“Bakı" AFFA-nın baş katibi və PFL prezidentinə müraciət ünvanladı

“Bakı” klubu “Olimpik”lə oyunla bağlı AFFA-nın baş katibi Elxan Məmmədov və PFL-in prezidenti Ramin Musayevə müraciət ünvanlayıb. Klubun rəsmi saytının yaydığı məlumata görə, müraciətdə deyilir: “Olimpik” - “Bakı” görüşü zamanı oyunu idarə edən hakim Zöhrab Qədiyev oyunun nəticəsinə təsir edən qərarlar qəbul edərək, “Bakı” klubunun məğlub olması üçün hər şey etdi. “Bakı” FK-ya oyundan əvvəl baş hakim Zöhrab Qədiyevin meydanda başqa futbol klubuları tərəfindən müəyyən tapşırıqlar aldığı və meydanda buna uyğun olaraq “Bakı” FK-nu məğlub etmək üçün mümkün olan hər şey edəcəyi ilə bağlı məlumat daxil olmuşdur. “Bakı” FK olaraq biz oyundan əvvəl bu haqda Hakimlər Komitəsinin  rəhbərliyini məlumatlandırmış və xahiş etmişdi ki, bu oyunda diqqətli olsunlar. Hakimlər Komitəsi öz növbəsində hər şeyin ədalətli olacağını, hakim Z.Qədiyevin  oyunu obyektiv və qərəzsiz idarə edəcəyini bildirmişdir. Lakin oyun başlayandan bir neçə dəqiqə sonra Z. Qədiyev obyektivlikdən uzaq və oyunu özü istədiyi kimi idarə edəcəyi məlum oldu. Bunu aşağıdakı epizodlarda açıq aydın görmək olardı.
Oyunun 19-cu dəqiqəsində M. Şükürov hakimin  gözü qarşısında  “Bakı” futbol klubunun oyunçusu E. Skuliçi  əllə vursa da, nədənsə hakim M. Şükürova sarı vərəqə göstərməklə kifayətləndi. Halbuki, hakim  həmin epizodda birbaşa qırmızı vərəqə göstərməli idi.
Oyunun sonrakı dəqiqələrində M.Şükürov dəfələrlə kobud qayda pozuntusuna yol versə də, hakimin fiti susurdu. Oyun zamanı verilən bütün cərimə zərbələri “Bakı” FK-nun qapısına verilirdi. “Olimpik” FK-nun müdafiəçisi U. Ndukanın dəfələrlə kobud qayda pozuntusuna yol versə də hakimin fiti yenə də susurdu. Halbuki həmin hərəkətlərlə bağlı “Bakı” FK-nun oyunçusu A. Muciri qırmızı vərəqə ilə meydandan qovuldu.
Oyunun 51-ci dəqiqəsində futbolda analoqu olmayan bir hadisə baş verdi. Baş verənləri sözlə ifadə etmək çətin idi. “Bakı” FK-nun cərimə meydançasında zədələnib yerə yıxılan J. Suaresə tibbi yardım göstərilməsi üçün F. Peres topu auta göndərdi.
“Bakı” FK-nun oyunçuları J. Suaresə ayağa qalxmaqda köməklik edərkən Mahir Şükürov autdan topu oyuna daxil etməkdə Junivan Suaresi zərbə mövqeyinə çıxardı və  o da hesabı bərabərləşdirdi. “Olimpik” futbolçuları “Feyr- Pley” qaydalarına əməl etməyərək FİFA, UEFA və AFFA-nın qəbul etdiyi ədalətli oyun prinsiplərinə zidd hərəkət etdilər və futbol tarixində görünməyən bu hərəkətlə “tarixə düşdülər”. Bu hərəkət Azərbaycanlıya və peşəkarlığa ziddir, “Olimpik” Futbol Klubunun adına ləkədir və ləyaqət anlayışının üstündən xətt çəkmək deməkdir.  
Bu bütün futbol ictimaiyyətinin haqlı narazılıqlarına səbəb olmuşdur. (KİV- də gedən yazılar və oyunun video yazısı məktuba əlavə olunur.)
Sizdən xahiş edirik ki, hakimin oyunun nəticəsinə təsir edən qərarlar qəbul etməsi və bu oyunda “Olimpik”li futbolçular tərəfindən “Feyr – Pley” normalarına zidd hərəkət etməklə əsas gətirilərək oyunun təkrar keçirilməsi üçün appelyasiya şikayətinə baxasınız. Oyunun video yazısı və mübahisəli epizodları FİFA,UEFA və AFFA-ya göndəriləcək”.