Milli çempionatın oyununda partlayış

Milli çempionatın oyununda partlayış
XƏBƏR 22 Noyabr 2011 / 14:46 1971
-  A +

Argentina çempionatında “Estudiantes” və “Banfild” komandaları arasında keçirilmiş oyun 13-cü dəqiqədə yerli azarkeşlərin davranışı üzündən yarımçıq qalıb.

Qol.Az-ın məlumatına görə, fanatlar meydançaya bir neçə petarda ataraq, “Banfild”in qapıçısı Kristian Luçettini zədələyiblər.

Matçın 9-cu dəqiqəsində “Banfild” hesabı açıb. Tezliklə meydançada partlayışlar baş verib. Nəticədə Luçetti qulaqlarını tutaraq, yerə yıxılıb. Qolkiper oyunu davam etdirə bilməyəcəyini deyib. Polislər də görüş iştirakçılarının təhlükəsizliyini təmin edə bilməyəcəklərini dedikdən sonra baş hakim matçı dayandırıb.

“Banfild”in həkimi Luçettinin akustik zədə aldığını və bunun ciddi nəticələrə səbəb olmayacağını bildirib. “Ole” nəşri azarkeşləri “Estudiantes”in məşhur yarımmüdafiəçisi Xuan Sebastyan Veronun qızışdırdığını yazıb. İddialara görə, Veron tribunalara yaxınlaşıb və xuliqanlardan meydançaya enmələrini və onunla şəxsən söhbət etmələrini tələb edib. Lakin məsələ oyunçunun fanatlarla toqquşmasına gətirib çıxarmayıb.

Qeyd edək ki, “Estudiantes” və “Banfild” Argentinanın payız çempionatında turnir cədvəlinin son iki pilləsində qərarlaşıb. Hər iki komanda 14 oyuna 10 xal yığıb. 1-ci pillədə isə 33 xala malik “Boka Xunyors” qərarlaşıb.

Daha çox


Son xəbərlər