Nazim Süleymanov "Rostov"da (FOTO)

Nazim Süleymanov "Rostov"da (FOTO)
XƏBƏR 15 Dekabr 2011 / 21:12 2540
-  A +

Azərbaycanın veteran futbolçusu Nazim Süleymanov Rusiyanın “Rostov” klubunda “Pro” kateqoriyası almaq üçün məşqçilik təcrübəsi keçir. Rusiya çempionatlarında vurduğu qolların sayı üzrə “Alaniya” komandasının rekordçusu olmuş Süleymanov “Rostov”un rəsmi saytına müsahibə verib.

O bildirib ki, ölkəmizdə “Pro” kateqoriyalı məşqçilik lisenziyası almaq üçün xaricdə iki həftəlik praktika keçmək lazımdır. Bunadək bir həftə Ukraynanın Xarkov şəhərində olan həmyerlimiz ikinci həftəni Rostov-Donda keçirəcək. “Xəzər Lənkəran” və AZAL klublarının sabiq baş məşqçisi məhz “Rostov”u seçməsinin səbəbini belə izah edib: “Bir neçə səbəb var. Birincisi, Rostov böyük ənənələrə malik futbol şəhəridir. Sovet dövründə bütün ölkədə Rostovun idman internatının ad çıxardığını və bir çox yüksək səviyyəli oyunçu yetişdirdiyini əla xatırlayıram. İkincisi, klubun baş direktoru Yuri Belousla tanışam. Özünü çox mütərəqqi insan kimi göstərib, ondan öyrənməli şeylər var. Üçüncüsü, mənim hörmətli və köhnə dostum Qleb Qutiyev burada inkişaf üzrə direktor kimi çalışır. Nəhayət, “Rostov” yerində dayanmayan, inkişaf edən Premyer Liqa klubudur. Digər klublarda iş prosesini necə yoluna qoyulmasını nəzərdən keçirmək hər zaman maraqlıdır”.

Süleymanov öz təcrübəsi və biliklərini gənc futbolçulara verməkdən xoşunun gəldiyini də əlavə edib: “Futbol – mənim həyatımdır”.

Qeyd edək ki, Nazim Süleymanov “Rostov”da klubun baş direktoru Yuri Belous, baş məşqçi Sergey Balaxninlə görüşüb, klubun futbol məktəbi və infrastrukturu ilə tanış olub.

Mənbə: lent.az


Son xəbərlər