Tahir Süleymanov: “Elmar Baxşıyevi çox ciddi cəza gözləyir”

Tahir Süleymanov: “Elmar Baxşıyevi çox ciddi cəza gözləyir”
XƏBƏR 24 Oktyabr 2011 / 15:30 2263
-  A +

“Neftçi” klubu Elmar Baxşıyevin cəzalandırılmasına münasibət bildirib. Komandanın vitse-prezidenti Tahir Süleymanov Qol.Az-ın müxbiri ilə söhbətində Baxşıyevi ciddi cəza gözlədiyini söyləyib.

“Bu barədə klub tərəfindən rəsmi açıqlama verilib. Əlavə olaraq onu deyə bilərəm ki, Elmar sadəcə oyun praktikası qazansın deyə, Böyükağa Hacıyev onu əvəzedici heyətə göndərmişdi. Başqa bir səbəb yox idi. Ancaq Elmar nəinki əvəzedici heyətdə oyuna çıxdı, heç məşqə də gəlmədi. Futbolçuya hansı cəzanın tətbiq olunması ilə bağlı rəsmi açıqlama veriləcək. Amma onu deyə bilərəm ki, cəza çox ciddi olacaq”.

Klub rəsmisi Baxşıyevin mətbuatda səslənən fikirlərinə də aydınlıq gətirib: “Elmarın yayda komandadan getmək istəməsi və bizim ona icazə verməməyimizlə bağlı səsləndirdiyi fikirlər tamamilə yanlışdır. Klub prezidentimizin hər bir futbolçuyla bağlı mövqeyi birmənalıdır. “Neftçi”də oynamaq istəməyən futbolçu komandada qala bilməz. O ki qaldı Elmarın ehtiyatda qalması məsələsinə, dünyanın ən aparıcı klubu “Barslona”nın ehtiyat oyunçular skamyasında oturan futbolçuları hamı yaxşı tanıyır. Məşqçilər hansı futbolçunu məsləhət bilirlərsə, onu da oynadırlar. Başqa bir misal da çəkə bilərəm. Ronaldo kimi bir futbolçunu Mourinyo əvəzləyib, yerinə başqa oyunçunu meydana buraxır. Hər bir oyunçu məşqlərdə əlindən gələni edib, heyətdəki yerini qazanmalıdır”.

 


Son xəbərlər