Deyvidas Çesnauskis: “Xorvatiya İspaniyanı qrupda saxlaya bilər”

Bu müsahibə "Unibank"ın sponsorluğuyla hazırlanıb

“Bakı”nın litvalı yarımmüdafiəçisi Deyvidas Çesnauskis Avro-2012 ilə bağlı Qol.Az-a müsahibə verib

- Rusiyanın qrupda qalması sənin üçün gözlənilməz olmadı?

- Açığı, bu, mənim üçün sürpriz oldu. Rusiyanın qrupda qalmasına çox təəssüfləndim. Özüm də onlara azarkeşlik edirdim. Ancaq son turda gözlənilmədən yunanlara uduzaraq, mübarizəni dayandırdılar.

- Bəs, Yunanıstanın Rusiyanı məğlub edərək qrupdan çıxması sənin üçün sürpriz olmadı?

- Yox, sürpriz deməzdim. Çünki Yunanıstan da yaxşı komandadır. Ümumiyyətlə, Avropa çempionatında  zəif komanda olmur. Sadəcə, yunanlar ruslarla oyunda çox ağıllı taktika seçdilər, oyunu müdafiədən qurub əks-hücumlara bel bağladılar. Bu isə özünü doğrultdu.

- Bu gün C qrupunda son turun oyunlarına start verilir. İtaliya-İrlandiya və İspaniya-Xorvatiya oyunları ilə bağlı proqnozun nədir?

- İspaniya təbii ki, qrupun favoritidir. İtaliya-İrlandiya oyununda isə italyanları favorit görürəm. Amma, deyim ki, Xorvatiya da pis komanda deyil və düşünürəm ki, onlar da qrupdan çıxa bilər.

- Az öncə İspaniyanı qrupun favoriti hesab etdiyini dedin. Deməli, İspaniya-Xorvatiya matçında da favoritin İspaniyadır?

- Bəli, düşünürəm ki, ispanlar qələbəyə daha yaxındır. Lakin Xorvatiyanın da qrupdan çıxmaq şansı var.

- Ancaq İtaliyanın da İrlandiya önün də favorit olduğunu vurğuladın. İtaliya ilə İspaniya bu gün qələbə qazanacağı halda, Xorvatiya qrupdan çıxa bilməyəcək axı...

- Ancaq İtaliya da hələ İrlandiyanı məğlub etməyib.

- Deməli, irlandlardan da sürpriz gözləməyinə dəyər?

- Mümkündür. Çünki son tur olduğundan onlar da qapını möhkəm çırpmaq istəyəcək. Bundan başqa, mən ispanların xorvatları məğlub edəcəyini mütləq olaraq demədim. Prinsipcə, Xorvatiya İspaniyanı qrupda saxlaya bilər.

- Ümumiyyətlə, turnirdəki favoritin kimdir?

- İspaniya.

- Necə düşünürsən, hansı futbolçu bu çempionatın ulduzu olacaq?

- Kriştiano Ronaldonun adını çəkə bilərəm. Şevçenkonu da qeyd etmək olar. O cümlədən Qomez və Torresi də unutmaq olmaz.

- Ancaq Şevanın turnirin oyunçusu olması üçün Ukraynanın qrupdan çıxması lazımdır...

- Ola bilsin Ukrayna bunu bacardı. Son turda onlar ingilislərlə oynayacaqlar. İngiltərə də pis komanda deyil. Üstəlik, mən bildiyimə görə, Şevçenkonun zədəsi var və o, bu oyunu buraxa bilər. Əgər bu baş versə, Ukrayna üçün çox böyük itki olacaq.

- İngiltərə-Ukrayna matçında favoritin kimdir?

- Bu oyunun favoriti İngiltərədir.

- Sənin də şərəfini qoruduğun Litva millisini nə vaxtsa Avropa və dünya çempionatlarının final mərhələsində görə biləcəyik? Nəzərə alaq ki, bir neçə il bundan qabaq seçmə mərhələyə çox yaxşı start götürdünüz, ilk 3 tura 9 xal topladınız, səfərdə Rumıniya kimi komandanı 3:0 hesabıyla məğlub etdiniz. Ancaq sonradan bu uğurun davamı gəlmədi...

- Şans elə şeydir ki, həmişə var. Ancaq reallığa uyğun danışmaq lazımdır. Bu gün Litva milisinin bu cür mötəbər turnirlərə vəsiqə qazanması üçün çox şey dəyişməlidir. Litvada bir dənə də olsun normal stadion yoxdur. Milli komandanın ev oyunlarını keçirdiyi arenan pis vəziyyətdədir. Bu cür şəraitdə Avropa çempionatına vəsiqə qazanmaq mümkün deyil. Dəyişikliklər olarsa və iş düzgün qurularsa, siz deyənlər də reallaşa bilər. Necə ki, Latviya millisi Avro-2000-ə vəsiqə qazanmışdı.


Anar XANLAROV