Sergey Yuran, İqor Qetman, Georgi Çixradze və 9-cu pillə

XƏBƏR 22 May 2012 / 00:46 1799

- A +

2005-ci ilin yayında əsası qoyulan “Simurq” peşakar futbol klubu bu mövsüm 6-cı dəfə Unibank Premyer Liqada mübarizə aparıb.

Qol.Az-ın klubun rəsmi saytına istinadən verdiyi məlumata görə, mövsümə iddialı başlayan Zaqatala təmsilçisinin qarşısına yeni təyin olunmuş klub rəhbərliyi turnir cədvəlində ilk “altılığ”a düşmək tapşırığını qoymuşdu.

Komandanın başına isə Sergey Yuran kimi təcrübəli mütəxəssis gətirilsə də, hər şey gözlənilən kimi davam etmədi. İkinci dövrədə uğursuz oyunlar seriyasından sonra rusiyalı mütəxəssiz istefaya göndərildi və onun yerinə Georgi Çixradze dəvət olundu. Gürcü məşqçi komandanın təhlükəli zonadan uzaqlaşmasında böyük pay sahibi oldu və “Simurq” 2011-2012-ci il mövsümünü 9-cu pillədə başa vurdu.

Sergey Yuran – İqor Qetman – Georgi Çixradze

Sergey Yuran “Simurq”un tarixində Anatoli Piskovets, Viktor Pişev, Roman Pokora və Çokiça Hadziyevskidən sonra komandaya təyin olunmuş 5-ci baş məşqçi idi. O həmçinin Unibank Premyer Liqada çalışan ilk rus mütəxəssis kimi də tarixə düşüb.

Sergey Yuranın başçılığı altında “Simurq” 22 Unibank Premyer Liqa oyununda və 1 kubok matçında meydana çıxıb. Azərbaycan kubokuna 1/8 final mərhələsində qoşulan komanda “Neftçi”yə 1:0 hesabı ilə məğlub olaraq yarışdan kənar qalıb. 22 Premyer Liqa matçının 5-də qələbə qazanan “Simurq”, 4-də heç-heçə, 11-də isə meydandan məğlubiyyətlə ayrılıb. Bu oyunlarda 18 qol vuran sarı-qaralar, 31 dəfə isə topu qapısından çıxarmalı olub.

“AZAL” 5:1 “Simurq”, “Simurq” 0:2 “İnter”, “Simurq” 0:1 “Qəbələ”, “Simurq” 0:2 “Bakı”, “Kəpəz” 2:0 “Simurq” – ardıcıl olaraq 5 məğlubiyyətdən sonra Sergey Yuran istefaya göndərilib və Zaqatala təmsilçisi müvəqqəti olaraq köməkçi məşqçi İqor Qetmana tapşırılıb. Onun rəhbərliyi ilə komanda 2 oyunda meydana çıxıb. Səfərdə “Qarabağ”a məğlub edə bilməyən “Simurq” ikinci “altılıq”da mübarizəyə başlayır və evdə final mərhələsinin birinci qarşılaşmasında “Kəpəz”lə 1:1 hesablı heç-heçə edərək 2012-ci ildə ilk xalını qazanıb və ilk qolunu vurub.

Təhlükəli zonaya yaxınlaşan “Simurq”a yeni baş məşqçi – Georgi Çixradze təyin olunur. Buna qədər Bakının “İnter” klubunda köməkçi məşqçi kimi fəaliyyət göstərən gürcü mütəxəssisin rəhbərliyi altında komanda 9 oyunda rəqibləri ilə mübarizə aparır və bu qarşılaşmaların yalnız birində “Simurq” XXVI turda AZAL-a məğlub olub. Qalan 8 oyunda "sarı-qaralar" 3 qələbə və 5 heç-heçə sayəsində hesabına 14 xal əlavə edərək 9-cu yerdə çempionatı başa vurub. Çixradzenin rəhbərliyi altında “Simurq” 8 qol vurub, 6 dəfə isə qapısından top buraxıb.

Daha çox