“Xəzər Lənkəran” növbəti rekorda doğru

Qol.Az-ın klubun saytına istinadən yaydığı məlumata görə, yarışın son qalibi olan komanda 2004-cü ilin iyulundan başlayan tarixində artıq 8-ci dəfədir kubokda mübarizə aparacaq. Lənkəranlılar Tofiq İsmayılov adına Suraxanı qəsəbə stadionunda I divizion təmsilçisi “Qaradağ Lökbatan”ı qəbul edəcək.

İndiyədək yalnız 1 dəfə 1/4 finalda mübarizəni dayandırıb, 2 dəfə 1/2 final, 1 dəfə isə finalda büdrəyən “Xəzər Lənkəran” 3 dəfə fəxri mükafatın sahibi olub. Bu göstəricidə yalnız “Neftçi” və “Kəpəz”dən geri qalan lənkəranlılar 4-cü titula doğru hərəkətə başlayır. Cənub təmsilçisi yeni mövsümü də qalib kimi bitirəcəyi halda, bu 2 kluba məxsus rekorda şərik olacaq. Rekorda doğru atılacaq ilk addım eyni zamanda yubileylə əlamətdar olacaq. Belə ki, indiyədək 49 kubok matçı keçirən “Xəzər Lənkəran” 50-ci görüşünə çıxacaq.

“Ay-yaşıllar”ın kubok oyunlarında indiyədək 108 futbolçu forma geyib. Bu göstəricidə rekord Alim Qurbanova məxsusdur – 33 oyun. Yeri gəlmişkən, “Xəzər Lənkəran” yaranan vaxtdan onun heyətində qalan yeganə futbolçu olan Alim ümumi oyun sayında (174) da 1-dir. 2009-cu ildən “Neftçi”də oynayan Rəşad Abdullayev 28, “Xəzər Lənkəran”ın hazırkı kapitanı Rahid Əmirquliyev 27 kubok matçı keçirib. Lənkəranlıların kubokda qollarını 37 futbolçu vurub. Vüqar Nadirov (13), Samir Əliyev (9), Rəşad Abdullayev (6) hamıdan çox qol vurublar. İndi onların heç biri “Xəzər Lənkəran”da deyil.

Kubok matçlarına 13 müxtəlif kapitanla çıxan cənub təmsilçisində bu göstəriciləri rekordçuları Mahmud Qurbanov (13), Kamran Ağayev (11) və Emin Quliyevdir (6). Onlardan Kamran cari mövsümə də kapitan kimi başlasa da, “Bakı” ilə çempionat matçında kobud səhvindən sonra sarğı onun əlindən alınaraq, Rahidə verildi.

“Xəzər Lənkəran”ın 4 futbolçusu – Kamran, Rahid, Alim və mövsümlərarası fasilədə komandadan gedən braziliyalı yarımmüdafiəçi Dieqo Qusmao 3 dəfə finalda oynamaqla, rekorda imza atıb. Onların hərəsi 2 dəfə kubokun qazanılmasında pay sahibi olubsa, 1 dəfə finalda məğlub olublar.

Mövsüm   O   Q    H   M    TOP       X     nəticə   qeyd
2004/05    6    2    3    1     6-5         9     ½ final      1
2005/06    8    6    1    1    19-3       19    ½ final     2
2006/07    9    8    0    1    24-2       24   KUBOK
2007/08    9    7    1    1    27-7       22   KUBOK    3
2008/09    4    2    1    1     8-3          7    ¼ final
2009/10    7    4    1    2     10-7      13      final
2010/11    6    3    2    1     11-8      11   KUBOK    4
Cəmi         49  32  9    8    105-35  105
Evdə        22  16  4    2      57-11    52
Səfərdə     21  13  3    5      42-21    29
neytral     6    3   2    1        6-3       11
 
Qeydlər: 1 - Ölkə kubokunun “Karvan”la cavab oyununun nəticəsi kimi 120 dəqiqənin nəticəsi əsas götürülüb. Cədvəldə nəzərə alınmayan penalti seriyasında “Xəzər-Lənkəran” 5:4 hesabı ilə qalib gəlib.
2 - “MKT-Araz”la nəticələri (0:0, 1:1) sonradan ləğv olunan kubok oyunları cədvəldə əks olunmayıb.
3 - “İnter”lə əlavə vaxtın oynanıldığı oyunun 90 yox (0:0), 120 dəqiqəsinin (2:0) nəticəsi hesaba alınıb.
4 - “İnter”lə əlavə vaxtın oynanıldığı oyunun 90 yox (0:0), 120 dəqiqəsinin (1:1) nəticəsi hesaba alınıb və penaltilər seriyası (4:2) nəzərə alınmayıb.