Julius Vobay "İnter"lə oyunda meydana çıxa bilər

Bu həftənin bazar günü Premyer Liqanın 15-ci turu çərçivəsində “Xəzər Lənkəran” növbəti ev oyununda Bakının “İnter” klubunu qəbul edəcək.
 
Qol.Az-ın klubun rəsmi saytına istinadən verdiyi məlumata görə, baş tutacaq oyun “Xəzər Lənkəran”ın cari mövsümdə səkkizinci ev oyunu olacaq.

Buna qədər keçirilmiş yeddi qarşılaşmasının altısında qalib olan komanda iki həftə öncə “Rəvan”la görüşün əlavə dəqiqələrində buraxdığı qolun sayəsində bu çempionatda ilk dəfə evdə xal itirib. Mirça Rednikin komandası yeddi ev oyunu ərzində 11 dəfə rəqib qapılarına yol tapıblar, öz qapılarından isə 4 top buraxıblar.
 
“İnter” isə bazar günü mövsümdə yeddinci səfər qarşılaşmasını keçirəcək. Paytaxt komandası rəqib meydanlarında oynadığı altı oyundan dördündə qələbə qazanıb, bir dəfə heç-heçə edib, bir dəfə də məğlub olub. Komandanın səfərdə qol nisbəti müsbətdir – 7 qol vurulub, 3 qol buraxılıb.
 
“Xəzər Lənkəran” son altı çempionat oyununda üç dəfə heç-heçə edib, bir dəfə məğlub olub və yalnız iki qələbə qazanıb ki, onlardan sonuncusu 28 oktyabr tarixinə təsadüf edir. “İnter” isə son altı oyunun üçünü qələbə ilə, üçünü isə heç-heçə ilə bitirib.
 
“İnter” 14 tur ərzində qapısında səkkiz qol görməklə çempionatın ən az qol buraxan komandasıdır. Həmçinin bu komandanın aktivində 12 vurulan qol var, bu da ilk 10 pillədə qərarlaşmış komandalar arasında ən aşağı göstəricidir.
 
“Xəzər Lənkəran” və “İnter” hal-hazırda çempionatda ən az məğlub olmuş komandalardır – hər komanda bu mövsüm iki dəfə meydandan xalsız ayrılıb.
 
Bu tur “Xəzər Lənkəran” çempionatlar tarixində 10-cu dəfə “İnter”i öz meydanında qəbul edəcək. Lənkəranda keçirilmiş doqquz çempionat oyununun altısında komandalar heç-heçə ediblər. Ən məşhur hesab isə 0:0 hesabıdır – Lənkəran təmsilçisi üç dəfə bu rəqiblə evdə qolsuz heç-heçə edib. Bir dəfə öz meydanında “İnter”ə məğlub olan “Xəzər Lənkəran” digər iki oyunu qələbə ilə bitirib.
 
Bu komandalar arasında Lənkəranda son oyun ötən çempionatın 27-ci turu çərçivəsində baş tutmuşdu və qarşılaşmada qalib müəyyən olunmamışdı. Həmin oyunda Parksın vurduğu qola on dəqiqə sonra Odikadze cavab vermişdi və oyun 1:1 hesabı ilə yekunlaşmışdı.
 
Oyunçulara gəldikdə isə Deyan Rusiç hələ ki, zədəlilər siyahısında qalmaqdadır. Bu həftə kubok oyununda zədələnərək əvəzlənən Subaşiçin növbəti oyuna hazır olub-olmaması da sual altındadır. Julius Vobayı isə artıq “İnter”lə oyunda görmək ehtimalı var.
 
Ötən tur “Simurq”la oyunda ikinci sarı vərəqə alaraq meydanı tərk edən Katalin Doman bir oyunluq cəzalandırılaraq qarşıdakı matçı buraxmalı olacaq. Sarı kart limitini aşdığına görə ötən turun matçında iştirak etməyən Pitin xidmətindən isə baş məşqçi “İnter”lə oyunda yararlana biləcək.