Fariz Məmmədov: “Mən risk etməyi sevirəm”

Fariz Məmmədov: “Mən risk etməyi sevirəm”
XƏBƏR 24 Mart 2013 / 16:17 2591
-  A +

"Döyüşə yaxşı hazırlaşmışdım. Artıq iki ay idi ki, yalnız bu görüş barədə düşünürdüm və gərgin məşqlər keçirdim”. Qol.Az-ın məlumatına görə, bu sözləri Azərbaycanın peşəkar boksçusu Fariz Məmmədov “Qəbələ” klubunun saytına açıqlamasında bildirib.

Dünən Almaniyanın paytaxtı Berlinin “Merkur” arenasında baş tutan döyüşdə "Qəbələ" boks klubunu təmsil edən F.Məmmədov 36 yaşlı polşalı boksçu Mariuzs Biskupski ilə üz-üzə gəlib. Gərgin keçən altı raundluq reytinq döyüşü idmançımızın xal hesablı qələbəsi ilə yekunlaşıb. Döyüş ərzində boksçumuz rəqibini iki dəfə noqdauna salıb.

“Rəqibim də çox güclü və təcrübəli döyüşçü idi. Əslində bir həftə öncəyə kimi fərqli rəqiblə görüşəcəyimi düşünürdüm. Peşəkar boksda belə gedişlər hər zaman olur. Dediyim kimi polşalı boksçu peşəkar arenada tanınır. O indiyə kimi 45 peşəkar döyüş keçirmişdi. Mən layiqli rəqiblərlə döyüşməyi, risk etməyi sevirəm. Həmd olsun ki, döyüşdən üzüağ çıxmağı bacardım".

Fariz Məmmədov bu qələbəni bu yaxınlarda dünyasını vaxtsız dəyişmiş dostu, "Qəbələ" Futbol Klubunun sabiq əməkdaşı Mübariz Nəcəfova həsr etdiyini söyləyib: "Bu döyüşə Mübarizlə birlikdə gəlməyi planlaşdırmışdıq. Dostumun vaxtsız vəfatı bu planımızın reallaşmasına imkan vermədi. Qələbəni Mübarizə həsr edirəm. Ruhu şad olsun".


Son xəbərlər
30.04.26  17:08

Fati satılacaq

topaz banner