"Qəbələ"nin ardıcıl 4-cü ev qələbəsi

Azərbaycan Premyer Liqasının IV turunda “Qəbələ” “Sumqayıt”la qarşılaşıb.
 
Qol.Az-ın klubun rəsmi saytına istinadən verdiyi məlumata görə, öz meydanındakı uğurlu seriyasını davam etdirən komanda 4:1 hesablı qələbə qazanıb.

Növbəti böyükhesablı qələbə dubl, ilk, həmçinin yubileylərlə əlamətdar olub.

- “Qəbələ” ardıcıl 4-cü dəfə ev oyununda qalib gəldi. Sonuncu dəfə aprelin 7-də “Xəzər Lənkəran”a uduzan komanda 119 gündür qonaqlara xal vermir.

- Bundan əvvəlki 3 ev oyununda qapısından qol buraxmayan “Qəbələ” sonuncu dəfə 119 gün əvvəl “Xəzər Lənkəran”la matçda qapısında qol görmüşdü. Həmin matçda Branimir Subaşiçin 3-cü dəqiqədə fərqlənməsindən sonra 375 dəqiqə idi meydan sahibləri qol buraxmırdı. “Sumqayıt”lı Ruslan Qurbanov bu seriyanı dayandıra bildi.

- “Sumqayıt” ilk komanda oldu ki, Premyer Liqada ən azı 3 oyunda “Qəbələ”yə məğlub olub. Komandanın Premyer Liqada daha 2 rəqibi var ki, onlarla oyunlarda “Qəbələ” xal itirməyib. Bunlar ABN Bərdə və “Bakılı”dır ki, onların hərəsi 2 dəfə məğlub edilib.

- Sonuncu dəfə ötən mövsümün 30-cu turunun “Bakı” ilə oyununda (4:0) böyük hesabla qalib gələn “Qəbələ” 119 gündən sonra darmadağına imza atıb.

- Cari mövsümdə ilk belə qələbəsini qazanan komanda ümumilikdə tarixində 29-cu dəfə böyük hesabla qalib gəlib. Bu, 2012-ci ildə 4-cü böyük hesablı qələbədir ki, hər dəfə “Qəbələ” 4 qolla buna nail olub.

- 29 qələbənin 11-i birinci dəstə, 4-ü ölkə kubokuna təsadüf edibsə Premyer Liqada 14-cü dəfə 3 və ya daha çox top fərqi ilə qələbə əldə olunub.

-  “Qəbələ” 18-cı dəfə öz meydanında böyük hesabla qalib gəlib. Bunların 7-si birinci dəstə, 2-si kuboka təsadüf etmişdisə 9-cu dəfə Premyer Liqa qonaqlar darmadağın edildi. Digər 11 darmadağın isə səfərdə gerçəkləşib.

- Premyer Liqadakı 14 böyükhesablı qələbənin 7-si Ramiz Məmmədov, 3-ü Toni Adams, 4-ü Fatih Kavlakın baş məşqçiliyi dövrünə təsadüf edib.

- 3-cü dəfə “Sumqayıt”la qarşılaşan komanda tarixində ilk dəfə bu rəqibə 3 top fərqilə qalib gəlib. "Qəbələ"nin böyük hesabla məğlub etdiyi rəqiblər sırasında 20-ci “qurban” olan “Gənclik şəhəri” təmsilçisinə qədər MOİK ilə “Muğan”ın hərəsini 3, “Şərur”, “Gənclərbirliyi-2”, “Energetik”, “Şahdağ” (Quba) və “Simurq”un hərəsini 2 dəfə məğlub edən Qəbələ futbolçuları digər 13 rəqibi 1 dəfə ağır məğlubiyyətə məruz qoyublar.

- “Sumqayıt” ilə oyunda “Qəbələ”nin futbolçusu Umar Kalabane dubla imza atıb. Bu matçadək klub tarixində 21 dubl var idisə, qvineyalı 22-ci dəfə 1 matçda 2 qolun vurulmasında pay sahibi olub.

- İlk dəfə buna nail olan afrikalı klub tarixində dubl etmiş sayca 16-cı futbolçu olub.

- 2008/09 mövsümündə dubl edən Kənan Kərimovdan sonra artıq 9-cu dəfə “Qəbələ”nin dubluna legioner imza atıb.

- Ümumilikdə Kənan hamıdan çox – 4, Rövşən Əhmədov, Vüsal Qarayev, Yannik Kamanan hərəyə 2 dubl müəllifi olublar.

- Bu 22 dubldan 4-ü birinci dəstə, 4-ü ölkə kubokuna təsadüf edibsə, Premyer Liqada 14 belə hal yaşanıb.

- “Qəbələ”nin bütün dublları

2005/06, I dəstə: Rövşən Əhmədov – 2, İbrahim Hüseynov, Qədir İlyasov – hərəyə - 1
2006/07, güclülər dəstəsi: Vüsal Qarayev - 1
2006/07, kubok: Vüsal Qarayev – 1
2007/08, güclülər dəstəsi: Bokunqu Ncioli Fiston, Vitali Balamestnı – hərəyə 1
2008/09, Premyer Liqa: Kənan Kərimov - 2
2008/09, kubok: Kənan Kərimov - 2
2009/10, Premyer Liqa: İqor Melnik, Kristian Torres, Tomaş Stolpa - hərəyə 1
2010/11, Premyer Liqa: Deon Barton – 1
2011/12, Premyer Liqa: Yannik Kamanan – 2, Luiz Hilario - 1
2011/12, kubok: Serge Cehua – 1
2012/13, Premyer Liqa: Umar Kalabane - 1

- Rəşad Abdullayev “Qəbələ”də ilk qolunu vurdu. O, klubun tarixində qol vuran 72-ci futbolçu olub.

- Yarımmüdafiəçi həm də Premyer Liqada qol vuran 53-cü “Qəbələ”li olub.

- Cari mövsümdə ilk dəfə fərqlənən Bruno da Silva 631 gündən sonra rəqib qapısına yol tapıb. O, sonuncu – bu matçadək yeganə olan qolunu 2010-cu il dekabrın 4-də MOİK-lə səfər matçında fərqlənmişdi.

- Yannik Kamanan “Qəbələ”də 20-ci oyununu keçirib.

- Bruno da Silvanın vurduğu qol “Qəbələ”nin ev oyunlarında 175-ci qolu olub.

- Fatih Kavlakın rəhbərliyi altında 10-cu ev qələbəsini qazanan komandanın üzvü Umar Kalabanenin ilk qolu türkiyəlinin rəhbərliyi vaxtında ümumilikdə 25-ci, Premyer liqada 20-ci ev qolu olub.

- Həmin qol Kavlaklı “Qəbələ”nin ümumilikdə 40-cı, çempionatda 35-ci qolu kimi də tarixə düşüb.