“Neftçi” – “Qarabağ”: 57-ci duelə kimi hər şey

Sabah Premyer Liqanın I turundan təxirə salınmış “Neftçi” – “Qarabağ” oyunu keçiriləcək. Qol.Az-ın məlumatına görə, bütün çempionatların iştirakçısı olan tərəflər tarixlərində 57-ci, çempionatlarda isə 45-ci dəfə qarşılaşaqlar. “Neftçi” – “Qarabağ” duelləri ilə bağlı maraqlı faktları təqdim edirik:

Statistika:

* İndiyə kimi tərəflər arasında 56 oyun keçirilib
* 56 oyunun 44-ü çempionatda, 12-si isə kubokda baş tutub
* Hər 2 klub bütün çempionatların iştirakçısı olsa da, 1993-cü ildə baş tutan 2-ci çempionatda tərəflər reqlamentlə əlaqədar üz-üzə gəlməyiblər
* Çempionatda tərəflər hərəyə 12 qələbə qazanıb. 2000/2001 mövsümündə “Neftçi”yə 3:0 hesablı texniki qələbə verilib
* “Qarabağ” kubokda 5 dəfə qələbə qazansa da, “Neftçi” 3 dəfə qələbəyə sevinib.
* 56 oyunda “Neftçi” 50, “Qarabağ” isə 42 qol vurub
* “Qarabağ” səfərdə “ağ-qara”lara 2006-cı ilin fevralın 16-da məğlub olduqdan sonra ötən ilin noyabrın 28-nə kimi 1873 gün 11 oyunda uduzmamaqla ən uğurlu seriyanı əldə edib
* “Qarabağ” – “Neftçi” duellərində ən çox qol vuran futbolçu Müşfiq Hüseynovdur (8)
* “Neftçi”nin heyətində “Qarabağ”a ən çox qol vuran Qurban Qurbanovdur (5)
* Hazırda isə “Qarabağ”ın baş məşqçisi Qurban Qurbanov, köməkçisi Müşfiq Hüseynovdur
* Nazim Əliyev, Georgi Adamiya, Tərlan Əhmədov, Vidadi Rzayev hər 2 komandanın heyətində fərqlənən futbolçulardır
* Səttar Əliyev “Neftçi”yə qol vurmaqla yanaşı, bir oyunda avtoqola da imza atıb
* Duellər tarixində 2-ci avtoqola isə Elxan Müslümov imza atıb (“Qarabağ”)
* Duellər ərzində tərəflər hərəyə 2 dəfə (“Qarabağ” - Mehman Alışanov, Emin Salmanov. “Neftçi” - Qurban Qurbanov, Yunis Hüseynov) penaltidən qola sevinsələr də, mayın 13-ündə Adamiya fərqlənməklə “Qarabağ”ı bir addım önə çıxarıb.
* Adamiya eyni zamanda duellər tarixində het-trik edən yeganə futbolçudur. 30 yaşlı forvard sabiq komandasına 3 qol vurmaqla “Qarabağ”ın “Neftçi” üzərində yeganə böyükhesablı qələbəsini qazandırıb.
* “Neftçi” də cəmi bir dəfə bunu bacarıb. 2000-ci ilin noyabrın 4-də Respublika stadionunda “ağ-qara”ların 4:0-lıq qələbəsi qeydə alınıb.
* Həmin çempionatda “Qarabağ”ın heyətində lisenziyası olmayan futbolçular meydana çıxdığına görə “Neftçi”yə texniki qələbə verilib.
* “Neftçi”yə ötən mövsümkü məğlubiyyətə qədər “ağ-qara”lar “Qarabağ”ı yendiyi zaman (27 aprel 2007, 0:2) baş məşqçisi Qurban Qurbanov olub. Qollardan birinə isə hazırda `Qarabağ`ın şərəfini qoruyan Adamiya imza atıb.
* Tərəflər arasında mücadilə ən çox 2003/04 mövsümündə azarkeş toplayıb (15500)
* “Qarabağ” – “Neftçi” arasında sadəcə 1 oyunda vərəqə göstərilməyib. Həmin oyundan 11 il keçir
* İndiyə kimi derbidə 9 qırmızı vərəqə göstərilib
* Aslan Kərimov 2 dəfə meydanı vaxtından əvvəl tərk etməklə liderdir
* Qırmızı vərəqə alanlardan Arif Əsədov “Neftçi”nin baş məşqçisi olub, Elçin Rəhmanov isə hazırda Qarabağ`ın məşqçisidir
* Hazırda 7 futbolçu hər 2 komandanın heyətində top qovub
* Tərəflər ən çox Respublika stadionunda qarşılaşıblar: 27 dəfə
* İndiyə kimi tərəflər 5 şəhər, 4 qəsəbə, 11 stadionda üz-üzə gəliblər
* Derbini ən çox Xəqani Məmmədov (11), Rövşən Əhmədov (8) Vüsal Əliyev (7) idarə ediblər.

Mənbə: qarabagh.com