Tunc Avşar: “Bülənt Qorxmazın “Bakı” klubunda problemləri vardı”

«Bakı» klubunun türkiyəli vitse-prezidenti Tunc Avşar Bülənt Qorxmazın baş məşqçi vəzifəsindən istefa verməsi ilə bağlı Qol.Az saytının suallarını cavablandırıb
 
- Bülənt Qorxmazın «Bakı»ya gəlməsində sizin rolunuz çox olmuşdu. Bülənt istefasının səbəbləri haqda sizə nəsə deyib?
- Xeyr, mənə bir şey söyləməyib. Öz istəyilə komandadan ayrılıb. Onu narahat edən məsələlərin olduğunu dedi və klubdan istefa verdi.
- Nə idi Bülənt Qorxmazı narahat edən?
- Vallah, bu haqda mən özüm də bir şey bilmirəm. Dünən siz özünüz də bunu Bülənt Qorxmazdan soruşmuşdunuz, cavab verməmişdi.
- Türkiyə mətbuatı iddia edir ki, Bülənt Qorxmaz «Sivasspor»dan dəvət aldığı üçün «Bakı»nı tərk edib.
- Bununla bağlı konkret olaraq heç nə yoxdur.
- Komandanız ölkə kubokunun yarımfinalına vəsiqə qazanıb, çempion olmaq şansını hələ də saxlayıb. Belə bir vaxtda məşqçinin istefasını necə qəbul edirsiniz?
- Mən onun qərarına hörmətlə yanaşıram. Biz klub rəhbərliyi həm Büləntin özü, həm də komandamızın mənafeyi üçün onun qalmasını istədik. Amma Bülənt Qorxmaz istefa verdi.
- Bu addımı komandanı yarıyolda buraxmaq kimi qiymətləndirmək olarmı?
- Bilmirəm. Onun problemləri vardı. Hər halda Bülənt Qorxmazın narahatlığı olmasaydı, komandadan getməzdi.
- Narahatlığı ona kim yaradırdı?
- Vallah, bilmirəm. Bunu onun özündən soruşmaq lazımdır. Amma Bülənt «Bakı»da qalsaydı, daha yaxşı olardı. Komandamızın durumu da hər kəsi məmnun edir.
- Türkiyə mətbuatı Bülənt Qorxmaza istinadən yazır ki, komandanın vitse-prezidenti ona problem yaradıb, gizli iş görüb və bundan sonra da o istefa verib. Həmin vitse-prezidentin şəxsən sizin olduğunuz bildirilir.

- «Bakı»nın üç vitse-prezidenti var: mən, Zeynal Məmmədov və Yaşar Seyidov. Mətbuat ümumi şeylər yazıb, kimsənin adını hallandırmayıb. 
- Bülənt Qorxmazın istefası komandanızın oyununa nə cür təsir edə bilər?
- Onu yaxınlarda görəcəyik. Komandada ümumi ab-havanın pozulmaması üçün futbolçularla toplantı keçirəcəyik. Birdə ki, bizim hədəflərimiz dəyişməyib. Əvvəlkitək çempionluğu və kuboku qazanmaq istəyirik.
- Futbolçular istefa qərarını necə qarşılayıblar?
- Təbii ki, hər məşqçi dəyişikliyi olanda buna ən çox üzülünlərdən biri də futbolçular olur. Amma həyat davam edir. Nəticədə kimsə əvəzolunmaz deyil.
- Bülənt Qorxmazın əvəzinə kimi gətirməyi düşünürsünüz?
- Hazırda klubun prezidenti Hafiz bəy xaricdədir. O, Bakıya döndükdən sonra məsələni bir daha müzakirə edəcəyik.
- «Bakı»nı «Qəbələ» ilə oyuna əvəzedici heyətin baş məşqçisi Qəhrəman Əliyevin çıxaracağı söylənilir.
- Hələlik bu məsələ dəqiqləşməyib. Bu gün komandanı məşqə Ərcan hoca, Aydın hoca və Məqsəd Yaqubəliyev çıxaracaq.
- Hər halda, təxminən hansı müddətə «Bakı»ya yeni baş məşqçi təyin ediləcək?
- Yenə də deyirəm, klubun prezidentini gözləyirik. O. Bakıya gələn həftə qayıdacaq. Onunla bütün məsələləri telefonla müzakirə edirik. Ola bilər ki, yaxın bir-iki gün ərzində komandaya baş məşqçi təyin edilsin. Hələlik heç nə qətiləşməyib.