Abas Əzimovun 80 yaşına

Onu  futbol statistikası sahəsində hamının üz tutduğu ən dəqiq və etibarlı mənbə kimi tanıyırlar. Özü də təkcə Azərbaycan futbolu yox, həm də dünya və Avropa çempionatları ilə əlaqadar statistika sahəsində…

Abas müəllimi bu işə adi bir təsadüf gətirib. 10 yaşı olanda İçərişəhərdə ondan bir neçə yaş böyük olan qonşu oğlanın dəftərçədə qeydlər apardığını görüb. Maraqlananda qonşu oğlan ona futbol yarışlarının statistikasını apardığını söyləyib.

O gündən  o da dəftərçə götürərək bu işə qoşulub: bir-biri ilə üz-üzə gələn komandaların heyətləri, oyunu idarə edən hakimlərin futbolçulara göstərdiyi sarı və qırmızı vərəqələr, qapılara vurulan qollar və digər məlumatları  dəqiqliklə öz dəftərçəsinə yazıb. 1946-ci ildən başladığı həmin işi bu gün – ömrünün  ixtiyar cağlarında da  davam etdirir.

Bəzən təsadüflər  zərurətdən,  zərurətlər isə təsadüfdən yaranır. Təsadüfdən yaranan maraq hissi onun seçimini, gələcək həyat yolunu da müəyyən edib.  O, bir müddət “Dinamo” cəmiyyətində yüngül atletika ilə məşğul olub. Bir neçə il 5 və 10 kilometr məsafələrə qaçışda  gücünü sınayıb, yüngül atletika sahəsində birinci dərəcə qazanıb. Qaçış çığırlarında çıxışını başa vurandan sonra hakimliyə başlayıb. Abas Əzimov 30-dan artıq beynəlxalq  yarışin hakimi olub. Tale ona 1980-ci ildə Moskva olimpiadasında hakimlik etməyi də qismət edib.

Abas Əzimov səkkizinci sinfi bitirəndən sonra  Neft texnikumunu, sonra isə Bakı axşam məktəbini bitirib. Əmək fəaliyyətinə 1962-ci ildə Azərbaycan televiziyasında fəhlə kimi başlayıb və eyni zamanda  Azərbaycan Dövlət Universitetinin filologiya fakültəsində təhsil alıb.  Onun idman jurnalistikasına gəlişi mərhum Valid Sənaninin adı ilə bağlıdır. Məşhur telejurnalist  marağını nəzərə alaraq  onu 1967-ci ildə idman proqramları redaksiyasına dəvət edib. Əvvəlcə redaktor kimi fəaliyyətə başlayan Abas müəllim  sonralar baş redaktorun müavini vəzifəsinədək irəliləyib.  1997-ci ildən əmək fəaliyyətini AFFA-da davam etdirir. Paytaxtımızın ən böyük idman qurğularından olan T. Bəhramov adına Respublika stadionun açılışı həmin hadisəni izləyənlərdən olan Abas Əzimovun yaddaşında silinməz izlər qoyub...   

-Stadionun açılışı əvvəlcə 1951-ci il sentyabrın 6-na planlaşdırılırdı. Lakin respublikanın idman rəhbərləri həmin oyunda “Neftçi”nin Moskva “Lokomotiv”inə qalib gələ biləcəyindən ehtiyat etdiklərinə görə onu sentyabrın 16-na saxladılar, çünki həmin mərasimdə Azərbaycan KP MK-nın  birinci katibi M.  C. Bağırov da iştirak etməli idi, - deyə Azərbaycanın əməkdar jurnalisti Abas Əzimov  xatırlayır. –  Stadionun aşılış günü “Neftçi” Vülnüsün “Spartak” komandasını qəbul edərək 4:0 hesabı ilə qalib gəldi. Açılış mərasimini və stadiondakı ilk oyunu izləyənlər arasında  olmağım həyatımın ən unudulmaz günlərindən biridir.  

Ölkəmizin ən stajlı idman statisti kimi tanınan Abas Əzimov indi AFFA-da fəaliyyət göstərən futbol muzeyinin direktorudur. Çoxillik zəhmətinin bəhrəsi olan   “Neftçi -70”, “Azərbaycan milli komandası”, “Futbolumuzun futzal salnaməsi”, “Xatirələrdə yaşayanlar” və  “Futbolumuz müstəqillik dövründə”  kitabları onun qələmindən çıxıb.

Abas Əzimovu futbol ensiklopediyası və tarixçisi hesab edənlər yanılmırlar. Futbolla əlaqədar hansı sualla ona üz tutsan, dolğun, əhatəli və zəngin faktlara söykənən məlumat ala bilərsən.

Ehtirasların coşub- çağladığı futbol oyunu gözəl bir tamaşa,  zaman ötəndən sonra keçmişə çevrilərək  tarix və  matçın ayrı-ayrı məqamlarını özündə əks etdirən  statistikadır. Statistik faktları  yığıb toplamaq və ipə-sapa düzmək isə  onun  kimi futbolsevərin işidir.  Abas müəllim məhz belə bir sevgi və fədakarlıqla Azərbaycan futbolunun tarixini yaşadır.

80 yaşının tamam olmasına baxmayaraq… 

Süleyman QARADAĞLI