Berti Foqts: “Texniki və taktiki cəhətdən yaxşı hazırlaşmışıq”

Azərbaycan yığmasının baş məşqçisi Berti Foqts Avstriya ilə AÇ-2012-nin seçmə mərhələsi çərçivəsində sabah keçiriləcək oyundan qabaq bu gün mətbuat konfransı keçirib. Qol.Az-ın məlumatına görə, almaniyalı mütəxəssis problemlərdən şikayətlənsə də, səfərdən xalla dönmək arzusunda olduqlarını gizlətməyib.
- Komandamın hazırlığı barəsində nəsə danışmaq istəmirəm. Nəyə görə oyun qabağı sirrlərimi açım?!
- Ruslan Abışovun sağalmasını nəzərə alsaq, heyətdə hansı dəyişikliklər baş verəcək?
- Ruslan zədədən qayıdandan sonra cəmi 20 dəqiqə oynayıb. Bu çox azdır. Məni Maksim Medvedyevin yoxluğu narahat edir. Onun böyük potensialı var. Qarşımızda məğlub olmamaq vəzifəsi durur. Əgər rəqib bizə oynamağa imkan versə, biz lazımi nəticəni əldə edə bilərik.
- Nəyə görə üçüncü qapıçı olaraq məhz Aqil Məmmədov çağırılıb?
- O, yaxşı göstəricilərə malikdir. Həmçinin Səlahət Ağayev zədəlidir. Gəncləri cəlb etmək lazımdır.
- Almaniya ilə oyundaki 1:6 hesablı məğlubiyyətdən sonra Avstriyada məğlub olmamaq haqqında danışmaq nə dərəcədə düzgündür?
- Bizim komandamız gəncdir. Biz nəticə istəyirik. Unutmayın ki, avstriyalılara qarşı oynayırıq və cəmi dörd gündən sonra Bakıda Türkiyə ilə qarşılaşmamız var. Futbolçularımın ərksəriyyəti Azərbaycan çempionatında çıxış edir və onlar gərgin oyun qrafikinə öyrəşməyib. Lakin texniki və taktiki cəhətdən yaxşı hazırlaşmışıq.
- Nəticə əldə etmək üçün hücum futbolu oynamaq lazımdır. Deməli bu dəfə komanda Kölndəki kimi oynamayacaq?
- Deməzdim ki, biz yalnız hücumda oynayacayıq. Avstriya ciddi bir rəqibdir. Qazaxıstan üzərində əldə olunan çətin qələbədən sonra onlar bizə qarşı ciddi yanaşacaq. Arxayınçılıq olmayacaq. Mən bunu ona görə deyirəm ki, Avstriya mentalitetinə bələdəm. Yığmanın böyük problemlərindən biri – buraxılan qollardan sonra komanda sona qədər oynamır. Bununla bağlı gənc futbolçuları tənqid edə bilmərəm. Mən təcrübəyə əsaslanıram. Məhz təcrübəli oyunçular gəncləri "oyatmalı", lazım gələndə isə danlamalıdır ki, komanda özünə gəlsin. Əminəm ki, Almaniya ilə ilk yarının son dəqiqələrində iki top buraxmasaydıq, ikinci hissədə rəqib böyük çətinliklərlə üzləşəcəkdi.
- Avstriyada kiminlə dostluq edirsiniz?
- Baş məşqçi və ölkənin federasiyasının prezidenti ilə tanışam. Yadımdadır, DÇ-1982-də bir hadisə baş verdi. O zaman AFR və Avstriya minimal hesablı (1:0) qələbə haqqında razılaşdılar ki, bu da Əlcazair komandasını ikinci mərhələyə çıxmağa imkan vermirdi. Bu oyundan sonra mən Almaniya yığmasını tərk etdim. Bundan sonra isə komanda daha yaxşı oynamağa başladı. Ümumiyyətlə mənim çoxlu dostum var. Lakin cümə günü onları məyus etmək istəyirəm.
- Əgər Vyanada siz uğur əldə edə bilsəniz, bu həmkarınız Didi Konstantinin işinə son qoya bilər...
- Mən məşqçilərin istefaya göndərilməsi ilə məşğul olmuram. Mənim işim öz kollektivimin işinə baxmaqdır. Həmçinin həmkarımın işini təhlil etmək istəmirəm.