Qurban Qurbanov: «Foqtsla məni qarşı-qarşıya qoyursunuz»

ÖLKƏ FUTBOLU 20 Noyabr 2010 / 12:43 2346

- A +

«Qarabağ»ın baş məşqçisi Qurban Qurbanov bir neçə gün əvvəl milli komandamızın baş məşqçisi Berti Foqtsun səsləndirdiyi fikirlərə münasibət bildirib. Qeyd edək ki, Foqts keçirdiyi mətbuat konfransında bir məşqçinin onunla söhbətində milliyə oyunçu verməkdən qürur duyduqlarını, amma onun mətbuatda başqa fikirlər səsləndirdiyini deyib.
Son vaxtlar «Qarabağ»ın dekabr ayında keçiriləcək millinin təlim-məşq toplanışına futbolçularını buraxmaq istəməməsi məsələsi gündəmə gəldiyindən bəzi mətbuat orqanları Foqtsun Qurban Qurbanovu nəzərdə tutduğunu iddia edib.
Gənc mütəxəsis özü isə məsələylə bağlı «Futbol +» qəzetinə açıqlamasında bunları söyləyib: «Nə bilirsiniz, bəlkə məni işarə vermir? Mən heç kimi nə tərifləyir, nə də pisləyirəm. Belə fikrim də yoxdur. Əksinə, biz çalışırıq ki, millimiz üçün futbolçu yetişdirək. Yığmaya oyunçu vermək hər kəsin borcudur. Biz də ələmizdən gələn qədər oyunçu veririk. Yenə də heç kimin işini pisləmirəm, nə də əvvəl bir söz, sonra tam başqa fikir səsləndirmirəm. «Bakı» ilə oyundan sonra futbolçuların milliyə getməsinin oyunumuza təsir etdiyini demişəm. Hər yerdə olduğu kimi, rəhbərlik məndən yaxşı nəticə tələb edir».
Q.Qurbanov bir daha təsdiqləyib ki, ötən tur uduzduqları «Bakı»yla oyuna yaxşı səviyyədə hazırlaşa bilməyiblər: «Bu cür problemlər bir neçə dəfə olub. Hətta indi də bu haqda danışırıq. Üstəlik, legionerlərimiz - Telli ilə Aqoli də öz yığmalarına getmişdi. İstər-istəməz AZAL-la oyuna da yaxşı hazırlaşa bilmirik. Belə hallar oyunumuza təsir edir. Biz də bunları nəzərə alaraq AFFA-ya müraciət edəcəyik ki, imkan daxilində komandanın dekabrdakı toplanışında oyunlara normal hazırlaşa bilək. Son 15-20 gündə futbolçularım, demək olar ki, 4-5 dəfə sərəncamımda olub».
Qurban Qurbanov milliyə qarşı çıxmaq, ora oyunçu vermək fikrində olmaması bağlı iddiaları rədd edib. «İndiyə kimi milliyə oyunçu yetişdirməyə çalışmışam. Amma dediyim bir kəlmə problemə çevrilib. Demək olar, hər gün mənə eyni suallar verilir. Foqts belə dedi, Qurban belə dedi. Burda şişirdiləsi nə var ki? Nə vaxt milliyə oyunçu verməmişəm, yaxud «getməyin» demişəm? Fikrimcə, ciddi nəsə yoxdu axı. Sadəcə, bu amillərin rol oynadığına dair fikirlərimi bildirmişəm. O ki qaldı məğlubiyyətləri millinin və Foqtsun boynuna atmağa, belə söz çıxıbmı ağzımdan? Mövzu böyüdülüb, elə yerə çıxarılıb ki, Foqtsla məni qarşı-qarşıya qoyursunuz. İkincisi də, heç kimin üzünə bir söz deyib, arxasınca danışmıram. Belə fikrim də yoxdu. Son vaxtlar Foqtsla görüşməyim yadıma gəlmir».

Daha çox