“Qarabağ” Avstriyada: köhnə rəqiblər, uğurlu sınaqlar

Niderlandın “Tvente” komandası Azərbaycan futboluna tanış və yaxın rəqibdir. Bu tanışlığın tarixçəsi isə düz 16 il əvvəlin yayına gedib çıxır.

Enshede şəhərini komanda 2009-cu ildə Avropa Liqasının təsnifatının pley-off mərhələsində bizim “Qarabağ”a rəqib oldu. İlk dəfə məhz həmin il Avropada pley-off oynayan Ağdam təmsilçisi Enshededəki birinci matçda 1:3 hesabı ilə uduzdu, Bakıdakı cavab oyununda isə heç-heçə etdi (0:0) və mübarizəni dayandırdı. 

Lakin elə bu qarşılaşmalardan sonra klublar arasında münasibətlərin təməli qoyuldu, cəmi bir neçə ay sonra “Qarabağ”ın futbolçusu Vaqif Cavadov “Tvente”yə transfer olundu. 

2014-cü ildə isə komandalar yenidən Avropa Liqasının pley-off mərhələsində üz-üzə gəldi. Bu dəfə isə “Qarabağ” 5 il öncəki məğlubiyyətin əvəzini çıxaraq (0:0, cavab matçında 1:1) o vaxtkı səfər qolu qaydası sayəsində Avroliqanın qrupuna vəsiqə qazandı. Həm də tarixində ilk dəfə.

“Qarabağ”la “Tvente” bir də həmin matçlardan 11 il sonra, iyulun 11-də üz-üzə gəldi. Bu dəfə Avstriyada iki yoxlama matçında. Beləliklə, Niderland təmsilçisi indiyədək “Qarabağ”ın ən çox qarşılaşdığı əcnəbi komandalardan oldu. Bu iki yoxlama görüşünün ilkində “Qarabağ” qalib gəldi (3:2), digərində isə uduzdu (1:2).

Bu yerdə vacib bir məqam da qeyd edilməlidir ki, “Qarabağ”ın Avstriyadakı hazırlıq prosesi zamanı seçdiyi hər üç rəqib səviyyəli komandadır.

Elə həmin “Tvente”dən başlasaq, Enshede klubu Erediviziyada son mövsümü 6-cı yerdə başa vurub. Qeyd etmək yerinə düşər ki, Niderland yüksək liqası “boyük beşlik”dən sonra hazırda reytinqinə görə Avropanın ən güclü 6-cı çempionatı sayılır. Odur ki, belə bir liqanın təmsilçisi ilə matçlar bu mövsüm Çempionlar Liqasında Azərbaycanı təmsil edəcək “Qarabağ” üçün yerinə düşmüş uğurlu sınaqlar oldu. Yəni adətən yoxlama görüşlərinin nəticələri çox da əhəmiyyətli sayılmır. Əksinə matçların özü fasilədən yeni qayıdan komandaların mövcud hazırlıq durumunu üzə çıxarır. Elə baş məşqçi Q.Qurbanov da “Tvente” ilə görüşlərdən sonra verdiyi açıqlamada bu məqama da toxunub:

“İki yaxşı oyun alındı. Bütün futbolçularımıza 90 dəqiqə oynamaq üçün şərait yaratdıq. Yaxşı oyun fəlsəfəsi olan, güclü və intizamlı rəqiblə qarşılaşırdıq. Nəticədən çox meydanda etdiklərimiz vacib idi. Bütün istəklərimizin düzgün icra edilməsini futbolçulardan hələ tələb etməyimiz doğru çıxmaz. Səhvlər qaçılmazdır. Ancaq hər iki matçda komandamızın çıxışı gələcəyə ümid verdi. Hazırlıq dönəminin ən vacib günü idi. Oyunları zədəsiz tamamlamağımız da sevindirici məqamdır”.

“Qarabağ”ın bu toplanış çərçivəsində ilk rəqibi isə yeni mövsümdən Ukrayna Premyer Liqasında yarışacaq “Metalist 1925” oldu (4:5). Toplanış çərçivəsində Ağdam klubunun son rəqibi də ona tanışdır. Avstriya futbolunun nəhənglərindən olan 17 dəfə ölkə çempionu “Zalsburq”. 

Bu komanda son mövsümü yerli liqada 2-ci yerdə başa vurub və çempion “Şturm”dan cəmi 2 xal geridə qalıb.

Xatırladaq ki, "Qarabağ"la "Zalsburq" 2014-cü ildə Çempionlar Liqasının üçüncü təsnifat mərhələsində üz-üzə gəlib. Bakıdakı matçda Ağdam təmsilçisi qələbə qazansa da (2:1), cavab görüşündə uduzub (0:2). "Zalsburq" üstün tərəf kimi ÇL-də pley-off mərhələsinə adlayıb.

Beləliklə, “Zalsburq”la 15 iyulda keçiləcək oyun da “Qarabağ” üçün üstün və zəif tərəflərini daha da aşkarlamaq baxımdan yaxşı bir sınaq olacaq. Bu oyunların komandaya nə kimi fayda verəcəyini isə biz tezliklə Çempionlar Liqasının matçında görəcəyik.

ELNUR