Qarabağ bizimdi! (KÖŞƏ YAZISI)

"Qarabağ"ın oyununu heç bir telekanalımızın göstərməməsinə çox üzüldük. Bundan dolayı matçdan öncə "Qarabağ bizimdi?" sərlövhəli yazımda bir sıra ritorik suallar vermişdim. Bunlardan birini "Qarabağ"ın Avropada iştirakı bizə bəsdi, bundan böyük təbliğat ola bilməz" deyən, amma Tronheymdəki matçın yayınlanmasına gələndə 10 min avroya görə milyonlarla azərbaycanlını həsrətdə qoyanlara ünvanlamışdım. Həmin sual "Qarabağ bizimdi?" idi.

"Qarabağ" dünənki oyunu ilə bir çox vacib suallara aydınlıq gətirdi. İlk növbədə "azərbaycanlılar futbol oynaya bilmir" deyib klubları və millini səviyyəsiz legionerlərlə dolduranların cavabını verdilər. Onlar inanmasa da, bir daha vurğulayaq ki, "Qarabağ"ın heyətində cəmi 1 legioner vardı. "Qarabağ"ın baş məşqçisi də azərbaycanlı idi! Bəli, "Qarabağ"ın futbolçuları Avropanın tanınan klublarından birinə qarşı KİŞİ KİMİ, ERKƏK KİMİ mücadilə etdi! Bu futbolçuları, bu futbolçuların mənsub olduğu milləti aşağılayanların və bundan sonra aşağılamaq istəyənlərin adları ERKƏK FUTBOLUNDA deyil, ən yaxşı halda EŞŞƏK FUTBOLUNDA çəkiləcək! Amma "Qarabağ"ın milyonlarla azərbaycanlıya bəxş etdiyi sevincdən dolayı bu gün sadəcə, onlardan - ERKƏK FUTBOLÇULARDAN danışacam. Əvvəlcə bir daha onların adını qeyd edim: FƏRHAD VƏLİYEV, RƏŞAD SADIQOV, ASLAN KƏRİMOV, ELNUR ALLAHVERDİYEV, MAKSİM MEDVEDEV, ADMİR TELİ, ELVİN MƏMMƏDOV, EMİN İMAMƏLİYEV, RƏŞAD SADİQOV, VAQİF CAVADOV, VÜQAR NADİROV, NAMİQ YUSİFOV, ZAUR HƏŞİMOV və təbii ki, QURBAN QURBANOV!

Bu isimlər 20 ildi üzü gülməyən qaçqınlarımıza kiçicik də olsa, bir sevinc bəxş etdi. Və ən azı buna görə onlara gurultulu bir "ÇOX SAĞ OL" düşür. Futbolçu kimi adını unutmayacağımız Qurban Qurbanov məşqçi kimi də adının əbədiləşməsi yolunda böyük bir addım atdı.

Tanrı dualarımızı eşitdi. "Qarabağ" komandasının rəhbərlərindən tutmuş futbolçularına qədər əksəriyyəti Allahı sevən insanlardı. Onların tək qorxusu da uca Allahdandı. "Qarabağ" "Rusenborq"dan, rəqibin oyunçularının adından, qiymətlərinin və uğurlarının çoxluğundan da qorxmadı. İnşallah, cavab görüşündə Tronheymdə başlanılan işin sonu gələcək və Ağdamın işğalı günündə "Qarabağ" gözüyaşlı ağdamlılara kiçik də olsa, təsəlli verəcək. Amma "Qarabağ" "Rusenborq"u keçməsə belə, bu faciə olmayacaq! Çünki "Qarabağ" bizimdi! "Qarabağ" onun biabırçı məğlubiyyətindən və 10 min avrodan qorxub televiziyada oyununu verməkdən qaçanların yox, ona inananlarındı! Biz "Qarabağ"a inandıq, futbolçularımız qabiliyyətlərini ortaya qoyduğu zaman "Rusenborq"un məğlubedilməz rəqib olmadığını dönə-dönə vurğuladıq. Amma bir çox həmkarlarım "Qarabağ"a heç inanmadı, qələmlərini itiləyib, növbəti məğlubiyyətdən sonra "qaçqın komanda"nı top-tüfəngə tutmağa hazırlaşmışdılar. "Qarabağ"a "Rusenborq"dan qorxun" mesajını verənlər də vardı. Qorxan gözə çöp düşər!

Kişi ağlamaz deyiblər. Amma bəzi ehkamlara hər zaman riayət etmək olmur. Həyatımda bir dəfə futbol məni ağladıb - "Qarabağ" - "Makkabi" matçının final fiti səslənəndə. Şəxsi tanışlığımız olmadığı halda "Qarabağ"ın ovaxtkı oyunçularından Təbirz Həsənovla meydanda qucaqlaşıb ağlamışdım onda. Amma Təbriz və o komandanın demək olar bütün üzvləri ağlasa da, onlar ERKƏK idi. Onlar adını Azərbaycan futbolunun tarixinə də ERKƏK kimi yazdırdı. Sıra Müşfiq Hüseynovun, Elşad Əhmədovun, Səttar Əliyevin və ovaxtkı qalan ERKƏK futbolçularımızın varislərindədi. Ayın 23-də sadəcə bir futbol matçı olmayacaq, 23-ü həm də Avropaya və dünyaya Qarabağ gerçəyini duyuracağımız bir gün olacaq!

İki il öncə yüzlərlə Ağdam qaçqını sinələrində "Stop Armenian Agression" yazılan köynəklərlə və Ermənistan bayrağını yandırmaqda erməni terroruna üsyan etmişdi. Təəssüf ki, onda futbolçularımız səfərdə heç-heçə etsə də, evdə "Zimbru"ya uduzdu. Bu dəfə inşallah başqa cür olacaq! "Qarabağ" mütləq qol vuracaq! Və şəxsən mən qol vuran həmin futbolçunun alt köynəyində "erməni təcavüzünə son, biz evimizə qayıtmaq istəyirik" tipli yazılar görmək istəyirəm. Gələn həftə futbolumuz üçün tarixi bir həftə olacaq inşallah! Həm "Bakı"ya, həm də "Qarabağ"a dua edəcəyik və Allahın köməyi ilə hər iki klubumuz turu keçəcək!

ANAR ŞABANOĞLU,

[email protected]