"Şansımız varsa, niyə də çempion olmayaq?"

"İnter" klubunun qapıçısı Səlahət Ağayev Qol.Az saytına müsahibəsində Premyer Liqamızın 34-cü turunda "Qarabağ"la keçiriləcək vacib qarşılaşma haqda danışıb.

- İki gündən sonra "Qarabağ"la çox mühüm bir oyuna çıxacaqsınız. Bu görüş haqda fikirlərini bilmək istərdik.

- Oyunun necə çətin olacağı hamıya məlumdur. Bu görüş bizə də "Qarabağ" qədər  vacibdir. Qalib gəlsək, çempionluq şansımız artacaq. Ümumi olaraq onu deyə bilərəm ki, çox maraqlı və gərgin oyun olacaq.

- Qış fasiləsindən sonra komandanız inamla irəliləyir. Bu müddət ərzində "İnter" yalnız "Qarabağ"a uduzub. Budəfəki qələbə isə "Qarabağ"a çempionluğu qazandıra bilər.

- Ümumiyyətlə, bu mövsüm hər üç görüşdə "Qarabağ"a uduzmuşuq. Ancaq hazırda komandamız daha güclüdür. Mövsümün əvvəli ilə müqayisədə hər bir futbolçumuz xeyli artırıb. Çempionatın sıx qrafiklə keçirilməsi bütün komandalarda olduğu kimi bizdə də özünü göstərdi. Bu dəfə "Qarabağ"a məğlub olmaq fikrimiz yoxdur. Ancaq "Qarabağ" qələbə qazanaraq çempion ola biləcəyini nəzərə alanda qarşılaşmanın nə qədər çətin keçəcəyini təsəvvür etmək olar.

- Artıq dörd ildir ki, "İnter" "Qarabağ"a qalib gələ bilmir. Səncə, bu komandaya qarşı komandanız nədə çətinlik çəkir?

- Bunun səbəbini dəqiq deyə bilmərəm. Bəlkə də hər iki komanda eyni üslubda oynadığından "Qarabağ"a qarşı oyunumuz alınmır. Düzdü, bir neçə ildir ki, "Qarabağ"la görüşlərin çoxunda məğlub oluruq. Çalışacağıq ki, bu sindromu aradan qaldıraq.

- "Qarabağ"ın son turlarda büdrəməsi çempionluq ümidinizi artırıb, yoxsa bu, çətin görünür?

- Əlbəttə, çempionatın ilk dövrələrində heç Avroliqaya da düşməyə ümidimiz yox idi. Ancaq sonradan komandamız formalaşdı. Heyətə yeni qoşulan futbolçular da bizə xeyir verdi. Son turlarda isə oyunlarımız daha yaxşı alınır. Hazırda ikinci yerdəyik, ancaq çempionluq şansımız da var. "Qarabağ"la oyundan sonra hər şey bəlli olacaq.

- Hər halda "İnter"in hardan-hara gəldiyini nəzərə alsaq, ikinci yer də komandanız üçün pis nəticə sayılmamalıdır.

- Bəli, ikinci yer də bizim üçün böyük uğurdur. Ancaq şansımız varsa, niyə də çempion olmayaq?

- Mövsümün ortalarında "İnter"i tərk etmək istədiyini bildirmişdin. Artıq mövsüm başa çatmaq üzrədir. Hazırda fikrin nədir? 

- Düzdü, oynamağa görə komandamı dəyişmək istəyirdim. Ancaq sonradan əsas heyətdə yer aldım. "İnter"lə müqaviləm başa çatmaq üzrədir. Məndən başqa komandamızda bir neçə aparıcı futbolçunun da sözləşməsi mayda sona çatır. Ancaq hələlik klub tərəfindən heç kimlə danışıq aparılmayıb. Yəqin ki, sona bir tur qalmış danışıqlar başlayar. "İnter"dən müqaviləmi uzatmaqla bağlı bir dəfə təklif almışam. Ancaq hazırda məsələ ilə bağlı heç bir danışıq aparmırıq.

- Komandanız artıq ən azı Avroliqaya vəsiqəni təmin edib. Yəqin ki, "İnter"in heyətində Avropaya getmək istəyirsən.

- Fubola "İnter"də başlamışam. Ona görə də elə bu komandada qalmaq fikrim var. Təbii ki, bunun üçün ilk növbədə klubumdan təklif gəlməlidir.

Ramiq AĞAMƏMMƏDOV