Ölkə çempionatının qalibləri bəlli oldu

Ölkə çempionatının qalibləri bəlli oldu
XƏBƏR 26 Dekabr 2011 / 12:01 1643
-  A +

Bakı İdman Sarayında böyüklər arasında boks üzrə ölkə çempionatına yekun vurulub.

Qol.Az-ın məlumatına görə, dünya və Avropa çempionatının mükafatçısı Samir Məmmədov (56 kq) uzun fasilədən sonra yenidən Azərbaycanda ən güclü olduğunu sübut edib.

O, finalda əsas rəqibi Rəhim Nəcəfovu 23:11 hesabı ilə məğlub edib. Məmmədov həm də yarışın ən yaxşı boksçusu sayılıb. Çempionatın ən gənc iştirakçılarından olan Tural Əhmədov finalda da çətinlik çəkmədən qalib gəlib. Bu il “Böyük İpək Yolu” və Abbas Ağalarovun xatirəsinə həsr olunmuş turnirdə 1-ci olan Əhmədov Sərxan Babayevi 26:6 hesabı ilə üstələyib.

Neft Ölkələrinin Dünya kuboku turnirində qələbə qazanmış Cavid Çələbiyev (52 kq) ölkə çempionatında da fərqlənib. O, Kamran Məlikov üzərində 21:13 hesabı ilə qələbə qazanıb. Tapdıq Bayramov (60 kq) Kamran Baxşəliyevi 22:12, Ruslan Qasımov (64 kq) Nurlan Məmmədovu 22:16 hesabı ilə üstələyib.

Dünya çempionatının mükafatçısı Emil Məhərrəmov bu il də ölkə çempionatında finalda uduzub. Uzun illər milli komandamızın kapitanı olmuş boksçunun Tamerlan Abdullayevlə həlledici döyüşü 14:14 hesabı ilə yekunlaşsa da, hakimlər qələbəni Abdullayevə veriblər. Fariz Məmmədov (75 kq) Yolçu Zeynalovdan 17:13 üstün olub.
 
Rahib Bəylərov çəkisini dəyişməsinə baxmayaraq, yenə fəxri kürsünün ən yüksək pilləsinə qalxıb. Kamran Mehdiyev (91 kq) rəqibi Hacıbaba Hacıbabayevin döyüşə çıxmaması üzündən qalib elan olunub. Nəhayət, Zamiq Atakişiyev (+91 kq) Fərid Şabanovu yenib – 20:13.

Ümumi komanda hesabında “Rabitə” İdman Klubu 1-ci, “Neftçi” İSM 2-ci, “Qızıl Əlcək” isə 3-cü yeri tutub.


Mənbə: Lent.az


Son xəbərlər