Nail Əliyev: “Mən “Bakı”nın işinə qarışmıram”

ÖLKƏ FUTBOLU 24 Sentyabr 2010 / 18:21 2413

- A +

“AFFA və PFL-in təşkil etdiyi dünənki tədbirə üzrlü səbəbdən qatıla bilməmişdim. Çünki qonaqlarım olduğundan buna vaxt tapa bilmədim”. Bu sözləri Qol.Az-a açıqlamasında “Bakı”nın keçmiş vitse-prezidenti Nail Əliyev deyib.
Son vaxtlar mətbuatda görünməyən “zolaqlılar”ın sabiq rəsmisi, hazırda “Toplu Bakı” jurnalının baş redaktoru olan Nail Əliyev bunun səbəbini də izah edib: “Düzü, başım oğlumun təhsili ilə bağlı işlərə qarışmışdı. Artıq iki ay idi ki, bununla əlaqədar Türkiyədə idim. Onun universitetə qəbulu, yerləşməsi ilə şəxsən məşğul oldum. Ölkəyə yenicə qayıtmışam. Hardasa bir həftə olar”.
Paytaxt klubunun keçmiş rəsmisinə “Bakı”nın hazırkı çıxışı haqda münasibət öyrənmək istəsək də, Nail Əliyev bu haqda ətraflı danışmaq istəmədiyini bildirdi: “Vallah, “Bakı”nın son oyununu avrokuboklardakı çıxışı zamanı görmüşəm. İndi bu komandanın işinə qarışma istəmirəm. Ondan sonra bu komandanın oyununu izləmək imkanım olmayıb. Yenə deyirəm, iki aydır artıq burda yox idim. Ona görə də keçmiş komandamın hazırda nə gücdə olduğu haqda təsəvvürüm yoxdur. “Toplu Bakı” haqda nə sualınız varsa, buyurub, verə bilərsiniz”.
“Bakı”nın hazırda heç də yaxşı günlərini yaşamadığını və milli çempionatda da uğursuz çıxış etdiyini vurğuladıqda isə, Nail Əliyev bunları söylədi: “Komandaya baş məşqçi gətirilib, indi Vinfrid Şeferin işinə nə Hafiz Məmmədov, nə Zeynal Məmmədov, nə də mən qarışıram. Hər şey ona həvalə olunub, bütün nəticələrə də almaniyalı cavabdehdir. İndi nəticələrin niyə belə olduğuna da ən yaxşı cavabı Şefer özü verə bilər”.
Milli komandamızın AÇ-2012-nin seçmə mərhələsinə uğursuz başlamasına da münasibət bildirən Əliyev Berti Foqtsu hədəfə alıb: “Komandamızın Almaniya ilə oyunu sadəcə biabırçılıq idi. Ona başqa ad verə bilmirəm. Ümumiyyətlə mənə çatmır ki, ona o qədər pulu havayıdan niyə verirlər? 400-500 min vermək olardı. Daha bu qədər yox da. Həmin pula ölkə futboluna daha böyük xeyir verən stadionlar tikmək, infrastrukturu yaxşılaşdırmaq olardı. Sumqayıtın, Gəncənin itib-batmaqda olan stadionlarına xərcləsinlər, uşaq futboluna, bölgə futbolunun inkişafına diqqət yetirsinlər. Nəyə lazımdı axı Foqtsa görə bu qədər pulu çölə atmaq? Vallah istənilən yerli məşqçi ondan daha çox xeyir verərdi milliyə. Gedib oturub Almaniyada, boş yerə pulumuzu havaya sovururuq. Azərbaycana kefi istəyəndən-istəyənə gəlir. O qədər pul alırsa, heç olmasa, iş görsün də. Yeni məşq sistemi, üslubu olsaydı, dərd yarıydı. O, yığmanı uçuruma aparır. Almaniya ilə oyun da göstərdi ki, Foqtsa vaxt verməyin heç bir əhəmiyyəti yoxdur. Onsuz da ondan bizim milliyə bir xeyir dəyməyəcək”.

Daha çox