Azərbaycanlı futbolçular hansı aparıcı çempionatlara transfer oluna bilərlər

İdman Araşdırmalar Mərkəzi azərbaycanlı futbolçuların aparıcı çempionatlarda oynama perspektivləri ilə bağlı araşdırma aparıb. Araşdırma nəticəsində legioner həyatı yaşamaq baxımından, ən asan və ən çətin liqalar müəyyənləşib.

Hazırda azərbaycanlı futbolçulardan aparıcı ölkələrin yüksək liqasında yalnız Ruslan Abışov çıxış edir. Milli komandamızın üzvü ötən mövsümün qış transfer dövründə Rusiyanın “Rubin” klubu ilə müqavilə bağlayıb. Lakin o, cəmi 1 oyunda “ilk 11-liy”ə düşə bilib. Son illərdə Vaqif Cavadov Hollandiya “Tvente”sində, Rəşad Sadıqov Türkiyənin “Kayserispor”, “Kocaelispor” və “Eskişehirspor” klublarında qısa müddətli legioner həyatı yaşayıb.

Hazırda “Neftçi”də çıxış edən Araz Abdullayev isə 2011-ci ilin yanvarında İngiltərənin “Everton” klubu ilə müqavilə bağlasa da, 1 oyunda da meydana çıxa bilməyib. Səbəb kimi millimizdə az oyun keçirməsi səbəbindən İngiltərədə ona işçi vizasının verilməməsi göstərilib. Hətta çoxlu sayda futbolçumuz aparıcı çempionatlarda oynamağa hazır vəziyyətdə olsa belə, legioner limiti üzündən əcnəbi klublara transferlərində problem yarana bilər. Bu baxımdan, oyunçularımız üçün hansı çempionatın münasib olduğu maraq doğurur. 2012-2013-cü il mövsümünün yekunlarına əsasən, UEFA reytinqində ilk 10 pillədə yer alan ölkə çempionatlarındakı legioner limiti belədir:  

1. İspaniya: Mövsüm üçün sifariş edilən 25 futbolçudan 3-ü qeyri-Avropa Birliyi ölkəsindən ola bilər. Bununla yanaşı, Avropa Birliyi İqtisadi Əməkdaşlıq Müqaviləsinə imza atan ölkələrin (məsələn, Türkiyənin) futbolçuları legioner statusunda sayılmırlar.

2. İngiltərə: Legioner limiti yoxdur. Avropa Birliyinə daxil olmayan futbolçular isə işçi vizası almalıdırlar.

3. Almaniya: Legioner limiti yoxdur

4. İtaliya: Legioner limiti yoxdur. Lakin klublar bir mövsüm ərzində Avropa Birliyi xaricindən 2 transfer edə bilərlər.

5. Portuqaliya: Legioner limiti yoxdur

6. Fransa: Start heyətində Avropa Birliyindən kənar ölkələrdən 3 futbolçu oynaya bilər. Fransanın keçmiş müstəmləkələrindən gələn futbolçular isə legioner sayılmırlar.

7. Ukrayna: Meydanda 7 əcnəbi oyunçu yer ala bilər.

8. Rusiya: Meydanda 7 əcnəbi oyunçu yer ala bilər

9. Hollandiya: Legioner limiti yoxdur

10. Türkiyə: 2013-2014-cü il mövsümündə komandalar heyətlərində cəmi 10 əcnəbi saxlaya bilərlər. Oyun vaxtı onlardan 6-sı meydana, 4-ü isə tribunaya çıxmalıdır. 2014-2015-ci il mövsümündə isə komandalar heyətlərində cəmi 8 əcnəbi oyunçu saxlaya biləcəklər. Oyunlar vaxtı onlardan 5-i meydanda, 3-ü isə tribunada yer alacaq.

Göründüyü kimi, azərbaycanlı futbolçuların Almaniya, Portuqaliya və Hollandiya klublarına transferlərində heç bir problem yoxdur. Türkiyə Superliqasında çıxış etmək Ukrayna və Rusiya Premyer liqalarında oynamaqdan daha çətindir. Əvəzində qardaş ölkənin I liqasında türkdilli ölkələrdən olan futbolçulara legioner limiti şamil olunmur. Bu isə azərbaycanlı oyunçuların transferlərində müəyyən canlanmaya səbəb olub. Azərbaycan Avropa Birliyinə üzv ölkə sayılmadığından, İngiltərə, İspaniya, İtaliya və Fransa çempionatlarına transferlər zamanı müəyyən problemlər yarana bilər. Bunlardan nisbətən asanı İngiltərə Premyer Liqasıdır. Qalan 3 çempionat arasında isə transfer baxımından ən çətini İtaliya A seriyasıdır. Baxmayaraq ki, bu ölkənin yüksək liqasında legioner limiti yoxdur.

Qeyd edək ki, Azərbaycanın futbol çempionatlarından Topaz Premyer Liqasında klublar start heyətində 7 əcnəbinin xidmətindən yararlana bilərlər. Qalan 4 yerli oyunçudan 1-inin yaşı 21-dək olmalıdır. Amma sifariş ərizələrində legioner sayına heç bir məhdudiyyət qoyulmur. I divizionda isə 2013-2014-cü il mövsümündə klublar start heyətində yaşı 21-dək olan 8 oyunçunun xidmətindən yararlana biləcəklər.