18:50
Bu həftə Topaz Premyer Liqasında 2012/13 mövsümünə yekun vurulacaq. Qol.Az-ın məlumatına görə, 32-ci turun qarşılaşmaları mükafatlar və aşağı dəstəyə düşənlərin müəyyənləşməsi baxımından əhəmiyyət kəsb etməyəcək.
İlk “altılıq” komandaları mayın 19-da, ikinci “altılıq” komandaları isə ertəsi gün meydana çıxacaq. Peşəkar Futbol Liqasının rəsmi saytı qarşıdakı turda üz-üzə gələcək cütlərin ölkə çempionatları tarixindəki əvvəlki qarşılaşmalarının balansını təqdim edir.
19 may (bazar)
“Neftçi” - “Bakı”
+24=9-8, top fərqi – 61:33
42-ci paytaxt derbisi ərəfəsində “Neftçi” qələbə sayında 3 qat üstünlüyə malikdir. Artıq ardıcıl 3-cü çempionluğu təmin edən “ağ-qaralar” son 6 görüşdə rəqibindən qol buraxıb. Əvəzində son 4 ev oyununda məğlub olmayıb.
“Qarabağ” - “Simurq”
+5=5-5, top fərqi – 12:14
Əyalət klubları 16-cı duelə tarazlıqla yollanır. Eyni sayda qələbə və heç-heçələri olan komandaların top fərqində üstünlük “Simurq”un tərəfindədir. Lakin mövsümün gümüş mükafatçısı olan “Qarabağ” ardıcıl 3 ev oyunundan 3 xalla ayrılıb.
“İnter” - “Qəbələ”
+10=6-3, top fərqi – 27:14
Çempionatdakı yubiley 20-ci duelə aşkar üstünlüklə çıxacaq tərəf “İnter”dir. Bakılılar tarixi ərzində öz meydanında “Qəbələ”yə uduzmayıb.
20 may (bazar ertəsi)
“Turan” - “Sumqayıt”
+2=2-3, top fərqi – 4:8
Son qarşılaşmadakı qələbə ilə üstünlüyə yiyələnən “Sumqayıt” növbəti oyunda da bunu davam etdirməyə çalışacaq. “Turan”ın ev oyunlarında 1-dən artıq qol vuran olmayıb.
“Xəzər Lənkəran” - “Rəvan”
+1=3-1, top fərqi – 7:4
Hər 2 ev oyununda rəqib qapısına yol tapan “Xəzər Lənkəran” yalnız top fərqində üstünlüyə malikdir. 8-ci yer uğrunda mübarizə aparan rəqiblərin qarşılaşmasında meydan sahibləri qələbə sayında tarazlığı pozmasa da mövqeyini qoruyacaq. Bakılılar isə qalib gələcəyi təqdirdə turnir cədvəlində 8-ci pilləyə yüksələ bilər.
AZAL - “Kəpəz”
+8=2-1, top fərqi – 18:5
AZAL 12-ci dəfə qarşılaşacağı “Kəpəz”lə matçlarda aşkar üstünlüyə malikdir. Bakılılar artıq 7-ciliyi təmin edib və sonuncu olması dəqiqləşən rəqibi ilə matçlarda da uğurlu seriyaya malikdir. Mövsümdə ardıcıl 7 qələbəsi olan AZAL gəncəlilərlə son 6 matçın hamısında 3 xal qazanıb.
