"Şəfa" stadionunun görünüşü dəyişdiriləcək

"İnter"in tikinti şöbəsinin baş mühəndisi Nazim Muradəsilov "Şəfa" stadionunda aparılan tikinti işləri barədə klubun rəsmi saytına ətraflı məlumatı verib.

-Stadionda aparılan tikinti işləri barədə ətraflı məlumat verməyinizi xahiş edirik. Tikinti işlərinin başa çatmasından sonra stadionun görünüşü necə dəyişəcək?

-Bizim stadionun görünüşünün dəyişdirilməsinin bir neçə variantı var idi, son nəticədə bir layihə üzərində dayandıq. Stadionun yenidən inşasının ümumi kompleksinə iki altı mərtəbəli binanın inşası və hər iki binanı birləşdirəcək qalereyanın tikintisi daxildir.

İnşa edilən birinci bunanı “Bina A”, ikinci binanı “Bina B” adlandıraq. Həmin binada 4 ulduzlu 50 nömrəlik otel yerləşəcək. Bundan başqa, binada VİP dərəcəli 3 sərnişin lifti və dama çıxışı olan 1 xidməti lift olacaq. Bir də ki, bina özünün yeraltı avtodayanacağına malik olacaq.

İkinci “Bina B”də müxtəlif şirkətlər üçün ofislər yerləşəcək. Həmin bina da 6 mərtəbəli olacaq, burada həmçinin kafe fəaliyyət göstərəcək. Qeyd etmək yerinə düşərdi ki, hər iki binanın damında solyariya istifadəyə veriləcək. Birləşdirici qalereya 3 mərtəbədən ibarət olacaq. Birinci mərtəbədə mətbuat konfransları üçün zal, kafe, spa-salon və idman məhsulları satılan mağaza yerləşəcək.

İkinci mərtəbədə 80 nəfər üçün nəzərdə tutulmuş 2 restoran fəaliyyət göstərəcək. Restoranların birində müştərilərə Avropa , digər restoranda isə milli və dünya mətbəxindən yeməklər təklif ediləcək. Üçüncü mərtəbədə qış bağı, limonariya və musiqi salonu olan şəkil qalereyası yerləşəcək. Demək istərdim ki, tikinti də ekoloji təmiz materiallardan istifadə olunur.

-Tikinti hansı mərhələdədir?

-Biz artıq ümumi tikinti işlərini və binanın şüşə örtüyülə üzləmə işini başa çatdırırıq. Artıq liftlər montaj olunub. Binanın mühəndis təminatını həyata keçirmək, başqa sözlə desək, binanı su, istilik, elektrik enerjisilə təmin etmək qalır. Bundan başqa, bəzək işlərini, o cümlədən mətbəx və restoran avadanlığının quraşdırılmasını həyata keçirmək lazımdır.

-Tikinti işləri nə vaxtdan gedir və işlərin nə zaman başa çatdırılması planlaşdırılır?

-Tikini işləri artıq 2 ildən artıq davam edir. Biz tikinti işlərinə 2008-ci ilin avqust ayından başlamışıq. Demək istəyirəm ki, tikinti işlərini 20 ay ərzində başa çatdırmaq istəyirik.

-Bu rekonstruksiya hansı müsbət nəticələr verəcək?

-Rekonstruksiya böyük üstünlüklər verəcək. Bildiyimə görə, tikintinin başa çatmasından sonra yeni ofisdə klubun uşaq akademiyası yerləşəcək. Bundan başqa, qonaq gəlmiş futbolçular fəaliyyət göstərəcək otelin imkanlarından istifadə etmək imkanı qazanacaqlar. Buna əlavə olaraq deyə bilərəm ki, rekonstruksiya stadionun estetik görünüşünü və klub əməkdaşlarının məişət şəraitini yaxşılaşdıracaq. Bundan başqa, yeni üzlüyə malik bina Heydər Əliyev prospektinin görünüşünü də yaxşılaşdıracaq.