"Qəbələ" üçün rekordlar və seriyalarla zəngin tur

Unibank Premyer Liqasının XXIII turunun “Neftçi” ilə ev oyunu "Qəbələ" üçün rekordlar və seriyalarla zəngin olub.

Qol.Az-ın klubun rəsmi saytına istinadən verdiyi məlumata görə, son ölkə çempionunu 4:1 hesabı ilə məğlub edən komanda ardıcıl 2-ci dəfə Azərbaycanın ən köklü komandasına qalib gəlib.

- “Qəbələ” “Neftçi” ilə oyunlar tarixində ilk dəfə ardıcıl qələbə qazanıb.

- “Qəbələ” “Neftçi” ilə oyunlar tarixində final mərhələsində uduzmamaqda davam edir. 2009/10 mövsümündə komanda 1 qələbə qazanıb, 1 heç-heçə etmişdi. “Altılıq” oyunlarında bakılılar qələbəyə həsrətdir.

- 4-cü dəfə “Neftçi”ni məğlub edən “Qəbələ” ilk dəfə böyük hesabla qalib gəlib.

- “Qəbələ” ilk dəfə “Neftçi”nin qapısına 2-dən artıq – 4 qol vurub.

- Ümumilikdə, komanda tarixində 27-ci dəfə böyük hesabla qalib gəlib. Bunların 3-ü cari mövsüm qeydə alınıb: 2-si çempionat, 1-i kubokda.

- Bunların 11-i birinci dəstə, 4-ü ölkə kubokuna təsadüf edibsə, Premyer Liqada 12-ci dəfə 3 və ya daha çox top fərqilə qələbə əldə olunub. XXII turdakı böyükhesablı qələbənin (4:0) səfərdə əldə olunduğunu nəzərə alsaq, evdəki son belə nəticə 329 gün əvvəl təsadüf olunub. Həmin vaxt “Simurq”la oyunda ən azı 3 top fərqilə qalib gəlmişdi.

- “Qəbələ” 16-cı dəfə öz meydanında böyük hesabla qalib gəlib. Bunların 7-si birinci dəstə, 2-si kuboka təsadüf etmişdisə, 7-ci dəfə Premyer Liqada qonaqlar məğlub edilib.

- Premyer Liqadakı 12 böyükhesablı qələbənin 7-si Ramiz Məmmədov, 3-ü Toni Adams, 2-si Fatih Kavlakın baş məşqçiliyi dövrünə təsadüf edib.

- “Qəbələ” 2008-cı ilin avqustundakı nailiyyətini təkrarlayıb 8 gün fasilə ilə 2 böyükhesablı qələbə qazanıb.

- “Neftçi” “Qəbələ”nin böyük hesabla məğlub etdiyi 18-ci komanda olub. MOİK ilə “Muğan”ın hərəsini 3, “Şərur”, “Gənclərbirliyi-2”, “Energetik”, “Şahdağ” (Quba) və “Simurq”un hərəsini 2 dəfə məğlub edən Qəbələ futbolçuları digər 11 rəqibi 1 dəfə ağır məğlubiyyətə məruz qoyublar.

- “Neftçi” ilə oyunda “Qəbələ”nin 2 futbolçusu dubla imza atıb. Luiz Hilario və Yannik Kamanan hərəyə 2 qol vurub. Bu matçadək klub tarixində 19 dubl var idisə, Hilario 20-ci, Kamanan 21-ci uğurun müəllifi olub.

- İlk dəfə buna nail olan Hilario klub tarixində dubl etmiş sayca 15-ci futbolçu olub.

- Kamanan isə Kənan Kərimovun 2008/09 mövsümündəki rekordunu təkrarlayıb. Unibank Premyer Liqasındakı 1 çempionatda 2-ci dublunu rəsmiləşdirib.

- Ümumilikdə Kənan hamıdan çox – 4, Rövşən Əhmədov, Vüsal Qarayev isə Kamanan kimi hərəyə 2 dubl müəllifi olublar.

- Bu 21 dubldan 4-ü birinci dəstə, 4-ü ölkə kubokuna təsadüf edibsə, Premyer Liqada 13 belə hal yaşanıb. Kənan və Yannik Premyer Liqada hamıdan çox – 2 dubl müəllifi olublar.

- Kamananın matçda vurduğu son qol “Qəbələ”nin Unibank Premyer Liqasındakı ev matçların 90-cı, ümumilikdə isə evdə vurulan 160-cı qol olub.

- Ardıcıl 3 oyundur meydanı qolsuz tərk etməyən fransalı hücumçu bu qarşılaşmalarda 5 qol vurub.

- “Qəbələ” isə ardıcıl 5 oyundur meydanı qolsuz tərk etmir. Bununla da komanda özünün Premyer Liqa tarixindəki rekordu olan 2009/10 mövsümündəki 9 oyunluq seriyasına yaxınlaşır.

- Baş məşqçi Fatih Kavlakın rəhbərliyi altında komanda 5-ci ev qələbəsi qazandı.

- “Qəbələ” son 7 ev oyununda uduzmur. Son dəfə  ötən il oktyabrın 29-da “Simurq”a 0: 2 hesabı ilə uduzan komanda sonrakı 6 çempionat və 1 kubok matçında yenilməz olub.

- Həm çempionat, həm də ümumilikdə vurduğu qolların sayını 5-ə çatdıran Kamanan klub tarixinin 20, komandanın Premyer Liqa tarxinin 13 ən yaxşı bombardiri siyahısına daxil olub.

- Həm çempionat, həm də ümumilikdə vurduğu qolların sayını 8-ə çatdıran Luiz Hilario klub tarixinin 11, komandanın Premyer Liqa tarixinin 5 ən yaxşı bombardiri siyahısına daxil olub. İndi o yalnız Deon Barton (14), Kənan Kərimov və Vitali Balamestnıdan (11) geri qalaraq Fərzad Hatəmi ilə eyni sayda çempionat qolu vurub.