Azərbaycanda futbolla bağlı məşhur deyimlər (BİRİNCİ HİSSƏ)

Qol.Az saytı bugündən etibarən, Azərbaycan və dünyanın futbol adamlarının bir-biri haqda məşhur deyimlərini dərc etməyə başlayır. Futbol adamlarının dediklərində fərqi dərhal hiss edəcəksiniz. Tənqid, hədə, fəlsəfə...
 

Ramin Musayev: «Berti Foqtsa Maştağa xəstəxanasında yaxşı həkim tapmışam»

Ramin Musayev: «Vlastimil Petrjela dəlidir!»

Seneqallı Xalidu Sissoko: «Mən naxçıvanlıyam, soyadım da Süleymanovdur»

Fariz Nəcəfov: «Bizə qərəzli münasibət göstərən hakimin gözünü çıxarıb hakimlikdən qovdurarıq»

Nail Əliyev: «Böyükağa Hacıyevə hamı «zəif» deyirdi». «Bakı»nı çempion edəndən sonra onu «zəif» yox, «zver» adlandırardım»

İsgəndər Cavadov: «Vidadi Əhmədov «kartoşka»dır»

Fuad Musayev: «Ələkbər Məmmədov iki eşşəyin arpasını bölə bilmir»

Bülənt Qorxmaz: «Azərbaycanda futbol adına hər şey çox çətindir. Qar yağanda meydanı komandamla birgə təmizləyirdik»

Rəşad Sadıqov: «Şahin Diniyevə heç vaxt halallıq verməyəcəyəm!»

Maksim Medvedyev: «Dostum Vaqif Cavadova bir məsləhətim var, Azərbaycan dilini təmiz öyrənsin»

Aqil Abbas: «Əgər «İnter»in prezidenti «Qarabağ»ın Ağdamda oynamasıyla razılaşmırsa, qayıtsın vətəni Bolqarıstana, orada özünə klub yaratsın və qarnını doydursun. Onsuz da onlarda krisizdir, acından ölürlər. Gəlib burda çörəyimizi yeyirlər, heç olmasa, bizə arxa çevirməsinlər»

Adil Nadirov: “Vüqar Nadirovun atası Qarabağda şəhid olub, onu Rusiyada oynamağa qoymaram"

Namiq Yusifov: «Mən Ağdamın işğalı gününə təsadüf edən «Rusenborq»la oyunda meydana çıxıb ölməyə hazıram, təki həmin gün «Qarabağ» uduzmasın»

Nazim Əliyev: «Fabio Luis Ramim saçını uzatmaqdansa, yaxşı futbol oynasın»

Mübariz Mənsimov: «Lənkəran stadionunu mən tikdirmişəm, istəsəm, oranı fermaya çevirərəm»

Todor Botkov: «Sizin insanlar stadiona azarkeş kimi yox, patriot kimi gəlirlər»

Fabio Luis Ramim: «Həyat yoldaşım bütün komanda üzvlərinin şəkillərini, maraqlı anları çəkir. Özü fotoqraflığa maraq göstərir. Amma bu sahədə debütantdır. Hələ öyrənir. Bir müddət sonra Azərbaycanda hansısa qəzet və ya jurnalla əməkdaşlıq etməyi də mümkündür»

Tahir Gözəl: «Mən sizə, «Qarabağ»ın futbolçularına bir milyon dollar verə bilərəm. Amma unutmayın ki, bir milyon rəqəmi Azərbaycanda həm də qaçqınların sayını göstərir»

Berti Foqts: «Biz oyunları təhlil edərkən İlqar Qurbanov yatır. Bütün günü «Makdonalds»da hamburger yeyir. Min metri beş dəqiqəyə ancaq qaça bilir. Mənim 63 yaşım var, bir kilometri ondan daha çox qaçıram. Mən Azərbaycan milli komandasında baş məşqçi işlədiyim müddətdə İlqar bir daha milli komandaya çağırılmayacaq. O Türkiyədə ulduz ola bilər, amma burda heç kimdir»

İlqar Qurbanov: «Əgər yatmışdımsa, Foqts məni niyə oyatmırdı? Birdə ki, lap tutalım mən Makdonalds»da nahar edirəm, nə var ki, burda? “Makdonalds”da yemək yemək günahdır? Foqts özü harda nahar edir, İstanbul boğazında?»

…VƏ DÜNYADA FUTBOLLA BAĞLI MƏŞHUR DEYİMLƏR

Paskal Numa: «Lids»lə matçda oyundan alınmasaydım, komanda yoldaşlarımı bıçaqlayardım»

Ser Aleks Fergüsson: «Futbol statistikaları mini yubkaya bənzəyir. Bu, bir çox şeyi göstərər, amma əsl maraq döğuran məsələni göstərməz»

Corc Best: «Əgər bir az çirkin olsaydım, nə Pele, nə də Maradonanın adı hallanardı»

Joze Mauriniyo: «Əgər asan olanı istəsəydim, «Porto»da qalardım. Gözəl, mavi kreslo, Çempionlar liqası kuboku və Tanrı… Sonra da mən»

Brin Kloc: «Bəzi insanlar futbolun ölüm-dirim məsələsi olduğuna inanarlar. Sizi inandırım, futbol bundan daha artıqdır»

Johan Kroyv: «Futbol sadə bir oyundur, zor olan sadə oyunu oynamaqdır»

Sərhat Akın: «Tərəfdarımız 3 qol istədi vurduq, 5-ni istədi, 6-sını vurduq, 10-nunu istədilər, zaman yetmədi»

Dieqo Maradona: «O mənim deyil, tanrının əli idi»

Gari Linker: «Futbol, 22 nəfərin oynadığı və sonunda hər zaman almanların qazandığı bir oyundur»

Kristiano Lukarelli: «Liverno»nu həyat yoldaşımdan daha çox sevdiyimi deyirlər. Bu tamamilə yanlışdır. Həyat yoldaşımı da ən az «Liverno» qədər sevirəm»

Əli Sami Alqış: «Luçesko komandanı hər zaman belə oynatsın. Mən onun alnından öpərəm, yanağından çimdik götürərəm»

Bill Şankli: «Birincisənsə, deməli, birincisən. İkincisənsə, deməli heç bir şeysən»

Xesus Almeyda: «Biz futbolun - saxta dünyanın içindəyik. Bu, sadəcə, qurama bir dünyadır. Bizlərə bəsit bir oyun oynamaq üçün milyonlarca dollar verilir. Biz, sadəcə, sistemin davam etməsi üçün özümüzü satan kölələrik. Mən, sadəcə, futbolçu Almeyda deyiləm. Eyni zamanda, bir atayam, bir insanam… Və futbolda qaldığım hər gün əsl Almeydadan uzaqlaşıb, kişiliyimi itirirəm»