Berti Foqts: “Klublar öz işləri ilə məşğul olsalar, daha yaxşıdır”

ÖLKƏ FUTBOLU 21 Aprel 2010 / 12:29 2407

- A +

“Futbolçuların milli komandanın təlim-məşq toplanışından klublarına yorğun qayıtmasını kim deyir ki? Mən Qurban Qurbanov və “Qarabağ” rəhbərliyinin dediklərinə şərh vermək istəmirəm”. Bu fikirləri Azərbaycan yığmasının baş məşqçisi Berti Foqts deyib.
Unibank Premyer Liqasının XXVIII turunda “Bakı”ya öz meydanında böyük hesabla uduzan (1:4) “Qarabağ” belə uğursuz nəticəyə əsas səbəb kimi futbolçuların yorğun olmasını göstərib. Oyundan sonra baş məşqçi Qurban Qurbanov, klubun direktoru Əmrah Çəlikəl mövsümün qızğın vaxtında yığmanın təlim-məşq toplanışlarının planlarına təsir etdiklərini bildirib. Ancaq Foqts nəinki “Qarabağ”ın, ümumiyyətlə klubların buna etirazını düzgün saymır: “Klublar öz işləri ilə məşğul olsalar, daha yaxşıdır. Keçirdiyim təlim-məşq toplanışının əsas məqsədi futbolçuların fiziki hazırlığını yüksəltmək, taktiki baxımdan daha da yaxşı oynamaqdır. Çox yaxşı bilirsiniz ki, beynəlxalq səviyyədə məşqlər, oyunlar var. Biz belə məşq proseslərini təşkil etməklə, mili komandanı müəyyən səviyyəyə çatdırmaq istəyirik”.
Alman çalışdırıcı həmçinin bildirib ki, bu toplanışlar futbolçuların xeyrinədir və onların daha yaxşı hazırlığına, oyununa hesablanıb: “Bir də mən planımı əvvəldən tərtib etmişəm. Təqvim tərtib edilərkən, yığmanın bu təlim-məşq toplanışları nəzərdə tutulmalı idi”.
Berti Foqts Vaqif Cavadovla bağlı sualı da cavablandırıb: “Vaqif Cavadov 4 aydır “Tvente” klubuna keçib. Onun bu müddətdə cəmi bir görüşdə, özü də əvəzedici komandanın heyətində oynaması məni narahat etmir. Aydın məsələdir ki, futbolçu zədə alanda oynamır”. Ancaq Avro-2012-nin startına az qalmış 21 yaşlı hücumçunun oyun praktikası sarıdan korluq çəkməsi alman çalışdırıcını qayğılandırmır: “Bu, əhəmiyyətli deyil. Vaqif olmayacaq, onun yerinə başqa hücumçunu oynadacağam”.
Komandamızın digər legioneri Mahir Şükürov isə klubunda mövqe dəyişikliyi ilə bağlı problemlə üzləşib. Yeni mövqeyə uyğunlaşmaqda çətinlik çəkən 28 yaşlı yarımmüdafiəçi bunu Foqtsla müzakirə etmək fikrindədir. Ancaq baş məşqçi bunda da narahatlıq görmür: “Klubun məşqçisi futbolçunu istədiyi mövqedə oynada bilər. “Anji”nin çalışdırıcının Mahiri hansı mövqedə oynatması məni maraqlandırmır. Mən onu milli komandada sağ cinahda oynatmışam. Şükürov məhz bu mövqedə tanınıb, məşhurlaşıb. Mahirin “Spartak”la görüşünü izləmək üçün Moskvaya gedəcəyimə gəlincə, “Anji”nin hansı oyununu izləməyi dəqiqləşdirdikdən sonra səfərə çıxacağam” (apasport.az).

Daha çox