Argentinalıların Azərbaycanda ilk het-triki

XƏBƏR 2 Aprel 2013 / 14:25 2286
-  A +

Topaz Premyer Liqanın XXIV turunun “Turan” - “Rəvan” oyunu bir sıra məqamlarla əlamətdar oldu. Qonaqların ilk hissədən sonra 1:2 hesabı ilə geridə olub, fasilədən sonra 5 qol vurması onlara 6:2 hesablı qələbə qazandırdı. Bu görüş həm də het-triklə diqqət çəkdi.

Mövsümdə 2-ci

“Turan”ın qapısına 3 qol vuran Juan Varea mövsümün 2-ci het-trikinin müəllifi oldu. İlk belə hadisə ötən il dekabrın 2-də qeydə alınmışdı. Onda “Turan”ın malili legioneri Salif Ballo “Kəpəz”lə matçda 3 qol vurmuşdu. Ballo komandasına qərb derbisində 5:1 hesablı qələbə qazandırmışdı.

“Rəvan”da 3-cü

Varea şərəfini qoruduğu “Rəvan”ın tarixinə Premyer Liqada ilk het-trik müəllifi kimi düşüb. Lakin klubun tarixində daha 2 het-trik var. Bunların hər ikisi İzzətəli Süleymanovun hesabındadır. O, komandası I divizionda çıxış etdiyi 2010/11 mövsümündə əvvəl “MKT Araz”, ardınca “Energetik”lə matçlarda 3 qol vurub. 2010-cu il müvafiq olaraq oktyabrın və noyabrın 17-də olan görüşlərdən birincisi evdə, ikincisi səfərdə keçirilib.

Argentinadan 1-ci, legionerlərdən 30-cu

Varea Azərbaycan çempionatları tarixinə het-trik müəllifi olan ilk argentinalı kimi düşüb. Ona qədər 16 ölkədən olan əcnəbilər 29 dəfə 1 oyuna 3 qol vurmuşdu. Varea yubiley – 30-cu het-trikin müəllifi oldu. Daha çox isə gürcüstanlılar fərqlənib: Gürcüstan – 6, Nigeriya, Braziliya – hərəsi 3, Moldova, Ukrayna, Özbəkistan, Litva – hərəsi 2, Seneqal, Serbiya, İran, Türkiyə, Sloveniya, Fil Dişi Sahili, Latviya, Uruqvay, Mali, Argentina – hərəsi 1.

İlk “6”, ikinci “4”

“Turan”la səfər oyununda 6:2 hesabı ilə qalib gələn “Rəvan” Premyer Liqada ilk dəfə 6 qol vurdu. Bunadək heç vaxt bu qədər məhsuldar olmayan paytaxt təmsilçisi 2-ci dəfə 4 top fərqinə sevindi. Ötən il aprelin 28-də evdə “Kəpəz”i 5:1 hesabı ilə məğlub edən “Rəvan” Premyer Liqa tarixində özünün 2-ci, səfərdə isə 1-ci böyükhesablı qələbəsini qazandı. Komandanın tarixindəki ən böyük qələbə isə I divizionda qeydə alınıb. 2010-cu il noyabrın 17-də bakılılar səfərdə “Energetik”i 8:0 hesabı ilə məğlub edib.

43-cü dəfə

“Turan” isə ölkə çempionatında 43-cü böyükhesablı məğlubiyyətini alıb. Tovuz təmsilçisi sonuncu dəfə belə ağır məğlubiyyəti  bu il fevralın 13-də “Bakı” ilə ev oyununda almışdı – 0:4. Qərblilərin 6 və daha çox qol buraxdığı son matç isə 2008-ci il noyabrın 22-də olmuşdu. Həmin vaxt “Bakı” qonaqları 7:0 yenmişdi.

Mövsümdə 3-cü “5”

Cari mövsüm çempionatda 3-cü dəfə 1 komanda 1 hissədə 5 qol vurdu.  Bunadək “Neftçi” “Sumqayıt”la ötən il noyabrın 17-dəki matçın 1-ci, AZAL isə bu il martın 3-də “Qəbələ” ilə görüşün 2-ci hissəsində rəqib qapısından 5 top keçirmişdi.

Məhsuldarlıq

Qarşılaşmada qapılara 8 qol vuruldu ki, mövsümdə 3-cü dəfə belə yüksək məhsuldarlıq qeydə alındı. Bunadək 1 oyunda 9, daha bir matçda isə indiki kimi 8 qol vurulmuşdu. Ötən il noyabrın 17-də “Neftçi” – “Sumqayıt” matçında 8:1, sentyabrın 16-dakı AZAL – “Qarabağ” görüşündə 6:2 hesabı qeydə alınmışdı “Rəvan”a qədər cari mövsümdə səfərdə 6 qol vuran yalnız 1 komanda olub. Ötən il avqustun 19-da “Sumqayıt” – “Qarabağ” matçında 1:6 hesabı qeydə alınıb.

Mənbə: pfl.az


Son xəbərlər
30.04.26  17:08

Fati satılacaq

topaz banner