Edis Kurtanoviç: “Rəvan”a gəlməyim istisna deyil"

XƏBƏR 13 Oktyabr 2012 / 15:15 2745

- A +

“Muğan”ın sabiq bosnyalı qapıçısı Edis Kurtanoviç Qol.Az-a müsahibə verib.

“O klub mənə çox doğmadır, orada gözəl günlərim olub”

- Hazırda hansı klubun şərəfini qoruyursan?

- Hazırda futbol oynamıram. Belə demək mümkünsə, tamaşaı mövqeyindəyəm və oyunlara azarkeş kimi gedirəm. Ola bilsin karyeramı davam etdirdim, amma ola da bilsin ki, məşqçiliyə başlayım və qapıçılarla işləyim.

- Azərbaycanla nə dərəcədə əlaqə saxlayırsan? Yəqin ki, burada dostların var...

- Əlbəttə, Azərbaycanda kifayət qədər dostum var və imkan düşdükcə, əlaqə saxlayırıq.

- Sabiq klubun “Muğan”ın fəaliyyətini dayandırmasından xəbərin var?

- Necə? Başa düşmədim, “Muğan” komandası artıq yoxdur?

- Bəli, bu komanda artıq mövcud deyil və fəaliyyətini dayandırıb.

- Buna çox təəssüfləndim. Bilirsiniz, o klub mənə çox doğmadır, orada gözəl günlərim olub. “Muğan”da özümü necə gözəl hiss etdiyimi tanıyanlar bilir.

“İnternet vasitəsilə “Rəvan”ın oyunlarını izləyirəm.

- Həmin vaxt “Muğan”da Kamal Alispahiçin rəhbərliyi altında oynamışdın. İndi həmin Alispahiç “Rəvan”a baş məşqçi təyin olunub. O, səni bu komandaya dəvət etməyib?

- Bəli, bundan xəbərim var ki, Kamal Alispahiç hazırda “Rəvan”ın baş məşqçisidir. Ümumiyyətlə, bu mütəxəssis haqda ancaq xoş sözlər deyə bilərəm. Əminəm ki, o, tezliklə “Rəvan”da da güclü komanda yaradacaq. Mən deyərdim ki, komanda hazırda heç də pis futbol nümayiş etdirmir. Çünki internet vasitəsilə “Rəvan”ın oyunlarını izləyirəm.

- Az öncə karyeranı bitirmək ehtimalını qeyd etdin...

- Hələ bitirməmişəm, istirahət edirəm. Baxaq görək, gələcəkdə necə olacaq. Yaxşı təklif olsa, karyeramı davam etdirə bilərəm (gülür)

- Amma eyni zamanda həm də belə başa düşdüm ki, qapıçılarla işləyən məşqçi postundan dəvət alsan etiraz etməzsən...

- Bəli, siz deyən kimi də ola bilər. Ancaq hələ 30 yaşım var və düşünürəm ki, futbolçu kimi təklif olsa daha beş il də oynaya bilərəm.

- Az öncə Alispahiçlə bağlı verdiyim suala cavab vermədin... Səni “Rəvan”a dəvət etsə, gələrsən?

- Konkret cavab verməkdə çətinlik çəkirəm. Bilmirəm, baxarıq. Hər şey ola bilər. “Rəvan”a gəlməyim istisna deyil.

“Stamenkoviç əla qapıçıdır”

- “Neftçi”nin Avropa Liqasındakı çıxışlarını və şanslarını necə qiymətləndirirsən?

- “Neftçi” yaxşı komandadır. Onların “Partizan”la oyunlarına baxdım və çox yaxşı təsir bağışladılar. Bu komandanı Bakıda məğlub edə bilərlər.

- “Neftçi”nin serbiyalı qapıçısı Saşa Stamenkoviçlə tanışlığın var?

- 1-2 dəfə belə danışmışıq, amma şəxsi tanışlığım yoxdur. Ancaq deyə bilərəm ki, əla qapıçıdır.

Anar XANLAROV

Daha çox