Arda Turan: “Mənim üçün öncə Allah, sonra “Qalatasaray”dır”

“Qalatasaray”ı Madrid “Atletiko”suna dəyişən Arda Turan İspaniyaya yola düşməzdən əvvəl bu gün mətbuat konfransı təşkil edib.

Qol.Az-ın məlumatına görə, ulduz futbolçu maraqlı açıqlamalar verib. Ardanın mətbuat konfransında səsləndirdiyi fikirləri təqdim edirik:

“HAMIYA TƏŞƏKKÜR EDİRƏM”

“12 ilimi, yəni ömrümün yarısını “Qalatasaray”da keçirmişəm. Ona görə də klubun adi işçisindən tutmuş prezidentinə kimi hamıya təşəkkür edirəm. Üzərimdə əməyi olan Adnan Polat, eyni zamanda “Atletiko”ya keçidimə icazə verən Ünal Aysal və Əli Dürüstə minnətdarlığımı bildirirəm. “Qalatasaray” tərəfdarlarına sözüm var. Mən də onlardan biri idim. Futbola tribunadan gəldim. İndi isə “Atletiko”ya gedirəm. Mən orda da “Cim-Bom”u, doğma komandamı dəstəkləyəcəyəm. Bundan əmin ola bilərlər”.

“FATİH TERİMLƏ VİDALAŞMAQ İMKANIM OLMADI”

“Fatih Terim gələndən sonra ölkə xaricindən təkliflər almağa başladım və getmək qərarına gəldim. Bu qərarımı ailəmlə də müzakirə etmişəm. Ola bilsin ki, Terim məndən inciyəcək. Ancaq o da “Fiorentina”ya gedəndə “Mən Qalatasaray”lıyam və orada da “Qalatasaray”ı təmsil edəcəyəm” demişdi. İndi mən də onun dediklərini söyləyirəm. Məni anlayışla qarşılayacağına ümid edirəm. Onunla vidalaşmaq imkanım olmadı. Ancaq bunu etmək üçün mütləq Türkiyəyə qayıdacağam”.

“ÖNCƏ ALLAH, SONRA “QALATASARAY”

“Əmrə Bələzoğluna böyük hörmətim var. “Qalatasaray” azarkeşinin onun hərəkətlərinə reaksiya verməsi normaldır. Ancaq Əmrə geydiyi formaya hörmət edən bir insandır. “Sarı-qırmızılı” tərəfdara yaraşan onu fitə basmamaqdır. Ancaq belə bir fikirləri varsa, bunu milli komandanın oyununda yox, “Fənərbaxça” ilə görüşlərdə etməlidirlər. Öz istəyimlə müqavilənin şərtlərinə belə bir bənd əlavə etdim ki, Türkiyəyə qayıtsam, ancaq “Qalatasaray”ın formasını geyinəcəyəm. Bu fikirləri əvvəllər də demişdim, indi də təkrarlayıram. Mənim üçün öncə Allah, sonra “Qalatasaray”dır”.

“REAL”DAN DA TƏKLİF ALSAYDIM, YENƏ “ATLETIKO”YA GEDƏCƏKDİM”

Ailəmlə dünən imsakda vidalaşdım. Rəfiqəm də İspaniyaya getmək qərarımı dəstəklədi. Bir çox klubdan təklif var idi. Ancaq onu da deyim ki, hətta “Real”dan da təklif alsaydım, yenə “Atletiko”ya keçəcəkdim. Çünki “Visente Kalderon” stadionuna çıxanda çox təsirlənmişdim. Bundan sonra “Atletiko” üçün bütün varlığımla çalışacağam. Bu komandada hansı nömrəli forma altında çıxış edəcəyim məlum deyil. Ancaq mən 14 və ya 66 nömrəli formanı geymək istərdim”.

“QALATASARAY”IN KAPITANI FİTƏ BASILMAMALI İDİ”

“İçimdə bir az küskünlük var. Belə hallar ailə üzvləri arasında ola bilər. Bu, normaldır. Ancaq mənə görə, “Qalatasaray”ın kapitanı fitə basılmamalı idi. Zədəli vaxtlarım oldu və həmin anlarda azarkeşlərimizin mənə daha çox sahib çıxmasını gözləyirdim. “Qalatasaray”da kapitanlıq sarğısını pis daşımadım. Kapitan olmaq komandaya kubok qazandırmaq demək deyil. Bir “Qalatasaray” azarkeşi olaraq ən böyük arzum budur ki, məndən sonra komandanın kapitanı Səbri olsun”.

“HAMINIZI ÇOX SEVİRƏM”

“Qalatasaray”dan pula görə ayrılmadım. Bu, səbəb deyil. Ümumiyyətlə, klubla mənim aramda pulla bağlı heç vaxt problem olmayıb. Başqa klublrdan da təklif var idi. Ancaq həm “Qalatasaray”ı, həm də özümü düşündüyüm üçün “Atletiko”nu seçdim. Quus Hiddink də ölkə xaricində oynamağımı istəyirdi. Sonda isə məni Messi ilə müqayisə edənlərə bunu demək istəyirəm. “Tövbə deyin”. Messi dahi futbolçudur. Haqqınızı halal edin. Hamınızı çox sevirəm”.