"İnter"in isveçrəli futbolçusu: "Bu, məni çox təəssüfləndirdi"

XƏBƏR 2 Avqust 2012 / 15:07 2249

- A +

“İnter”in yeni isveçrəli müdafiəçisi Haynts Barmettlerin klubun rəsmi saytına müsahibəsi

- “İnter”ə keçidiniz necə baş tutdu?

- “İnter”in əməkdaşları mənim agentimlə əlaqə saxladılar. O da bu klubun mənə olan marağını bildirdi. Sonra ailəmlə məsləhətləşdim və klubla danışıqlardan sonra müqavilə imzaladım. Mənim “İnter”ə keçidim belə baş tutdu.

-Maraqlıdır, buraya gəlməmişdən öncə ölkəmiz haqqında nə bilirdiniz?

-Azərbaycan haqqında ilk məlumatım Avroviziya-2012 müsabiqəsilə bağlı idi. Bilirdim ki, bu il müsabiqə məhz Azərbaycanda keçiriləcək. Bundan başqa, bilirdim ki, ölkəniz böyük neft ehtiyatlarına malikdir. “İnter”dən təklif gələndən sonra internetdə Bakı haqqında daha geniş məlumat axtarmağa başladım. Saytlar vasitəsilə mənə öyrənmək nəsib oldu ki, çox böyük paytaxtınız var. Bakı çox böyük və müasir şəhərdir.

-Yerli futbol haqqında nə bilirdiniz?

-Mənə məlum idi ki, milli komandanızın baş məşqçisi alman mütəxəssisi Berti Foqtsdur. Bilirdim ki, bizim milli komandalarımız nə vaxtsa görüşüblər. Lakin etiraf edim ki, yerli klublar barədə heç bir məlumatım yox idi.

-Artıq iki həftədir “İnter”in heyətindəsiniz. Komandada hökm sürən atmosfer və komandaya uyğunlaşmağınız barədə nə deyə bilərsiniz?

-Komandada çox xoş atmosfer hökm sürür. “İnter”də ilk məşqimə çıxan zaman komanda yoldaşlarım mənə kömək etməyə çalışırdılar. Bu, mənə sürətlə iş rejiminə daxil olmağıma və adaptasiya prosesini uğurla keçməyimə kömək etdi. Burada olmaq mənə çox xoşdur.

-Təəssüf ki, “İnter”də ilk oyununuz o qədər də uğurlu alınmadı. Oyunsonrası penaltilər seriyasında təəssüf doğuran xətaya yol verdiniz və komandamız avrokuboklara vida etdi…

-“Asteras” çox yaxşı komandadır. Bu matç bizim, eləcə də onlar üçün çox vacib idi. Biz 120 dəqiqə ağır oyun yaşadıq və qalibin taleyini onbirmetrlik zərbələr müəyyənləşdirməliydi. Bildiyiniz kimi, penalti-lotereyadır. Burada hər şeyi uğur həll edir və həmin gecə uğur yunanların üzünə güldü. Təəssüf ki, zərbəni yerinə yetirə bilmədim, bu, məni çox təəssüfləndirdi.

-Artıq bazar günü “İnter” Azərbaycan çempionatında ilk oyununa çıxacaq. Avrokubokdan kənarda qaldıqdan sonra komandanın mövsümü uğurla başlamağa ehtiyacı var. Lakin “İnter” ölkənin ən yaxşı komandalarından birilə-“Qarabağ”la görüşəcək. Qarşıdakı oyun barədə fikirlənizi öyrənmək istərdik.

-Mən eşitmişəm ki, “Qarabağ” çox güclü komandadır. Ancaq bizə çempionata mütləq müsbət nəticəylə başlamaq lazımdır. Biz ən yaxşı keyfiyyətlərimizi göstərməliyik və nəyə qadir olduğumuzu nümayiş etdirməliyik. Axı, yalnız bu halda bizə lazımi nəticə əldə etmək və avrokubokdan kənarda qaldığımıza görə bəraət qazanmaq müyəssər olacaq. Qarşıda bizi çətin mövsüm gözləyir və bu mövsüm potensialımızı nümayiş etdirməli və özümüzü yaxşı tərəfdən göstərməliyik.

Daha çox