Bekhem daha 2 il Amerikada qalacaq

Bekhem daha 2 il Amerikada qalacaq
XƏBƏR 20 Yanvar 2012 / 02:13 1513
-  A +

Futbol üzrə İngiltərə milli komandasının sabiq kapitanı Devid Bekhem ABŞ-ın “Los-Anceles Qalaksi” klubu ilə müqaviləsini uzadıb. Qol.Az-ın məlumatına görə, 37 yaşlı yarımmüdafiəçi daha 2 il MLS Liqasında oynayacaq.

Onun 2007-ci ilin əvvəllərində bağladığı 5 illik anlaşma 2011-ci ilin dekabrında başa çatıb. Bekhem ABŞ çempionatı üçün rekord məbləğdə - ildə 6 milyon dollar əmək haqqı alırdı. Ötən ilin sonlarında təcrübəli futbolçunun adı Fransa PSJ-si, habelə İngiltərənin bir sıra klubları ilə hallanırdı. Lakin yarımmüdafiəçi ailə vəziyyəti ilə əlaqədar PSJ-yə yollanmaqdan imtina edib.

Bekhem yeni anlaşmasını belə şərh edib: “Dünyanın bir çox klubundan təklif almışdım. Lakin ABŞ-da oynamaq və “Los-Anceles Qalaksi” ilə kuboklar qazanmaq istəyirəm. Ailəm də ABŞ-dakı həyatlarından razıdır və bu ölkədə hələ uzun müddət keçirmək niyyətindədir”.

Qeyd edək ki, “Los-Anceles Qalaksi”yə transferinədək Devid Bekhem İspaniyanın “Real Madrid” və İngiltərənin “Mançester Yunayted” klublarında oynayıb. O, Çempionlar Liqası, Qitələrarası Kubok, İngiltərə çempionatı, Kuboku və Superkuboku, eləcə də İspaniya çempionatı və Superkubokunun qalibi olub. Bekhem “Los-Anceles Qalaksi”nin heyətində isə 2011-ci ildə ABŞ çempionluğu əldə edib.

Daha çox


Son xəbərlər
22.12.25  18:07

Qallaher, yoxsa Neves?