"İstərdim ki, bizə hörmət olunsun"

"Rəvan" klubunun müdafiəçisi Cəmşid Məhərrəmov Azərbaycan kubokunun yarımfinal mərhələsinin "Neftçi" ilə ilk oyunundan (1:1) sonra Qol.Az saytının suallarını cavablandırıb.

- "Neftçi" ilə matç haqda ümumi fikirlərini bilmək istərdik.

- Neçə gündür ki, oyuna ciddi hazırlaşırdıq. İlk hissədə istədiyimiz alınmırdı. Ancaq ikinci hissədə tam fərqli oyun nümayiş etdirdik. Qələbə qazanmaq istəyirdik. Ancaq qol vurmaqla yaxşı nəticə əldə etdik.

- Oyundan qabaq hansı nəticəyə ümid edirdiniz?

- Əsas məqsədimiz o idi ki, "Neftç"nin meydanında qol vuraq. "Qəbələ" "Xəzər Lənkəran"ı 3:0 hesabı ilə məğlub etdi. Əgər "Xəzər Lənkəran" qol vurmağı bacarsaydı, cavab görüşü üçün işini xeyli asanlaşdırardı. Yəni rəqib meydanında vurulan qolun əhəmiyyətini qeyd etmək istəyirəm. Düzdü, final çıxmaq işinin bir hissəsini rəqib meydanında görmüşük. Ancaq bununla iş bitmir. Öz meydanımızda uğurun ardını gətirməliyik. İnanıram ki, finala çıxacağıq.

- Düşünürsən ki, rəqib "Neftçi" olsa belə, 1:1 hesablı nəticə finala çıxmaq şansınızı artırır?

- Bəli, üstünlüyümüz var. İlk oyunun nəticəsi bizi çox sevindirdi. Son dəqiqədə vurulan qolun önəmi böyükdür. Var qüvvəmizlə çalışdıq və sonda istəyimizə nail olduq. Belə anlarda insan sevincini boğa bilmir. Ancaq bu, o demək deyil ki, finala çıxmışıq. Sadəcə, "Neftçi"nin meydanında istədiyimiz nəticəni əldə etdik.

- "Neftçi" futbolçuları açıqlamalarında turu keçəcəklərindən əminliklə danışıblar.

- Kim nə danışırsa, özü bilər. Bütün fikirlərə hörmətlə yanaşıram. Heç bir cavab da vermək istəmirəm. Sadəcə onu deyirəm ki, hər şeyə ikinci oyunda aydınlıq gələcək. Tək "Neftçi" futbolçuları yox, bir çoxu, elə mətbuat özü də gözləmirdi ki, "Rəvan" bu mərhələyə qədər gəlib çıxacaq. Ancaq hamı görür ki, komandanın uğur qazanması üçün "Rəvan"da hansı işlər görülür. "Rəvan"ın gələcəyi üçün klub rəhbərliyi böyük zəhmət çəkir. Hər halda bura qədər gəlmişiksə, bizə bu cür yanaşmaq lazım deyil. İstərdim ki, "Rəvan"a da hörmət olunsun. Mətbuat yarımfinala çıxmağımızı sürpriz kimi qələmə verir. Bu, niyə sürpriz olmalıdır ki? Finala çıxaq belə, sürpriz sayılmamalıdır. "Rəvan" klubunun rəhbərliyi də komanda üçün vəsait xərcləyir və bunun bəhrəsini görmək istəyir. Gərək bütün azarkeşlər və mətbuat da bizə dəstək olsun. Hamımızın işi futbolla bağlıdır. Siz yazırsnız, biz oynayırıq, klub rəhbərliyi də sərmayə qoyur.

- Cavab görüşündə qolsuz heç-heçə finala çıxmağınız üçün yetərlidir. Buna görə də sırf müdafiə futboluna üstünlük verəcəyinizi gözləmək olar?

- Baş məşqçimiz açıq futbola üstünlük verməsə də, öz taktikası var. Yəqin ki, ilk oyunun nəticəsini nəzərə alıb, müvafiq bir taktika ilə oynayacağıq. Hər bir rəqibə qarşı müxtəlif oyun üslubundan istifadə edirik.

- Komandanızın işi çempionatda yaxşı getmir. Həttə "Rəvan" Premyer Liqanı tərk etmək təhlükəsi ilə üzləşib.

- Biz bir qədər rahatlamışdıq. Həm də kubok oyununa həddindən artıq köklənmişdik. Sanki çempionat oyunlarını unutmuşduq. Ancaq AFFA-nın verdiyi son qərardan sonra çalışırıq ki, xallarımızı artıraq. Güclülər dəstəsində qalmağımız vacibdir. Kubokda bu qədər irəliləmişiksə, deməli, elitada qalmaq gücünə malikik.  

Ramiq AĞAMƏMMƏDOV