"Fənərbaxça" 18 qat Türkiyə çempionu oldu! (YENİLƏNİB)

Superliqada 2010-2011-ci il mövsümünün qalibi son turda müəyyənləşib. Qol.Az-ın məlumatına görə, 34-cü turadək eyni xala malik "Fənərbaxça" ilə "Trabzonspor" mübarizə aparıblar. 

Həlledici qarşılaşmalarda da hər iki komanda qələbə qazanıb. Lakin daha üstün göstəricilərə malik "Fənərbaxça" 3 ildən sonra çempionluğa nail olub. Bu, "sarı-lacivərdlilər"in son 10 ildə 5-ci, ümumilikdə isə 18-ci çempionluğudur. Beləliklə, "Fənər" çempionluq sayında "Qalatasaray"ı geridə qoyub. Aykut Kocamanın komandası birbaşa Çempionlar Liqasının qrup mərhələsinə vəsiqə qazanıb. "Trabzonspor" isə gümüş medalla kifayətlənib. Çempionatın bombardiri adına da "Fənər"li futbolçu Aleks de Souza layiq görülüb. 28 qol vuran Aleks Superliqada ikinci dəfə ən məhsuldar hücumçu olub. 
 
Ötən gün isə daha 4 görüş keçirilib. 2009-2010-cu il mövsümünün qalibi "Bursaspor" "Gənclərbirliyi" üzərində minimal hesablı qələbə sayəsində bürünc medala sahib olub. Sonrakı iki yeri "Qaziantepspor"la "Beşiktaş" tutub. Onların öz aralarındakı görüşdə hesab açılmayıb. Bununla da "Bursaspor", Qaziantepspor" və Türkiyə Kubokunun sahibi kimi "Beşiktaş" Avropa Liqasına vəsiqə qazanıb.

34-cü tura mayın 20-də 2 oyunla start verilib. Mövsümü son dərəcə uğursuz keçirmiş "Qalatasaray" klubu autsayder "Konyaspor"u qəbul edib. "Cim-Bom" cəzası üzündən "Türk Telekom Arena"dakı oyunu azarkeşsiz keçirib. Bununla belə, meydan sahibləri qələbəyə nail olublar. Oyunun əvvəllərində Kazım Kazım-Riçard və Xuan Emmanuel Kulionun vurduğu qollar yekun nəticəni müəyyənləşdirib - 2:0. Beləliklə, "Qalatasaray" 46 xalla 7-ci pilləyə yüksəlib. Lakin turnir cədvəlində sonrakı komandalar oyunlarını qarşıdakı günlərdə keçirəcəklərindən, "sarı-qırmızılar"ın mövqeyində dəyişiklik baş verə bilər. 

Günün digər qarşılaşmasında "İstanbul BB" "Manisaspor"un müqavimətini qıra bilməyib. Oyun qolsuz başa çatıb.
 
Türkiyə çempionatı, 34-cü tur

20 may

22:00. "Qalatasaray" - "Konyaspor" - 2:0
Qollar: Kazım Kazım-Riçard, 11. Xuan Emmanuel Kulio, 15

22:00. "İstanbul BB" - "Manisaspor" - 0:0

21 may

18:00. "Ankaragücü" - "Antalyaspor" - 2:3
Qollar: Yan Raynox, 47. Roman Bednar, 56 - Tita, 3. Necati Atəş, 14; 44-pen. 
Qırmızı vərəqə: Stanislav Şestak, 87 ("Ankaragücü") 

18:00. "Bucaspor" - "Kayserispor" - 3:3
Qollar: Viktor Mendi, 15. Abdul Özgen, 50. Mehmet İncəbacak, 58 - Mehmet Ərən Boyraz, 8. Conatan Santana, 12. Andre Fransisko Morits, 80

22:00. "Qaziantepspor" - "Beşiktaş" - 0:0
Qırmızı vərəqə: Əkrəm Dağ, 90 ("Beşiktaş")

22:00. "Bursaspor" - "Gənclərbirliyi" - 1:0
Qol: Volkan Şən, 32

22 may

17:00. "Eskişehirspor" - "Kasımpaşa" - 4:0
Qollar: Sərdar Özbayraktar, 5; 80; 85. Angelo de Oliveyra Dieqo, 60 

22:00. "Karabükspor" - "Trabzonspor" - 0:4
Qollar: Egemen Korkmaz, 18. Jaja, 57. Umut Bulut, 60; 73

22:00. "Sivasspor" - "Fənərbaxça" - 2:4
Qollar: Yakub Navratil, 20. Ərman Kılıç, 65; 90 - Andre Santos, 6. Səlçuk Şahin, 41. Aleks, 51. Yozef Yobo, 67