Pulsuz dərs xoşunuza gəldi, cənab Foqts?

Bu gün 2012-ci ildə təşkil olunacaq Avropa çempionatının seçmə mərhələsində növbəti turun oyunları keçirilib. Qol.Az-ın məlumatına görə, 4 gün öncə baş tutan ilk turun oyunlarında Azərbaycan millisi istirahət etsə də, bu gün nəhayət Berti Foqtsun çalışdırdığı komandamız da ilk matçına çıxıb. Məhz bu üzdən futbolsevərlərimizin bütün diqqəti məhz Almaniyanın Köln şəhərinə yönəlmişdi. Axı komandamız ardıcıl ikinci mövsümdür eyni qrupda yer aldığımız güclü Almaniya millisinin qonağı idi. Komandamızın çətin rəqiblə səfər matçından sərfəli nəticə ilə dönəcəyi inandırıcı görünməsə də, hər halda ən azından layiqli oyun sərgiləyib, normal hesabla məğlub olacağına inamımız var idi. Gəl ki, ardıcıl ikinci seçmə mərhələdir yığmamızın sükanı arxasında çalışan Berti Foqtsun komandası biabırçı məğlubiyyətdən yaxa qurtara bilmədi. Ötən mövsüm bu rəqibinə 0:4 hesabıyla yenilən futbolçularımız bu dəfə qapısında daha çox - 6 qol gördü. Düzdü, bu dəfə rəqib qapısına yol tapmağımıza da sevinmək şansımız oldu. Amma nəzərə alsaq ki, həmin qol da sırf rəqib qapıçının səhvindən sonra gerçəkləşdi, deməli, Foqtslu millimizdə irəliləyişdən yox, geriləmədən danışmağımız daha düzgün olardı. Yeri gəlmişkən, almaniyalı mütəxəssis bu qarşılaşma ərəfəsində az qala hər açıqlamasında yığmamızdan hansısa sürpriz gözləməyin mənasız olduğunu, həmyerliləri ilə oyunun sadəcə "pulsuz dərs" olduğunu iddia edirdi. Gözlədiyiniz "dərs" xoşunuza gəldimi, cənab Foqts?

AÇ-2012-nin seçmə mərhələsi
A qrupu
7 sentyabr

23:45. Almaniya – Azərbaycan - 6:1

QOLLAR: Heyko Vestermann, 28 (1:0). Lukas Podolski, 45 (2:0). Miroslav Kloze, 45+2 (3:0). Rəşad Sadıqov, 53-öz qapısına (4:0). Manuel Noyer, 57 (4:1). Badştuber, 85 (5:1). Kloze, 90+2 (6:1).
Hakimlər: Markus Stromberqsson, Stefan Vittberq, Fredrik Nilson, Daniel Stalhammer (hamısı İsveç).
Hakim-inspektor: Stefan Ormançev (Bolqarıstan)
UEFA nümayəndəsi: David Georgi Kollins (Uels)
Köln. “Reynenerjiştadium” stadionu.

ALMANİYA: 1. Manuel Noyer, 4. Saşa Ryeter, 6. Sami Xedira, 7. Bastian Şvaynştayger (19. Kakau, 78), 8. Mesut Özil, 10. Lukas Podolski, 11. Miroslav Kloze, 13. Tomas Müller (21. Marko Marin, 62), 14. Holger Badştuber, 16. Filip Lam (k), 17. Per Mertezaker (5. Heyko Vestermann, 11).
Ehtiyat oyunçular: 22. Rene Adler, 9. Stefan Kisslinq, 18. Toni Kroos, 23. Mario Qomes.
Baş məşqçi: Yoahim Löv.
AZƏRBAYCAN: 1. Kamran Ağayev, 14. Rəşad Sadıqov, 3. Saşa Yunisoğlu (13. Vurğun Hüseynov, 56), 2. Rail Məlikov, 18. Maksim Medvedev, 9. Samir Abasov, 8. Aleksandr Çertoqanov (6. Rəşad Sadiqov, 64), 5. Elnur Allahverdiyev, 4. Mahir Şükürov, 17. Vüqar Nadirov (22. Araz Abdullayev, 85), 7. Vaqif Cavadov.
Ehtiyat oyunçular: 23. Səlahət Ağayev, 16. Amit Quluzadə, 19. Rahid Əmirquliyev, 20. Fabio Luis Ramim.
Baş məşqçi: Berti Foqts.

Oyun başladı. Millimizə yeni seçmə mərhələdə və almanlarla oyunda uğurlar arzulayırıq!!!

5. Müdafiəçilərimizin kobud səhvindən sonra almanlar təhlükəli əks-hücum təşkil etsə də, meydan sahiblərinin hesabı açmasına Kamran Ağayev vaxtında mane ola bildi

7. Vaqif Cavadovla Per Mertezaker arasındakı hava mübarizəsi zamanı alman oyunçu zədələnir

10. Vaqifin sol cinahdan gözəl reydi. O, cərimə meydançasına ideal ötürmə etsə də, son anda Şvaynştayger təhlükəni sovuşdurur

10. Railin uzaqdan zərbəsi üstdən keçir

11. Mertezakerin zədəsi ciddi olduğundan, onu Heyko Vestermann əvəzləyir

14. Elnur Xediraya qarşı təhlükəli zonada kobud oynayır. Cərimə zərbəsini Şvaynştayger yerinə yetirir. Top müdafiəçilərimizə toxunub kornerə çıxır

18. Almanların növbəti künc zərbəsi də bəhrəsiz qalır

19. Saşa Klozenin cərimə meydançasına daxil olmasına düz xəttin üzərində mane olur. Təhlükəli mövqedən növbəti cərimə zərbəsi 

20. Kamran Podolskinin cərimə zərbəsini zərərsizləşdirməyi bacarır

23. Podolski təkbaşına irəliləyib qapıya zərbə endirsə də, top az fərqlə çölə çıxır

24. Mahirin ifasında komandamızın növbəti təhlükəli hücumu. Lakin onun zərbəsi dəqiq olmur

25. Podolskinin növbəti təhlükəli zərbəsi dəqiq olmur

25. Künc zərbəsindən sonra Vestermannın təhlükəli baş zərbəsini Kamran inanılmaz reaksiyayla qaytarır. Podolskinin təkrar zərbəsi yenə bəhrəsiz qalır

28. Oyuna sonradan çıxan Vestermannın yaxın məsafədən ilk zərbəsini Kamran dəf etsə də, təkrar zərbə hesabın açılmasıyla nəticələnir - 1:0

32. Klozenin hesabı artırmaq şansı. Saşa topu onun ayaqları altından kornerə çıxarır

36. Vüqarın uzaqdan təhlükəli və qüvvətli zərbəsini Noyer zərərsizləşdirməyi bacarır

Millimiz almanların aramsız hücumlarının qarşısını çətinliklə də olsa, ala bilirlər

45. Podolski, nəhayət ki, istəyinə çatır. Cərimə meydançamızda asanlıqla divar ötürməsi edən almanların hücumunu məhz Lukas tora göndərir - 2:0.

45+2. Kloze daha bir qol vuraraq, artıq ilk yarıda darmadağını rəsmiləşdirir - 3:0.

İlk yarı başa çatdı

İkinci hissə başladı

46. Meydan sahibləri ikinci hissəyə də hücumlarla başlayır. Kapitan Lamın yaxın məsafədən zərbəsini Kamran tuta bilir

48. Samir rəqib futbolçuyla mübarizə zamanı zədələnir

51. Müllerin təhlükəli zərbəsi...Bu dəfə rəqibin zərbəsi dəqiq olmur

53. Xediranın qapı qarşısına ötürməsi zamanı Rəşad Sadıqov topu öz qapımıza göndərir - 4:0

56. Saşa Yunisoğlunun əvəzində meydana Vurğun Hüseynov daxil olur

57. Vaqif Cavadovun yerinə yetirdiyi künc zərbəsi zamanı Noyer kobud səhvə yol verir və komandamız vurulan qollardan birinin əvəzini çıxır - 4:1

61. Müller qapımıza yol tapsa da, ofsayd qeydə alınır

62. Mülleri Marko Marin əvəzləyir

64. Çertoqanovun əvəzində meydana Rəşad Sadiqov çıxır

73. Podolskinin növbəti dəfə fərqlənmək şansı olsa da, zərbəsi dəqiq olmur

78. Şvaynştaygeri Kakau əvəzləyir

83. Kakaunun zərbəsini Kamran zərərsizləşdirir

85. Foqts Vüqarı Araz Abdullayevlə əvəzlədi

85. Badştuber də millimizin qapısına yol tapır - 5:1

90+2. Kloze daha bir qol vuraraq, hesabı biabırçı həddə çatdırdı - 6:1

Oyun başa çatdı