"Bursaspor" yenə qələbəsiz qaldı (YENİLƏNİB)

Türkiyə Superliqasında növbəti tura "Bursaspor" - "Ankaragücü" matçı ilə yekun vurulub. Qol.Az-ın məlumatına görə, baş məşqçi Ərtuğrul Sağlamın rəhbərliyi ilə 100-cü matçına çıxan son ölkə çempionu yenə qələbəyə nail ola bilməyib.

Oyun qolsuz bərabərliklə yekunlaşıb. Bununla da "timsahlar" şərikli liderlər "Fənərbaxça" və "Trabzonspor"dan 9 xal geri düşüblər.

Daha öncə "Trabzonspor" son dəqiqə qolu ilə "Gənclərbirliyi"ni səfərdə yenərək, "Fənərbaxça"nın liderliyinə şərik olub. "Eskişehirspor" "Karabükspor"a minimal hesabla qalib gəlib və 6-cı pillədəki mövqeyinə qayıdıb. Səfərdə "Bucaspor"u darmadağın etmiş "Sivasspor" isə təhlükəli zonadan uzaqlaşıb. "Beşiktaş" klubu "Fi-YAPI İnönü" stadionunda qəbul etdiyi "Kayserispor" üzərində inamlı qələbə qazanıb. Bu görüş əsasən, iki anlamda "qara qartallar" üçün əhəmiyyətli olub. Oyun klubun yaranışının 108-ci ildönümündə təsadüf edib. 1903-cü ildən fəaliyyətə başlayan klubun "doğum günü" 19 mart (19.03) hesab edilir. Digər tərəfdən, Bernd Şusterin baş məşqçi postu ilə vidalaşmasından sonra onu əvəzləyən Tayfur Havutçu debüt matçına çıxıb. "Beşiktaş" ad günündə Havutçunun ilk sınağında qələbə qazanıb.       

Açılış matçında isə "Qalatasaray" və "Fənərbaxça" arasında 2011-ci ilin ilk derbisi keçirilib. "Türk Telekom Arena"da baş tutan matç qonaqların qələbəsi ilə nəticələnib - 2:1. Qarşılaşmada hesabı sabiq "Fənərbaxça"lı Kazım Kazım açıb. İkinci yarıda meydançaya daxil olan Semih Şəntürk "sarı-lacivərdlilər"in oyununda dönüş edib. Bunun məntiqi nəticəsidir ki, əvvəlcə onun özü, sonra isə Aleks fərqlənib. Bununla da qələbə qazanan "Fənərbaxça" liderliyini qoruyub. "Qalatasaray" isə 11-ci pillədə qalıb.  

"Qalatasaray" - "Fənərbaxça" - 1:2
Qollar: Kazım Kazım, 14 (1:0). Semih Şəntürk, 76 (1:1), Aleks, 87 (1:2)

"Qalatasaray": 87. Robinson Zapata, 2. Lukas Neyl, 5. Gökhan Zan, 76. Sərvət Çətin, 22. Hakan Balta, 19. Lorik Sana, 25. Yekta Kurtuluş (18. Ayhan Akman, 85), 27. Xuan Kulio, 28. Boqdan Stanku (99. Harri Kyuell, 67), 80. Kazım Kazım (10. Arda Turan, 60), 15. Milan Baroş

"Fənərbaxça": 1. Volkan Dəmirəl, 77. Gökhan Gönül, 2. Dieqo Luqano, 3. Jozef Yobo, 27. Andre Santos, 38. Mehmet Topuz, 16. Kristian, 21. Səlcuk Şahin (23. Semih Şəntürk, 46), 20. Özər Hurmacı, 10. Aleks (4. Bəkir İrtegün, 88), 7. Mamadu Nyanq (11. Miroslav Stoç, 73).

Baş hakim: Fırat Aydınus.

19 mart

"Kasımpaşa" - "Manisaspor" - 1:0
Qol: Fernando Varela, 73

"Qaziantepspor" - "İstanbul BB" - 4:1
Qollar: Hürriyet Güçer, 7. Olcan Adın, 33; 65; 71 - Filip Holosko, 62

"Konyaspor" - "Antalyaspor" - 0:0

"Beşiktaş" - "Kayserispor" - 4:2
Qollar: Uqo Almeyda, 61; 89. Fabian Ernst, 69. Rikardu Kuarejma, 76 - Marselo Zalayeta, 22. Selim Teber, 81

20 mart

"Eskişehirspor" - "Karabükspor" - 1:0
Qol: Armand Deumi, 33-avt.
Penaltini vura bilməyib: Ümit Karan, 25 ("Eskişehirspor")

"Bucaspor" - "Sivasspor" - 0:4
Qollar: Eneramo, 40. Suares, 61. Erman Kılıç, 84. Cihan Yılmaz, 90
Qırmızı vərəqə: Kamil Ahmet Çörəkçi, 25 ("Bucaspor")


"Gənclərbirliyi" - "Trabzonspor" - 1:2
Qollar: Cem Can, 12 - Giray Kaçar, 57. Alanzinyo, 90+1

21 mart

"Bursaspor" - "Ankaragücü" - 0:0