Rail Məlikov: "Mən də məətəl qalmışam"

"Qəbələ" klubunun müdafiəçisi Rail Məlikov Qol.Az saytına müsahibə verib. Uzun müddətdir zədədən əziyyət çəkən və "Qarabağ"la kubok oyunundan meydana çıxan milli komandamızın sabiq üzvü sıraya dönməsindən və Topaz Premyer Liqanın son turunda "İnter"ə böyükhesablı (1:4) məğlubiyyətdən danışıb.

- Uzun müddət zədədən əziyyət çəkdikdən sonra oyuna çıxdın. Hazır idin meydana çıxmağa?

- Zədədən sonra ilk oyunu "Qarabağ"a qarşı keçirdim. Meydana gözlənilmədən çıxdım və pis təsir bağışlamadım. "inter"lə oyunda da 25 dəqiqə meydanda oldum. Məşqçilər korpusunun fikri odur ki, bir-iki oyunda 20-25 dəqiqə oynayım, sonra isə əsas heyətdə meydana çıxım. İnşallah gələn oyunlarda start heyətdə meydana çıxmağım məsləhət görülür. Çox ciddi zədə almışdım. Altı ay gözləməyə məcbur idim.

- Topaz Prmeyer Liqanın son turunda "İnter"lə qarşılaşdınız. "Qəbələ" növbəti dəfə doğma meydanda azarkeşlərini sevindirə bilmədi...

- Bizim üçün gözlənilməz nəticə oldu. Oyun başlayanda əlimizə düşən şanslardan istifadə edə bilmədik. Üstəlik müdafiədə zəif təsir bağışladıq. Ancaq hesabın 1:4 olacağını ağlımzdan keçirmirdik.

- Böyükhesablı məğlubiyyətin əsas səbəbini müdafiədəki boşluqlarla bağlamaq olar?

- Xeyr, bunu tək müdafiə ilə bağlamaq düzgün deyil. Komanda olaraq uduzmuşuq. İlk qolu biz vursaydıq, bəlkə də 4:0 hesablı qələbə qazanardıq. Əsas səhvlərimizi baş məşqçi daha yaxşı analiz edəcək.

- Bəlkə, "Qarabağ"la kubok matçından sonra komandanız toparlana bilməmişdi?

- Deməzdim ki, oyuna hazır deyildik. Qarşılaşmanın əvvəlində göstərdik ki, meydana iddialı çıxmışıq. Sadəcə şansları dəyərləndirə bilmədik.

- Qış fasiləsindən sonra komandanız öz meydanında qələbə qazana bilməyib. Doğma meydandakı bu uğursuzluğu necə izah etmək olar?

- Mən özüm də buna məətəl qalmışam. Bu, bütün komandamızı düşündürür. Adətən komanda öz meydanında daha yaxşı təsir bağışlayır, nəinki səfərdə. İndi biz sanki səfər komandası olmuşuq. Ancaq əsas öz meydanımızda yaxşı nəticə qazanmalıyıq. Çünki hər dəfə azarkeşlər stadionu məyus şəkildə tərk edəndə biz də çox pis oluruq. Baş məşqçimiz "İnter"ə məğlubiyyəti düzgün analiz etməldir. Yəqin ki, Syomin lazımi nəticələr çıxaracaq.

- Artıq "Qəbələ" beşinci pilləyə yuvarlandı. İndi daha çox kuboku düşünmək olar?

- Məsələyə real yanaşsaq, kubokda şansımız daha yaxşıdır. Əsas hədəf kimi kuboku qazanmağı düşünürük. Ancaq çempionatın bitməyinə də hələ çox var. Çempionluq real görünməsə də medalçılar sırasına düşməliyik. Rəhbərlik də bunu bizdən tələb edir. Bu mövsüm titul qazanmağa borcluyuq.

- Kuboku qazanmaq üçün yarımfinalda "Xəzər Lənkəran"ı keçməlisiniz...

- "Xəzər Lənkəran" həmişə kubok oyunlarında yaxşı təsir bağışlayır. Bizi çox maraqlı və gərgin oyun gözləyir. Çünki rəqibimiz də çempinatda iddialı deyil. Bütün fikirlərini kuboka yönəldiblər.

- Topaz Premyer Liqanın növbəti turunda rəqibiniz kubokda mübarizədən kənarlaşdırdığınız "Qarabağ"dır...

- Bizə iki gün istirahət verilib. Martın 25-də məşqlərə başlayacağıq. Keçilməyən rəqib yoxdur. Bunu kubok oyununda da sübut etdik. Artıq mövsümün sonuna yaxınlaşırıq. Qarşımıza qoyulan hədəflərə görə "Qarabağ"la oyunda yaxşı nəticə qazanmalıyıq.

Ramiq AĞAMƏMMƏDOV