İlk baharın uğurlu olsun, «Qara dəniz fırtınası»!

«Trabzonspor»un klub jurnalının fevral sayında həmyerlimiz Rasim Mövsümovun məqaləsi də yer alıb. Trabzon təmsilçisinin «PSV Eyndhoven»lə bugünkü oyununa həsr olunmuş həmin yazını diqqətinizə çatdırırıq. 

İLK BAHARIN UĞURLU OLSUN, «QARA DƏNİZ FIRTINASI»!

Bu mövsüm ilk dəfə Çempionlar Liqasının qrup mərhələsində oynayan «Trabzonspor» eyni zamanda tarixində ilk dəfə dekabr ayından sonra Avropada mübarizə aparacaq. Yoluna Avropa Liqasında davam edəcək «Qara dəniz fırtınası»nın 1/16 finaldakı rəqibi Hollandiya təmsilçisi «PSV Eyndhoven»dir. İlk oyunu bu gün Trabzonda keçiriləcək duelin cavab qarşılaşması isə fevralın 23-də Eyndhovendə baş tutacaq.

Bəli, «Trabzonspor» UEFA kuboku/Avropa Liqasının qrup mərhələsinin mövcud olduğu 2004/05 mövsümündən bəri ilk dəfə 1/16 finalda yarışacaq. Eyni zamanda «bordo-mavililər» ilk dəfə UEFA turnirlərinin bahar mərhələsində oynayacaqlar.

Amma məyusedici bir fakt da var ki, «Trabzonspor» sentyabr ayında Çempionlar Liqası qrup mərhələsinin ilk qarşılaşmasında səfərdə «İnter»ə 1:0 hesabı ilə qalib gəldikdən sonra beş oyundur Avropada qələbə üzübə həsrət qalıb, bu müddətdə 4 heç-heçə və 1 məğlubiyyətə imza atıb.

«PSV Eyndhoven» üç mövsümdür çempion ola bilmir

«Trabzonspor» bu uğursuz seriyanı dayandırmaq üçün mütləq «PSV Eyndhoven»ə qalib gəlməlidir. Bəs, Hollandiya klubu necə bir rəqibdir?
«Trabzonspor»dan fərqli olaraq, «PSV Eyndhoven» 9 oyundur Avropada məğlub olmur (6 qələbə və 3 heç-heçə) və bu qarşılaşmalardan 8-i hazırkı mövsümdə baş tutub. Hollandiya təmsilçisinin avrokuboklar çərçivəsində son üç səfər oyununda qalib gəlməsi də diqqətçəkən bir göstəricidir.

«PSV Eyndhoven»in son beş mövsümdə 4-cü dəfə 1/16 finala çıxmasını da xatırladaq: 2009/10 mövsümündə bu mərhələdə «Hamburq»a uduzsa da, 2007/08 mövsümündə «Helsinqborq» və keçən mövsüm «Lill» komandalarından güclü olub və sonra hər iki halda 1/4 finala yüksələ bilib.

Buna baxmayaraq, 2004/05-2007/08-ci illərdə ardıcıl 4 dəfə Hollandiya çempionu olan «PSV Eyndhoven» ondan sonra üç mövsümdür zirvəyə qalxa bilmir. «Trabzonspor»un rəqibi ölkə kubokunu isə 1997-ci ildən bəri yalnız bir dəfə (2004/05) qazanıb. Adıçəkilən klubun Avropadakı uğurları isə ötən əsrin 70-80-ci illərinə təsadüf edir: belə ki, 1977/78 mövsümündə UEFA kubokuna, 1987/88 mövsümündə isə Çempionlar kubokuna sahib çıxıb.

2004-cü ildə Efes Pilsen kubokunda 2:2

«Trabzonspor» və «PSV Eyndhoven» UEFA turnirlərində ilk dəfə qarşılaşacaqlar. Eyni zamanda bu trabzonluların rəsmi yarışlarda hollandiyalılara qarşı ilk mübarizəsi olacaq. Amma «PSV Eyndhoven» indiyə kimi türklərə qarşı 14 oyun keçirərək 7 qələbə, 2 heç-heçə və 5 məğlubiyyətə imza atıb, Türkiyədəki qarşılaşmalarda isə 1 qələbə və 1 heç-heçə əldə edərkən 5 dəfə də uduzub.

«Trabzonspor» və «PSV Eyndhoven» yalnız 2004-cü il yanvarın 12-də Antalyada yoldaşlıq turniri olan Efes Pilsen kubokunda üz-üzə gəliblər. Əsas vaxtı 2:2 bitən oyundan sonra penaltilər seriyasında Yan Venneqoor Hesselinkin qolu hollandiyalılara  7:6 hesablı qələbə qazandırıb.

Zokora ve Paulo Henrike Hollandiya klubuna qol vurublar

«Trabzonspor»lu Didye Zokora «Tottenhem»in formasını geyərkən UEFA kuboku-2007/08-in 1/8 finalında «PSV Eyndhoven»ə qarşı oynayıb. Hər iki komanda evdə rəqibinə 0:1 uduzduğundan mübarizə penaltilər seriyası ilə davam edib və Hollandiya klubu 6:5 hesabı ilə qalib gəlib. O zaman penaltidən fərqlənən Zokora «Tottenhem» formasıyla ilk və son dəfə topu rəqib qapısından keçirib.
«Trabzonspor»un braziliyalı hücumçusu Paulo Henrike isə 2007-2010-ci illərdə Hollandiyada «Herenven» klubunda oynayıb. O,  2009-cu il fevralın 27-də «PSV Eyndhoven»i 3:2 hesabı ilə məğlub etdikləri qarşılaşmada 2 qol vurub, onun adıçəkilən rəqibə qarşı oynadığı daha iki matç isə heç-heçə bitib.

Rutten Xəlili «Şalke»dən tanıyır

«Trabzonspor»lu Xəlil Altıntop və «PSV Eyndhoven»li Orlando Engelaar 2008/09 mövsümündə birlikdə «Şalke» klubunda oynayıblar. İşin maraqlı tərəfi isə Hollandiya klubunun indiki baş məşqçisi Fred Ruttenin o vaxt «Şalke»ni çalışdırmasıdır. Yeri gəlmişkən, 49 yaşlı mütəxəssis bu yay müqaviləsi başa çatdıqdan sonra «PSV Eyndhoven»i tərk edəcəyini açıqlayıb. Rutten ötən ilin dekabrında «PSV və mənim üçün ayrılma zamanı gəlib», - deyib. Onun 2009-cu ildən adıçəkilən klubu çalışdırdığını da bildirək.

Xəlil və Engelaardan başqa, «Trabzonspor»un polşalı futbolçuları Arkadiuş Qlovatski, eyni zamanda Pyotr və Pavel Brojek qardaşları 2008-2010-cu illərdə «PSV Eyndhoven»in braziliyalı müdafiəçisi Marselo ilə birlikdə «Visla Krakov» komandasında oynayıblar. Onlar 2008/09 mövsümündə Polşa çempionluğunu da qazanıblar.

Digər maraqlı fakt isə «PSV Eyndhoven»in mərakeşli ehtiyat qapıçısı Xalid Sinouhun 2007/08 mövsümündə Türkiyə Superliqasında «Kasımpaşa» klubunun qapısını qorumasıdır.

«Stok Siti» və ya «Valensiya»

«Trabzonspor» qarşıdakı «PSV Eyndhoven» səddini keçsə, 8 və 15 mart tarixlərində 1/8 finalda İngiltərənin «Stok Siti» və ya İspaniyanın «Valensiya» komandası ilə qarşılaşacaq. «Qara dəniz fırtınası» potensial rəqibləri ilə UEFA turnirlərində əvvəllər qarşılaşmayıb. «PSV Eyndhoven» isə «Stok Siti» ilə üz-üzə gəlməsə də, 1999/00 mövsümündə Çempionlar Liqası ilk qrup mərhələsində «Valensiya» ilə qüvvəsini sınayıb. Eyndhovendəki ilk oyunda məğlub olmayan (1:1) «Valensiya» daha sonra öz meydanında 1:0 hesabı ilə qələbə qazanıb.

Rasim MÖVSÜMOV
«FIFA Ballon d’Or» və «UEFA Best Player in Europe» mükafatlarının jüri üzvü