"Qəbələ"nin hədəfi Avrokuboklara vəsiqədir"

“Qəbələ” futbol klubunun yeni baş məşqçisi Fatih Kavlakın Lent.az-a müsahibəsi

- Sizcə, baş məşqçi postunda uzun müddət qalmağınız ilk növbədə, nədən asılıdır?

- Fəaliyyətimin nə qədər sürməsi digər klublardakı həmkarlarımın işi ilə bənzərdir. Yəni, işimiz uğurlu alınsa, fəaliyyətimiz də uzun müddət sürər. İnşallah, belə də olar.

- Qarşınıza hansı şərtlər qoyulub?

- Əvvəlki baş məşqçi Toni Adamsın qarşısına qoyulandan fərqli şərt qoyulmayıb. Baş məşqçi təyinatımadək “Qəbələ”də köməkçi-məşqçi idim. Ona görə də rəhbərliklə bəzi məsələləri yenidən müzakirə etmədik. Sadəcə, “Sənə güvənirik. Baş məşqçi postuna səni gətiririk” deyildi. Mən də “Qəbələ”nin hədəflərini bilirəm. Ona görə də “oldu” cavabını verdim. Hədəflərimizi bilməsəydim, “O olmaz, bu olar” deyərdim. Təklifi qəbul etdim və eyni hədəflərə doğru davam etməyə başladım.

- Bu posta yüksəlişinizdən sonra əvvəllər tutduğunuz köməkçi-məşqçi vəzifəsi boşalıb. Həmin vəzifəyə yenisini gətirmək niyyətində deyilsiniz?

- Belə bir fikrim var. Amma tələsmirəm. Unibank Premyer Liqasında dekabrın sonlarında fasilə yaranacaq. Həmin vaxtadək nəzərdə tutulan 5 oyunumuzu da başa vurduqdan sonra bu barədə daha ətraflı düşünəcəyik. İndi strukturlaşmaya vaxtımız yoxdur. “Onu-bunu istəməy”ə zaman sərf etmək istəmədim. Çünki baş məşqçi təyinatımdan 3 gün sonra “Neftçi” ilə oyunumuz vardı. Ardından “Bakı” ilə görüşümüz oldu. Noyabrın 30-da isə “Neftçala” ilə Azərbaycan Kubokunun 1/8 final matçına çıxacağıq. Daha sonra “Sumqayıt Şəhər”, “İnter”, “Turan” və “Qarabağ”la vacib çempionat oyunlarımız var. Hazırda bu qarşılaşmaları düşünürük. Əslində, Toni Adams baş məşqçi olduğu vaxt işlərin bir qismini mən görürdüm. İndi də paralel olaraq, həmin işləri həll edirəm. Amma inşallah, fasilə vaxtı bu istiqamətdə də işlər görüləcək.

- Baş məşqçi qismində “Qəbələ”ni 2 oyuna çıxardınız. “Neftçi”ni udsanız da, “Bakı”ya uduzdunuz. Bu oyunlardan hansı dərsləri çıxardınız?

- 1:0 hesabı ilə qalib gəldiyimiz ilk oyundan 100 faiz razı qaldım. 1:2 hesabı ilə uduzduğumuz ikinci oyunda isə bəzi çatışmazlıqları gördük. Təbii ki, heç kim yenilmək istəməz. “Bakı” ilə səfər matçımızda əksiklərimizi görmək yaxşı oldu. İnşallah, gələcəkdə işlərimiz daha yaxşı olar.

- “Bakı” ilə qarşılaşmanızda rəqib futbolçu Uinston Parks müdafiəçilərinizi asanlıqla keçirdi. Halbuki arxa xəttinizdə Saşa Yunisoğlu, Vurğun Hüseynov, Nodar Məmmədov kimi yığma üzvləri yer almışdı. Onların bu dərəcədə zəifliyi nədən irəli gəlirdi?

- Çatışmazlıqlarımızı aradan qaldırmaq üçün müntəzəm çalışırıq. “Bakı” ilə qarşılaşmada həddən artıq səhvimiz oldu. Bunların bir səbəbi də meydançanın özümüzə aid hissəsində topla həddən artıq oynamağımızla bağlı idi. Nəticədə hücumların qurulmasına həm çox vaxt sərf etdik, həm də itirdiyimiz topları “Bakı”nın Aleksandar Şoliç, Uinston Parks kimi güclü ön xətt oyunçuları dəyərləndirdilər. Fərdi səhvlərimiz oldu. Amma oyunlarımızı dərindən analiz edirik. Növbəti oyunlarda çatışmazlıqlarımızı aradan qaldıracağımıza inanıram. Nodar Məmmədov Azərbaycanın 21 yaşlılardan ibarət yığmasının kapitanı olub, Saşa Yunisoğlu əsas millidə vaxtaşırı çıxış edib, Vurğun Hüseynov isə fərqli mövqelərdə olsa da, yığmada oynayıb. Yəni, müdafiəçilərimiz keyfiyyətlidirlər, amma dediyim kimi, “Bakı” ilə qarşılaşmada öz meydançamızda itirdiyimiz toplar bizi çətin vəziyyətdə qoydu.

- Bəs heyətinizdəki yararlı oyunçuların sayı yetərincədir?

- Mövqelər üzrə baxsaq, çatışmayan oyunçularımız var. Qış fasiləsində bu istiqamətdə çalışacağıq. Hazırda həmin oyunçuların adlarını dəqiqləşdiririk. Amma onların nəinki adlarını, hətta hansı mövqelərə alınacaqlarını indidən açıqlamağı düzgün saymıram. Alacağımız oyunçulara əsasən heyətdən kimlərin gedəcəyinə də qərar verəcəyik.

- Azərbaycan yığmasına da cəlb olunan Murad Hüseynovun son oyunlarda çıxış etməməsi nə ilə bağlıdır?

- O da heyətimizin bir üzvüdür. Məşqlərdə səylə çalışır. Amma komandadakı bütün oyunçuları meydançaya buraxa bilmərəm. Qarşıdakı oyunlarda Hüseynova da şans verilməsi mümkündür.

- Premyer Liqada təsnifat mərhələsinin son 4 turunu gələn il keçirməli olacaqsınız. “Qəbələ” hazırda 7-ci pillədədir. Bu ilin sonunadək ilk “6-lığ”a düşə bilməsəniz, hər hansı basqı hiss etməyəcəksiniz?

- Hazırda 9 komanda ilk “6-lığ”a düşmək uğrunda mübarizə aparır. Mən isə iddia edə bilərəm ki, “Qəbələ”nin hədəfi bu yox, Avropa kuboklarına vəsiqədir. İnşallah, buna da nail olacağıq. Bu, həm mənim üçün, həm də heyətdəkilər üçün bir şansdır. Biz nə etmək istədiyimizi çox yaxşı bilirik.