Bir az dərindən düşünsək...

Bir az dərindən düşünsək...
YAZARLAR 14 May 2018 / 11:31 5912
-  A +

Əzizim Aydın, çoxdan bəri məni düşündürən bu qeydləri Məhəmməd Salah barədə sənin feysbuk statusundan sonra yazıram.

Sən bu gəncin barəsində (1992-ci il iyunun 15-də anadan olub, yəni hələ 26 yaşı olmayıb) Çempionlar Liqasının “Roma” ilə ilk yarımfinal oyunundakı çıxışından sonra yazmışdın və hətta məsələni belə də qoymuşdun: yəni indi dünya futbolunda Salahdan güclü müsəlman futbolçu varmı? Bu suala futbolçunun özü həmin yarımfinal görüşündən sonrakı dörd rəsmi matçda bircə yüzfaizli qol vəziyyəti yaratmamaqla və ya onun üçün yaradılmış fürsətləri boşa verməklə cavablandırdı: demədi ki, düşündüyün futbolçudan yoxdur; dedi ki, sual hələ çox tez verilib, onu cavablandırmaq üçün hələ minimum 1(BİR) il də gözləmək lazımdır. Söhbət heç də qol vurub-vurmamaqdan getmir, əsil oyunçu keyfiyyətlərindən, bu keyfiyyətlərə malik olub-olmamaqdan gedir. Məncə indiki halda Salahda – becid start sürətindən savayı -  bu keyfiyyətlər  hələ çatışmır.

Dünya futbolunun tarixi sübut edir ki, bütün dahi futbolçular fenomen olduqlarını məhz 25-26 yaşdan sonra təsdiqləyirlər. O vaxta qədər bütün vunderkindlər elə vunderkind olaraq qala bilirlər. Ən azı, mən bu 68 yaşımda belə görmüşəm. Yaddaşım bir az mənə vəfasızlıq edir və mən indi konkret soyadlar xatırlaya bilmirəm... Amma biri yadıma düşdü – Anatoli Banişevski. Onu da xatırlayıram ki, 25-30 yaşlı Banişevski heç cür 18-20 yaşlı Banişevski deyildi və ola da bilmədi...



Salaha qayıdıram. Bu adam keçən il “Roma”da oynayırdı və təcrübəli Luçano Spalletti əksər oyunlarda hücumda  Edin Ceko ilə yanaşı ona və Stefan Şaaraviyə bel bağlayırdı. Çempionatın yekunu belə oldu: Ceko – 37 oyunda 29 top; Şaaravi – 32 oyunda 8 top; Salah – 31 oyunda 15 top. Əslində, Salahın göstəriciləri o qədər də pis deyil, amma indiki göstəricilərindən xeyli geri qalır. Bunun başlıca səbəblərindən biri ümumiyyətlə oyunçuya məşqçinin münasibətindən asılıdır, daha doğrusu, onu hansı mövqedə oynatmasından asılıdır. İndi “Liverpul”da Salah ona həvalə olunan missiyanı “Roma”da əldə etməmişdi. Premyer-liqanın ilk 10 turunda mərkəz hücumçusu (qoleador) mövqeyinə D.Starriclə F. Koutinyo da (sonradan bu iki futbolçu müxtəlif səbəblərə görə “Liverpul”u tərk edib) şərik idi, buna görə həmin 10 oyunda Salah cəmi 5 top vurmuşdu və təbii ki, liderliyə də iddialı deyildi.
Mənim fikrimcə, Salah həqiqətən tərifəlayiq əvəzsiz futbolçu olduğunu o halda sübut edər ki, məsələn, transfer olunacağı “Real”da,”Barselona”da və ya başqa bir komandada builki oyununu göstərə bilsin. Tək olanda, komanda ona oynamayanda Salah gizli potensiallı oyunçu olaraq qalır. Bunu elə indiki dörd oyun da göstərir...

P.S. Mən bu qeydləri çox əsəbi başladım, amma klaviaturda hərfləri dənə-dənə axtarıb tapıb taqqıldadanda əsəbiliyim də getdi. Ancaq əsas dediyim fikir qaldı: istənilən futbolçu, o cümlədən Salah barədə müəyyən mərhələdən sonra fikir yürütmək daha düzgün olar...

Şakir YAQUBOV


Son xəbərlər
27.03.24  21:58

Keyn sağaldı