20:55
Futbol üzrə 2006-cı il dünya çempionatının seçmə qrup mərhələsinin Avropa zonası üzrə püşkü atılarkən səbət bölgüsündə kobud səhvə yol verilib.
Nəticədə Azərbaycan milli komandasının tarixinin ən biabırçı məğlubiyyətlərindən biri qeydə alınıb.
Bu faktı “football-ranking.info” saytı üzə çıxarıb.
Həmin vaxt FİFA püşkatma zamanı UEFA-ya üzv 51 ölkənin 2002-ci il dünya çempionatı və 2004-cü il Avropa çempionatında göstərdiyi nəticələrə əsasən səbətlərə bölünəcəklərini açıqlayıb. Lakin ölkələrin FİFA reytinqindəki xalları bərabər olduğu halda, bölgünün necə aparılacağı barədə məlumat verilməyib. Məsələyə 2008-ci il Avropa çempionatının püşkatma prosedurunda aydınlıq gətirilib. Bu qaydaları nəzərə alarkən məlum olur ki, Bolqarıstan Polşanı 2-ci səbətdə, Ukrayna isə Avstriyanı 3-cü səbətdə əvəzləməli imiş.
Səbətlərə bölgünün düzgün aparılmaması nəticəsində 3 seçmə qrupun tərkibinin formalaşdırılmasında yanlışlığa yol verilib. Bu səbəbdən, Azərbaycan millisi İngiltərə, Polşa, Avstriya, Uels və Şimali İrlandiya ilə 6-cı qrupda rəqib olub. Halbuki bu qrupda Polşa və Avstriyanı Bolqarıstanla Ukrayna əvəzləməli və beləliklə, Avstriya 2-ci qrupda Türkiyə, Yunanıstan, Danimarka, Gürcüstan, Albaniya və Qazaxıstanla, Polşa isə 8-ci qrupda İsveç, Xorvatiya, Polşa, İslandiya, Macarıstan və Malta ilə birgə yer almalı idi.
Qeyd edək ki, Azərbaycan millisi 2006-cı il dünya çempionatının seçmə qrup mərhələsində Polşaya səfərdə 0:8, evdə 0:3 hesabı ilə uduzub. Bakıdakı görüşdə yığmamızın o zamankı baş məşqçisi Karlos Alberto Torresi ispaniyalı referi Undiano Malyenko texniki zonadan qovub. Bu, braziliyalı mütəxəssisin millimizin sükanı arxasında son oyunu olub. Polşadakı nəticə Azərbaycan yığması tarixinə Fransaya 1995-ci ildəki 0:10 hesablı məğlubiyyətdən sonra ikinci biabırçılıq kimi yazılıb. Avstriyaya gəldikdə, səfər matçında 0:2 hesabı ilə uduzan komandamız evdə heç-heçə edib – 0:0. Həmin seçmə mərhələdə yığmamız 3 heç-heçə ilə 6 komandalı qrupda sonuncu olub.
Xəbər: lent.az
Volkanı Metin əvəzlədi
18 ildən sonra
Jardim istefa verdi
“Sumqayıt” 7 dəqiqədə 2 qol vurdu - Video
Zədəli Çalhanoğlu komandası üçün meydana çıxacaq
Bredli MLS təmsilçisinin baş məşqçisi təyin olundu
"İnter Mayami" "Real"ın sabiq oyunçusu ilə razılaşdı
Kukurelya La Liqaya qayıda bilər
"Qalatasaray" 3 futbolçusu ilə yollarını ayırır
İbrahimoviçdən Olimpiya mesajı gəldi
“İmişli” - “Karvan-Yevlax” matçından - Video
"Bavariya"nın kapitanı sıradan çıxdı
Komanda ardıcıl uduzdu, baş məşqçi istefaya göndərildi
"Neftçi" - "Sumqayıt": Heyətlər
Tanınmış futbolçu təyyarədə kobudluq etdi - Video
