırlıqdan razı qaldığını bildirib: “Ordakı təlim-məşq toplanışı dövründə texniki, taktiki, fiziki cəhətdən problemlərimizi böyük ölçüdə aradan qaldıra bildik. Bir neçə yoxlama oyununda qüvvəmizi sınadıq. Lüksemburq çempionuna qalib gəldik. Hansı ki, bu komanda dünən Bolqarıstan “Liteks”inə səfərdə minimal hesabla uduzdu. Biz isə onları daha böyük hesabla məğlub etmişdik. Lakim müəyyən problemlərimiz də oldu. Məsələn yeni transferlərimizdən olan Nibembe müxtəlif vaxtlarda iki dəfə ölkəsinin millisinə dəvət aldı komandayla birgə normal hazırlıq keçə bilmədi. Həmçinin Cefferson da sənədlərindəki problemlər üzündən ölkə xaricindəki hazırlıq dövründə bizimlə birgə ola bilmədi və yalnız Bakıya qayıtdıqdan sonra “Olimpik-Şüvəlan”la görüşdə iştirak hüququ qazandı. Bundan əlavə komandamız bir oyunçuyla yollarını aydırdı. Stevan Bates ailəsindəki problemlərlə əlaqədar getmək istədiyini bildirdi və biz də ona mane olmaq istəmədik. Elə mənim də fikrimcə belə fantastik klubda qalmaq istəmyən futbolçu dərhal çıxıb getməlidir. Bütövlükdə komanda sabahkı oyuna hazırdır. Avrokubokların oyunları həmişə çətin olur. İstənilən halda başqa ölkənin təmsilçisidir. Sabahkı qarşılaşmada çalışacağıq ki, maksimum dərəcədə qol buraxmadan böyükhesabla qalib gələk. Hamımız artıq oyunun başlamasını gözləyirik”.
“Rəqibi analiz etmişik, onlar haqda müəyyən məlumatlar toplamışıq. Komandamızın nümayəndəsi “Buduçnostun oyunlarını izləyib, bizə məlumat verib. İnternetdən də müəyyən məlumatlar öyrənməyə çalışmışıq. Ancaq düşünürəm ki, biz ilk növbədə öz oyunumuzu oynayıb, qələbə qazanmalıyıq”.
Komandanın sıralarına cəlb olunan yeni transferləri tərifləyən və komandaya böyük fayda verəcəklərinə inandığını vurğulayan Şafer onun öz komandasını tam şəkildə qurması üçün müəyyən vaxta ehtiyacının olduğunu da vurğulayıb: “Ümid edirəm ki, mən qurmaq istədiym komandanı elə sabah meydanda görə biləcəm. Amma istənilən halda komandanı tam formalaşdırmaq, yenilərin tam uyğunlaşması üçün müəyyən vaxt lazımdır”.
Klub prezidenti Hafiz Məmmədovun cütün taleyinin ilk oyunda həll olunması istəyinə münasibət bildirən almaniyalı mütəxəssis bu haqda belə danışıb: “Təbii ki, bizdə prezident kimi cütün taleyini elə sabahkı oyunda həll etməyi çox istəyirik. Amma bu futboldu, indidən dəqiq nəsə demək olmaz. Hər halda “Buduçnost” Çernoqoriya çempionatında 2-ci yeri tutub. Amma istənilən halda biz arzuolunan nəticəni qazanmaq üçün əlimizdən gələni edəcəyik”.