"Əsas heyətə düşmək üçün çalışacağam"

Bu günlərdə “Simurq” daha bir futbolçusunun müqaviləsinin müddətini artırıb. Komanda yaranan gündən Zaqatala təmsilçinin formasını geyinən Rüstəm Məmmədov növbəti mövsüm də "sarı-qara"lıların şərəfini qoruyacaq. Futbolçu bununla bağlı klubun rəsmi saytına müsahibə verib:

- Rüstəm, “Simurq”la müqaviləni daha bir il müddətinə artırıdın. İlk təəssüratların necədir?

- Əlbəttə, komandamda qaldığıma görə çox sevinirəm. “Simurq” mənim doğma klubumdur. Professional futbolçu kimi bu klubda karyerama başlamışam. Artıq 8-ci mövsüm olacaq ki mən, “Simurq”un formasını geyinəcəm. Rəhbərliyə də təşəkkür edirəm ki, məni komandada saxladılar. Həm bir zaqalalalı, həm də bir futbolçu kimi inanıram ki, doğma şəhərimin təmsilçisinin uğurları üçün var gücümlə çalışacam.
 
- Səndə qeyd etdin ki, “Simurq” yaranan gündən bu komandada forma geyinirsən. “Simurq”da ötən illərlə müqayisədə hansı dəyişiklikər var?

- İldən ilə bu komandada inkişafın getdiyi çox yaxşı hiss olunur. Xüsusən də, növbəti mövsüm üçün “Simurq”un qarşısına böyük məqsədlər qoyulub və bunun üçün də klubda planlı işlərin getdiyini açıq-aydın hiss etmək olar. Rəhbərlik futbolçular üçün daha əlverişli şəraitlər yaradır. Komandanın başında təcrübəli məşqçilər heyəti var. İnanıram ki, bütün bu işlərin nəticəsi kimi “Simurq” növbəti mövsümün sonunda qarşısına qoyduğu məqsədə çatacaq.

-  Ötən mövsümü özün üçün necə dəyərləndirərsən?

- O qədər də uğurlu futbol mövsümü keçirmədim. Bir çox oyunlarda ehtiyatda oturdum. İndi isə öz üzərimdə çox çalışıram. Bu baxımdan hazırda məşqlərdə çox işləyirəm ki, əsas heyətə düşə bilim və məşqçilər korpusunun mənə olan ümidlərini doğruldum.

- Əvvəllər yarımmüdafiədə oynayırdın. İndi isə müdafiə xəttində mübarizə aparırsan. Çətin deyil indiki ampulada çıxış etmək?

- Düz qeyd edirsiz. Ancaq müdafiədə artıq uzun müddətdir oynayıram. Bu səbəbdən də, arxa xəttə artıq uyğunlaşmışam və bu mövqedə oynamaq mənə daha rahatdır.

-  Artıq bügündən təlim-məşq toplanışının ikinci mərhələsi başlayır. Bakıda təşkil olunan hazırlıq prosesi necə keçdi?

- Mənim baxımımdan yaxşı keçdi. Əsasən məşqçilər korpusu bizim fiziki durumumuzun hansı səviyyədə olduğunu və onu yaxşılaşdırmaq üçün çalışdılar. Tapşırıqların da əksəriyyəti bu istiqamətdə idi. Yəqin ki, Türkiyədəki məşqlərimiz bundan daha ağır olacaq. Üstəlik 3 yoldaşlıq görüşüdə keçirdəcəyik. Burada bizə yeni legioner futbolçularda qoşulacaq.
 
- Komandadan ayrılan və yeni gələn oyunçular haqqında nələr deyə bilərsən?

- Əvvəlcə “Simurq”la yolları ayrılan keçmiş komanda yoldaşlarıma gələcək karyeralarında uğurlar arzulayıram. Hələ ki, yeni transfer olunanların əksəriyyəti ötən mövsüm bizdə icarə əsasında forma geyinən futbolçulardır. Baxışa gələn yerli oyunçularda demək olar ki, gənc və istedadlı futbolçulardır. Kartepedə legionerlərdə bizə qoşulmalıdır. İnanıram ki, komanda rəhbərliyi və baş məşqçi “Simurq”a uğur gətirə biləcək futbolçuları transfer edəcək.

- Növbəti mövsümdən gözləntilərin nədir?

- İnanıram ki, “Simurq” üçün yeni futbol ili uğurlu olacaq. Komandaya həm azərkeşlər, həm də rəhbərlik böyük ümidlər bəsləyir. İnşallah, biz də üzərimizə düşən işi layiqincə görüb, azərkeşlərimizə əla futbolla gözəl qələbələr bəxş edəcəyik.