"Qarabağ" Ağdamda "Neftçi"yə xal verməyib

XƏBƏR 25 Noyabr 2011 / 11:59 1732

- A +

Sabah Premyer Liqanın XIV turunda Azərbaycan derbisi - “Qarabağ” - “Neftçi” oyunu baş tutacaq.

Bu günə qədər “Qarabağ”la “Neftçi” öz aralarında 55 oyun keçiriblər. Ağdamdakı qarşılaşma bütün çempionatların iştirakçısı olan komandaların 44-cü derbisi olacaq. Tərəflər 6-cı dəfə Ağdamda qarşılşacaq.

Bu komandalar rəsmi olaraq ilk dəfə 1992-ci ildə keçirilən ill milli çempionatda qarşılaşıblar. Sentyabrın 26-da Respublika stadionunda baş tutan, 2000 azarkeşin izlədiyi və Rüstəm Rəhimovun idarə etdiyi qarşılaşmada “Qarabağ”dan Zaur Qarayev hesabı açmaqla derbidə ilk qolu vuran futbolçu kimi tarixə düşdü. Ev sahibləri Beydiyevlə hesabı bərabərləşdirərək hərəyə 1 xala razılaşıblar.

Oktyabrın 20-də isə tərəflərin Ağdamda ilk oyunu olub. Bu dəfə də Rüstəm Rəhimov fit çaldığı oyunda 1000 tamaşaçı “Qarabağ”ın əzəli rəqibi üzərindəki ilk qələbəsinə şahid olub. Beydiyev bu dəfə də fərqlənsə də, Elşad Əhmədov və Mahir Əliyevin qolları “Qarabağ”a qələbə gətirib.

1993-cü ildəki II çempionatda tərəflər yarışın formatı ilə əlaqədar üz-üzə gəlməyiblər. Əvəzində kubokun 1/4 finalında qarşılaşıblar. Aprelin 28-də Rüstəm Aslanovun idarə etdiyi qarşılaşma bu dəfə də Ağdam təmsilçisinin 2:1 hesablı qələbəsiylə nəticələnib. 3 ay sonra işğal olunacaq Ağdamdakı qarşılaşmanı 5000 azarkeş izləyib. “Qarabağ”dan Mehman Alışanovla Müşfiq Hüseynov, qonaqlardan isə Samir Ələkbərov fərqlənib.
Qeyd etdiyimiz kimi, bu qarşılaşmadan təxminən 3 ay sonra - iyulun 23-də Ağdam ermənilər tərəfindən işğal olunub. Bundan sonra tərəflərin o vaxtdan Ağdam şəhərində oyunları baş tutmayıb. Bir də 16 il sonra Ağdamın müvəqqəti inzibati mərkəzi sayılan Quzanlı qəsəbəsində növbəti Azərbaycan derbisi baş keçirlib. 2009-cu ilin oktyabrın 18-də çempionatın təsnifat mərhələsində tərəflər qarşı-qarşıya gəlib. Azad Mütəllimovun idarə etdiyi oyunda cəmi 1 qol olub. Vaqif Cavadovun 40-cı dəqiqədə vurduğu qol 16 illik dönüşün qələbəylə qeyd olunmasıyla nəticələnib.

Rəqiblər Ağdamda həmin çempionatın final mərhələsində də qarşılaşıblar. 2010-cu ilin aprelin 10-da Adamiya və Rauf Əliyevin qolları “Qarabağ” 2:0-lıq qələbə qazanıb.
Nəhayət, ötən mövsüm. 2011-ci ilin mayın 13-də tərəflər Ağdamda 5-ci dəfə qarşılaşıblar. Elçin Məmmədovun idarə etdiyi oyunda Adamiyanın hett-trikiylə gələn 3:0-lıq qələbə “Neftçi”yə tarixinin 2-ci böyük hesablı məğlubiyyətini yaşadıb.

Beləliklə, 19 illik qarşıdurma tarixində tərəflər Ağdamda 5 dəfə qarşılaşıb və oynların hamısından “Qarabağ” qələbə ilə ayrılıb.

Mənbə: “Qarabağ” klubunun rəsmi saytı

Daha çox